GMAC៖កូដកម្មឈប់សម្រាកពីថ្ងៃទី១៧ ដល់២២ មេសា មិនត្រូវតាមអង្គច្បាប់
សមាគមរោងចក្រកាត់ដេរនៅកម្ពុជា GMAC បានលើកអង្គច្បាប់ថា ការស្នាក់នៅផ្ទះ មិនមកធ្វើការ មិនមែនជាកូដកម្មនោះទេ ហើយសហជីពក៏គ្មានសិទ្ធិស្នើសុំការឈប់សំរាកប្រចាំឆ្នាំជំនួសកម្មករម្នាក់ៗបានដែរ។ ការលើកបញ្ហានេះបានធ្វើឡើងបន្ទាប់ពីក្រុមសហជីពមួយចំនួនបានបើកយុទ្ធនាការអំពាវនាវឲ្យកម្មករធ្វើកូដកម្មឈប់សម្រាកនៅផ្ទះ ក្រោយបុណ្យចូលឆ្នាំខ្មែរ។ ប៉ុន្តែតំណាងសហជីពបញ្ជាក់ថានេះជាសិទ្ធិរបស់កម្មករ ហើយថាពួកគេនៅតែបន្តធ្វើកូដកម្មដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នាយកដ្ឋានផ្នែកច្បាប់ និងការងារនៃសមាគមរោងចក្រកាត់ដេរកម្ពុជា GMAC បានចេញលិខិតមួយនៅថ្ងៃទី ៩មេសា បញ្ជាក់ថា កូដកម្មគឺជាការឈប់ធ្វើការងារ ដែលកម្មករនិយោជិតត្រូវស្ថិតនៅក្នុងបរិវេណរោងចក្រ សហគ្រាសគ្រឹះស្ថាន ដើម្បីធ្វើការតវ៉ាឬទាមទារអ្វីមួយពីនិយោជក ពោលគឺកូដកម្មមិនមែនជាការនាំគ្នាដង្ហែ ជាក្រុម ជាពួក ជាក្បួននៅទីកន្លែងផ្សេងៗនោះទេ។ នេះបើយោងតាមមាត្រា ៣១៨ នៃច្បាប់ស្តីពីការងារ។ ហើយយោងតាមប្រកាសលេខ៣១៣ សហជីពក៏មិនអាចស្នើសុំការឈប់សម្រាកជំនួសកម្មករនិយោជិតបានដែរ។ ដូច្នេះ កម្មករដែលមិនមកធ្វើការ អាចទទួលការដាក់ទណ្ឌកម្មពិន័យតាមច្បាប់និងតាមបទបញ្ជាផ្ទៃក្នុងរបស់ក្រុមហ៊ុន។
ប៉ុន្តែជាការឆ្លើយតប លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីខៅឌូ បានបញ្ជាក់ប្រាប់វិទ្យុបារាំងនៅព្រឹកថ្ងៃនេះថា តាមមាត្រា១៧០ នៃច្បាប់ស្តីពីការងារ កម្មករមានសិទ្ធិស្នើសុំច្បាប់ឈប់សម្រាកប្រចាំឆ្នាំពីការងារ។ ប៉ុន្តែ កន្លងមកកម្មករ កម្មការនីកាត់ដេរកម្ពុជា មិនដែលបានឈប់សម្រាកក្នុងឱកាស ច្បាប់ឈប់សម្រាកប្រចាំឆ្នាំរបស់ខ្លួននោះទេ។ ហើយនៅពេលនេះ តំណាងសហជីពកម្មករបានស្នើសុំមកខាងសហជីព ដើម្បីធ្វើការស្នើសុំជំនួសពួកគាត់។
លោកអាត់ ធន់បានបន្តថា ខាងសហជីពស្នើសុំសម្រាប់តែកម្មករណា ដែលគាត់ចង់បានតែប៉ុណ្ណោះ តែបើមានអ្នកមិនចង់ឈប់នោះក៏បានដែរ។ សហជីពក៏បានដាក់លិខិតស្នើសុំជូនដល់និយោជករួចរាល់ផងដែរ ហើយរហូតមកដល់ពេលនេះ ក៏មាននិយោជករបស់ក្រុមហ៊ុនមួយចំនួនបានយល់ព្រម ហើយអនុញ្ញាតឲ្យកម្មករយកឱកាសនេះ សម្រាប់ឈប់សម្រាកប្រចាំឆ្នាំផងដែរ។
គួរបញ្ជាក់ថា សហព័ន្ធសហជីពចំនួន ៨ និងអង្គការសង្គមស៊ីវិលមួយចំនួនបានប្រកាសឲ្យកម្មករនិយោជិតកាត់ដេរ ធ្វើកូដកម្មនៅតាមផ្ទះរៀងៗខ្លួន ដោយមិនទៅធ្វើការចាប់ពីថ្ងៃទី ១៧ ដល់ ២២មេសា ដើម្បីជាការដាក់សម្ពាធដល់រដ្ឋាភិបាលក្នុងការទាមទារតម្លើងប្រាក់ឈ្នួល ១៦០ដុល្លារ ក្នុងមួយខែ នឹងសុំឲ្យដោះលែងអ្នកជាប់ឃុំទាំង ២១នាក់ ដែលត្រូវបានចាប់ខ្លួន អំឡុងពេលមានបាតុកម្មហិង្សានៅសួនឧស្សាហកម្មកាណាឌីយ៉ា កាលពីដើមឆ្នាំ ២០១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ