សហគមន៍អន្តរជាតិ រួមគ្នាអំពាវនាវឲ្យប្រយុទ្ធប្រឆាំង នឹងវិបត្តិអសន្តិសុខស្បៀងអាហារ
វិបត្តិអសន្តិសុខស្បៀងអាហារ កាន់តែចោទខ្លាំងឡើងនៅទូទាំងពិភពលោក បណ្តាលមកពីហេតុផលជាច្រើន គួបផ្សំគ្នា ក្នុងនោះគឺមានដូចជា វិបត្តិអាកាសធាតុ ព្រមទាំងវិបត្តិសង្គ្រាមនៅអ៊ុយក្រែន ជាដើម។ នៅក្នុងឱកាសមហាសន្និបាទនៃអង្គការសហប្រជាជាតិ កាលពីថ្ងៃអង្គារទី២០កញ្ញា ក្រុមប្រទេសធំៗមួយចំនួន បានរួមគ្នាប្រកាសអំពាវនាវ ថាត្រូវតែប្រយុទ្ធប្រឆាំងនឹងវិបត្តិអសន្តិសុខស្បៀងអាហារ តាមរយៈវិធានការបន្ទាន់មួយចំនួន ដើម្បីជួយប្រទេសដែលប្រឈមខ្លាំង ដោយបញ្ហាខ្វះស្បៀងអាហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
សហរដ្ឋអាមេរិក សហភាពអឺរ៉ុប សហព័ន្ធអាហ្វ្រិក កូឡុំប៊ី នីហ្សេរីយ៉ា និងឥណ្ឌូណេស៊ី បានចេញលិខិតប្រកាសរួមគ្នា ដោយសន្យាថានឹងធ្វើការកិច្ចការរួមគ្នាជាបន្ទាន់បំផុត ដើម្បីជួយដល់ប្រជាជនរាប់សិបលាននាក់ ដែលកំពុងត្រូវការស្បៀងអាហារ។ ក្រុមប្រទេសទាំងនេះ បានសន្យា បន្ថែមប្រាក់ជំនួយដល់អង្គការមនុស្សធម៌ បង្កើនការផលិតជីកសិកម្ម និងមិនដាក់ឧបសគ្គរាំងខ្ទប់ ដល់ការនាំចេញផលិតផលកសិកម្ម។
លោក Pedro Sanchez នាយករដ្ឋមន្ត្រីអេស្ប៉ាញ បានលើកឡើងថា គ្មានសន្តិភាពទេ ប្រសិនបើមនុស្សគ្មានអ្វីបរិភោគ ហើយការប្រយុទ្ធនឹងវិបត្តិគ្មានស្បៀងអាហារនេះ ក៏មិនអាចបានជោគជ័យដែរ ប្រសិនបើគ្មានសន្តិភាព។ លោកបានបន្ថែមថា ការពិតគឺលោកពូទីន ដែលបានយកបញ្ហាវិបត្តិស្បៀងអាហារនេះ មកសង្កត់កពិភពលោក។ ដោយឡែក លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានសង្កត់ធ្ងន់ថា សហគមន៍អន្តរជាតិត្រូវតែគិតថា ការដោះស្រាយវិបត្តិអសន្តិសុខស្បៀងអាហារ គឺជារឿងអាសន្នបំផុត។
គួរកត់សំគាល់ថា ស្ថានភាពអសន្តិសុខស្បៀងអាហារ កំពុងតែចោទឡើងខ្លាំង ដោយសារមូលហេតុជាច្រើនគួបផ្សំគ្នា។ វិបត្តិកូវីដ១៩ ប្រមាណជិត៣ឆ្នាំមកនេះ បានរំខានដល់បណ្តាញចែកចាយនឹងដឹកជញ្ជូន។ វិបត្តិអាកាសធាតុ គ្រោះរាំងស្ងួត គ្រោះទឹកជំនន់ បានបំផ្លាញផលដំណាំធ្វើឲ្យទិន្នផលធ្លាក់ចុះ។ សង្គ្រាមនៅអ៊ុយក្រែន បានធ្វើឲ្យវិបត្តិនេះកាន់តែធ្ងន់ធ្ងរ ដោយសារតែអ៊ុយក្រែន គឺជាអ្នកនាំចេញទិន្នផលគ្រាប់ធញ្ញជាតិដ៏សំខាន់មួយ របស់ពិភពលោក មានដូចជាគ្រាប់ពោត ស្រូវសាឡី និងគ្រាប់ផ្កាឈូករត្នន៍។ ចំណែករុស្ស៊ីវិញ គឺជាអ្នកនាំចេញសារធាតុផ្សំ និងជីកសិកម្ម ដ៏ធំជាងគេ។
កាលពីថ្ងៃអង្គារ នៅអង្គសន្និបាតអង្គការសហប្រជាជាតិ លោកម៉ាក្រុង បានអះអាងថា បារាំងកំពុងតែជួយអ៊ុយក្រែន នាំចេញគ្រាប់ធញ្ញជាតិ ទៅកាន់ប្រទេសសូម៉ាលី ប្រទេសដែលស្ថិតនៅមាត់ជ្រោះគ្រោះទុរ្ភឹក្ស។ ចំណែកលោក ប្រមុខការបរទេសអាមេរិក បានអះអាងថា កិច្ចព្រមព្រៀងនាំចេញគ្រាប់ធញ្ញជាតិ ដែលរុស្ស៊ី និងអ៊ុយក្រែន បានស្រុះស្រួលគ្នាកាលពីខែកក្កដា គឺវាមានសារៈសំខាន់ណាស់ ព្រោះវាបានជួយរំដោះទិន្នផលស្បៀងរបស់អ៊ុយក្រែន នាំចេញទៅកាន់ប្រទេសក្រីក្រ ហើយសំដីរបស់លោកពូទីន ដែលថាគ្រាប់ធញ្ញជាតិអ៊ុយក្រែន ត្រូវគេបង្វែរយកទៅប្រទេសអ្នកមាននោះ គឺជាការនិយាយភូតកុហកទាំងស្រុង។
គួរបញ្ជាក់ដែរថា យោងតាមអង្គការ Conflict Observatory ទំហំស្តុកគ្រាប់ធញ្ញជាតិរបស់អ៊ុយក្រែន ចំនួនយ៉ាងហោច១៥% ត្រូវបានបំផ្លាញ ឬបាត់បង់ គិតចាប់ពីពេលផ្ទុះសង្គ្រាមមក។ លោក Alvaro Lario ប្រធានមូលនិធិអន្តរជាតិដើម្បីការអភិវឌ្ឍន៍កសិកម្ម បានថ្លែងការបារម្ភថា បញ្ហាខ្វះជីកសិកម្មគឺជារឿងធំ ហើយនៅឆ្នាំក្រោយ វិបត្តិខ្វះស្បៀងនឹងកាន់តែធ្ងន់ធ្ងរ ព្រោះទិន្នផលកសិកម្មអ៊ុយក្រែន កាន់តែធ្លាក់ចុះ។ នៅក្នុងរបាយការណ៍អង្គការសហប្រជាជាតិកាលពីខែកក្កដា ក្នុងឆ្នាំ២០២១មនុស្សចន្លោះពី៧០២ ទៅ ៨២៨លាននាក់ បានជួបបញ្ហាខ្វះស្បៀងអាហារ។ លោកអង់តូនីញ៉ូ ហ្គូតទែរស៍ បានសង្កត់ធ្ងន់ថា ប្រសិនបើទីផ្សារជីកសិកម្ម នៅតែគ្មានស្ថិរភាពក្នុងឆ្នាំ២០២២នេះ នោះឆ្នាំ២០២៣ មនុស្សនឹងគ្មានអ្វីបរិភោគឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ