ប្រព័ន្ធជីវចម្រុះ៖ អ្នកវិទ្យាសាស្រ្តអះអាងថា ត្រឹមបន្ថែមទំហំតំបន់អភិរក្ស គឺមិនអាចទប់ស្កាត់ការរលាយផុតពូជបានឡើយ
ការពង្រីកទំហំផ្ទៃដីនៃតំបន់អភិរក្សធម្មជាតិ គឺវាអាចជួយការពារបរិស្ថានធម្មជាតិបានមែន ក៏ប៉ុន្តែ គឺវាមិនគ្រប់គ្រាន់នោះទេ ក្នុងការទប់ស្កាត់ការរលាយផុតពូជ នៃសត្វ និងរុក្ខជាតិមួយចំនួន។ នេះគឺជាការលើកឡើង របស់ក្រុមអ្នកវិទ្យាសាស្ត្រ ដែលកំពុងតែតរៀបចំតាក់តែងអត្ថបទសន្ធិសញ្ញាការពារប្រព័ន្ធជីវចម្រុះ ក្នុងក្របខណ្ឌអង្គការសហប្រជាជាតិ។ ក្រុមជំនាញនេះ បានអំពាវនាវឲ្យមានការផ្លាស់ប្តូរឲ្យបានស៊ីជំរៅ នៃសង្គមមនុស្សយើង ដើម្បីស្រោចស្រង់ប្រព័ន្ធជីវចម្រុះ ពីការរលាយសាបសូន្យ។
ចុះផ្សាយនៅថ្ងៃ៖
ស្តាប់ - ០២:២២
អ្នកជំនាញចំនួនជាង៥០នាក់ នៃក្រុមការងាររបស់អង្គការសហប្រជាជាតិ កំពុងតែព្យាយាមតាក់តែងខ្លឹមសារនៃសន្ធិសញ្ញាអន្តរជាតិ ដើម្បីការពារប្រព័ន្ធជីវចម្រុះ (CDB)។ គម្រោងសន្ធិសញ្ញានេះ នឹងត្រូវគេយកមកពិភាក្សាគ្នា នៅក្នុងឱកាសសន្និសីទ COP15 ស្តីពីប្រព័ន្ធជីវចម្រុះ ដែលនឹងត្រូវធ្វើឡើង នៅទីក្រុងគុនមីង ប្រទេសចិន នៅចុងខែមេសាខាងមុខ។
គួរបញ្ជាក់ថា ក្រុមប្រទេសប្រមាណ៧៥ប្រទេស បានរួមគ្នាបង្កើតសម្ព័ន្ធភាពមួយ ដើម្បីការពារយ៉ាងហោច ៣០% នៃផ្ទៃដី និងផ្ទៃសមុទ្រ ពីនេះរហូតដល់ឆ្នាំ២០៣០។ ជាកម្មវត្ថុ ដែលត្រូវបានក្រុមអ្នកជំនាញអង្គការសហប្រជាជាតិ បានកំណត់តាមផងដែរ នៅក្នុងគម្រោងអត្ថបទសន្ធិសញ្ញា ដែលគេកំពុងតាក់តែង។
តែយ៉ាងណា ក្រុមការងារជំនាញនេះ បានលើកឡើងថា ការពង្រីកទំហំផ្ទៃក្រឡា នៃតំបន់អភិរក្ស គឺវាជួយបានតែមួយផ្នែកតូចតែប៉ុណ្ណោះ ពោលគឺមិនអាចទប់ស្កាត់ការឈានទៅផុតពូជ នៃសត្វនិងរុក្ខជាតិមួយចំនួនបានទេ។ លោក Paul Leadley សមាជិកម្នាក់នៃក្រុមការងារជំនាញនេះ បានលើកឡើងថា ពិភពលោកយើង កំពុងតែស្ថិតនៅចំកណ្តាលវិបត្តិប្រព័ន្ធជីវចម្រុះ ព្រោះសត្វនិងរុក្ខជាតិ ប្រមាណ១លានពូជ កំពុងប្រឈមនឹងការផុតពូជសូន្យសុងតែម្តង។
ក្រុមអ្នកជំនាញបានចេញរបាយការណ៍មួយ នៅថ្ងៃពុធទី១៩មករា ដោយបានសង្កត់ធ្ងន់ពីភាពចាំបាច់ ក្នុងការកែប្រែឲ្យបានស៊ីជំរៅ វាយឲ្យចំគោលដៅ បំបាត់ឲ្យបាននូវការគំរាមកំហែងទាំងឡាយ ទៅលើស្ថិរភាព អាយុជីវិត នៃប្រព័ន្ធជីវចម្រុះ។ ពិភពលោកត្រូវតែរួមគ្នា ធ្វើការផ្លាស់ប្តូរឲ្យបានភ្លាមៗ នូវទម្លាប់អាក្រក់ទាំងឡាយ ដូចជាទម្លាប់ក្នុងការប្រើប្រាស់ដី ឬក៏សមុទ្រ ការរុករក ការប្រម៉ាញ់ ជ្រុលហួសប្រមាណ ការបំពុលបរិស្ថាន និងការបង្ហិនបង្ហោចធនធានធម្មជាតិជាដើម ។ល។ មនុស្សលោក ត្រូវតែផ្លាស់ប្តូរទម្លាប់រស់នៅ ទម្លាប់ប្រើប្រាស់ ដើម្បីកាត់បន្ថយការការកើនឡើងកំដៅផែនដី ហើយរដ្ឋាភិបាល ត្រូវតែបោះបង់ចោលគម្រោងវិនិយោគទាំងអស់ ដែលមានភាពចង្រៃ បំផ្លាញធម្មជាតិ។
របាយការណ៍ ក៏បានលើកឡើងផងដែរថា សកម្មភាពការងារទាំងអស់ ដើម្បីទ្រទ្រង់ប្រព័ន្ធជីវចម្រុះ គឺត្រូវតែធ្វើនៅក្នុងក្របខណ្ឌមូលដ្ឋាន បូកផ្សំជាមួយក្របខណ្ឌអន្តរជាតិ ដោយឆ្លងកាត់ការវាយតម្លៃត្រួតពិនិត្យ ឲ្យបានទៀងទាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ