រុស្ស៊ីបោះឆ្នោតវេតូ ប្រឆាំងគំនិតភ្ជាប់ទំនាក់ទំនងហេតុនិងផល រវាងវិបត្តិអាកាសធាតុ ទៅនឹងបញ្ហាសន្តិសុខ
កាលពីថ្ងៃចន្ទ ទី១៣ធ្នូ ក្រុមប្រឹក្សាសន្តិសុខបានបោះឆ្នោត លើគម្រោងសេចក្តីសម្រេចចិត្តមួយ ស្នើដោយអៀរឡង់ និង នីហ្សេ ដែលមានខ្លឹមសារ ភ្ជាប់ទំនាក់ទំនងហេតុនិងផល រវាងវិបត្តិអាកាសធាតុ ទៅនឹងបញ្ហាសន្តិសុខនៅទូទាំងពិភពលោក។ ក៏ប៉ុន្តែ គម្រោងសម្រេចចិត្តនេះ ត្រូវបានរុស្ស៊ីបោះឆ្នោតវេតូប្រឆាំង ដោយលើកហេតុផលថា វានឹងបង្កើតឲ្យមានមតិភ័ន្តច្រឡំ ព្រមទាំងមានលក្ខណៈស្ទួន ប្រជែងគ្នា ជាមួយនឹងវេទិកាអន្តរជាតិផ្សេងទៀត ដែលជជែកគ្នា អំពីវិបត្តិអាកាសធាតុដែរ។
ចុះផ្សាយនៅថ្ងៃ៖
ស្តាប់ - ០៣:០៩
អត្ថបទកម្រោងសេចក្តីសម្រេចចិត្ត ដែលស្នើដោយប្រទេសអៀរឡង់ និង ប្រទេសនីហ្សេ មានខ្លឹមសារ ចង់ឲ្យអង្គការសហប្រជាជាតិ ចាត់បញ្ចូលបញ្ហាវិបត្តិអាកាសធាតុ ការកើនឡើងកំដៅផែនដី ថាគឺជាមូលហេតុមួយ បណ្តាលឲ្យមានការប្រឈមនឹងបញ្ហាសន្តិសុខ នៅទូទាំងពិភពលោក។ គម្រោងនេះ ក៏បានទាមទារផងដែរ ឲ្យអង្គការសហប្រជាជាតិ ត្រូវធ្វើរបាយការណ៍បូកសរុប ក្នុងរវាង២ឆ្នាំទៀត អំពីផលប៉ះពាល់ទាំងឡាយ បណ្តាលមកពីបម្រែបម្រួលអាកាសធាតុ ទៅលើស្ថិរភាព សន្តិភាព និងសន្តិសុខសកលលោក។
គម្រោងសេចក្តីសម្រេចចិត្តនេះ ត្រូវបានប្រទេសចំនួន១១៣ប្រទេសគាំទ្រ។ ក៏ប៉ុន្តែនៅពេលយកទៅបោះឆ្នោតសម្រេច នៅក្នុងក្រុមប្រឹក្សាសន្តិសុខ រុស្ស៊ីបានបោះឆ្នោត វេតូប្រឆាំង ខណៈប្រទេសទាំង១២ផ្សេងទៀត បានបោះឆ្នោតយល់ព្រម។ ចិនបានបោះឆ្នោតអនុបវាទ។ ចំណែកឥណ្ឌា ដែលគ្មានសិទ្ធិវេតូ បានបោះឆ្នោតបដិសេធ ដោយលើកហេតុផលថា វិបត្តិអាកាសធាតុ គឺវាពាក់ព័ន្ធតែទៅនឹង បញ្ហាអភិវឌ្ឍន៍សេដ្ឋកិច្ចតែប៉ុណ្ណោះ វាមិនពាក់ព័ន្ធទៅហ្នឹងរឿងសន្តិសុខទេ។
លោក អគ្គរដ្ឋទូតរុស្ស៊ីប្រចាំអង្គការសហប្រជាជាតិ បានលើកឡើងថា គេមិនអាចទទួលយកគម្រោងសេចក្តីសម្រេចចិត្តនេះបានទេ។ សម្រាប់រុស្ស៊ី ការភ្ជាប់ទំនាក់ទំនងហេតុនិងផល រវាងវិបត្តិអាកាសធាតុ ទៅនឹងបញ្ហាសន្តិសុខ អំពើភេរវកម្មជាដើម គឺវាជារឿងមិនត្រឹមត្រូវ ព្រោះវាបង្កើតជាការភ័ន្តច្រឡំ ព្រមទាំងបញ្ហាស្ទួន ប្រជែងជាមួយនឹងវេទិកាអន្តរជាតិផ្សេងទៀត ដែលជជែកគ្នាពីបញ្ហាអាកាសធាតុរួចហើយ។ លោកអះអាងថា ប្រទេសនីមួយៗ មានលក្ខណៈ និងស្ថានការណ៍ខុសៗគ្នា ដោយមិនអាចប្រមូលសរុប គិតជាស្វ័យប្រវត្តិថាបញ្ហាសន្តិសុខ សុទ្ធតែបណ្តាលមកពីវិបត្តិអាកាសធាតុនោះទេ។
យ៉ាងណាក៏ដោយ អគ្គរដ្ឋទូតអាមេរិក ប្រចាំអង្គការសហប្រជាជាតិ បានលើកឡើងថា សន្លឹកឆ្នោតវេតូរបស់រុស្ស៊ី គឺពុំមានភ្ជាប់ជាមួយហេតុផល ដែលអាចទទួលយកបានទេ។ អគ្គរដ្ឋទូតអៀរឡង់ និងនីហ្សេ បានសម្តែងការខកចិត្តជាខ្លាំង និងបានរិះគន់យ៉ាងធ្ងន់ៗ ទៅលើសិទ្ធិវេតូ នៅក្នុងក្របខណ្ឌក្រុមប្រឹក្សាសន្តិសុខ ថាជានីតិវិធីចាស់គំរិល កម្អែលនៃសង្គ្រាមលោកលើកទី២។ អៀរឡង់ និងនីហ្សេ បានអំពាវនាវ ថាត្រូវតែបោះបង់សិទ្ធិវេតូចោល ដើម្បីឲ្យអង្គការសហប្រជាជាតិ អាចធ្វើការដោយពេញលេញ ឆ្លើយតបទៅនឹងឧបសគ្គនានា ដែលកំពុងចោទឡើង ក្នុងពិភពលោក នាពេលបច្ចុប្បន្ន។
ដោយឡែក សម្រាប់បារាំង ដែលជាអ្នកគាំទ្រគម្រោងសេចក្តីសម្រេចចិត្តនេះដែរ បានអះអាងថា វាជារឿងដែលមិនអាចប្រកែកបានទេ ដែលថា បញ្ហាអសន្តិសុខ អស្ថិរភាព ជាផលវិបាកមួយបណ្តាលមកពីវិបត្តិអាកាសធាតុ។ គ្រោះរាំងស្ងួត មហន្តរាយធម្មជាតិ គ្រោះទុរភិក្ខ កង្វះទឹកស្អាត ជាដើម ទាំងអស់នេះ បានជួយជំរុញឲ្យក្រុមប្រដាប់អាវុធ កាន់តែមានកម្លាំងឥទ្ធិពល ទៅលើប្រជាពលរដ្ឋ ដែលងាយរងគ្រោះខ្លាំងបំផុត។ យ៉ាងណាមិញ លោកអគ្គលេខាធិការអង្គការសហប្រជាជាតិ ធ្លាប់បានលើកឡើងថា គ្រប់វិបត្តិទាំងអស់ វាមិនមែនសុទ្ធតែបណ្តាលមកពីវិបត្តិអាកាសធាតុមែន តែវិបត្តិអាកាសធាតុ វាជាកត្តាជំរុញ ពន្លឿន ពង្រីកធ្វើឲ្យបញ្ហាស្ថិរភាព ជម្លោះប្រដាប់អាវុធ សង្គ្រាម និងភេរវកម្ម កាន់តែធ្ងន់ធ្ងរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ