ទស្សនកិច្ចជាប្រវត្តិសាស្រ្តរបស់លោកស្រីគ្លីនតុន(Clinton) នៅប្រទេសឡាវ
ក្រោយពីបានបំពេញទស្សនកិច្ចនៅប្រទេសវៀតណាមរួចមក នៅថ្ងៃពុធទី១១កក្កដានេះ លោកស្រីរដ្ឋមន្រ្តីក្រសួងការបរទេសអាមេរិកាំងហ៊ីឡារី គ្លីនតុន(Hillary Clinton) បានទៅប្រទេសឡាវ។ ទស្សនកិច្ចផ្លូវការនៅទីក្រុងវាងចាន(Vientiane)នេះរបស់លោកស្រីគ្លីនតុនមានរយៈពេលខ្លី ដ្បិតលោកស្រីប្រមុខការទូតអាមេរិកាំងត្រូវប្រញាប់ធ្វើដំណើរទៅកាន់ប្រទេសកម្ពុជា ដើម្បីចូលរួមក្នុងកិច្ចប្រជុំអាស៊ានបូក ថ្នាក់រដ្ឋមន្ត្រីការបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
គឺជាលើកទីមួយហើយតាំងពីឡាវក្លាយជាកុម្មុយនិស្តនៅឆ្នាំ១៩៧៥មក ដែលអ្នកដឹកនាំអាមេរិកាំងជាន់ខ្ពស់មួយរូបទៅបំពេញទស្សនកិច្ចនៅប្រទេសអាស៊ីអាគ្នេយ៍មួយនេះ។ ទោះបីជាទំនាក់ទំនងមិនដែលត្រូវបានផ្តាច់ក្នុងរយៈពេលជិត៤០ឆ្នាំចុងក្រោយនេះក្តី ក៏សហរដ្ឋអាមេរិកនិងឡាវមើលមុខគ្នាមិនចំដែរ ដោយហេតុតែវ៉ាស៊ីនតោន(Washington) គាំទ្រពួកជនជាតិភាគតិចម៉ុង(Hmong) ដែលជាសត្រូវសួពូជរបស់វាងចាន។
ក្នុងឱកាសទស្សនកិច្ចជាប្រវត្តិសាស្រ្តនេះ លោកស្រីគ្លីនតុន បានជួបប្រាស្រ័យជាមួយលោកនាយករដ្ឋមន្ត្រីឡាវ ថុងស៊ីង ថាម៉ាវង្ស(Thongsing Thammavong) និងលោករដ្ឋមន្ត្រីការបរទេសឡាវ ថុងឡួន ស៊ីស៊ូលីត(Thongloun Sisoulith)។
នៅក្នុងចំណោមប្រធានរឿងដែលត្រូវបានលើកយកមកពិភាក្សា ឃើញមានជាអាទិ៍បញ្ហាដែលនៅសេសសល់ពីសង្គ្រាមវៀតណាម ដូចយ៉ាងអ្វីដែលគេហៅថា «Agent orange» ឬសារធាតិពុលដែលកងទ័ពអាមេរិកាំងបានប្រើប្រាស់ដើម្បីប្រឆាំងនឹងកងកម្លាំងកុម្មុយនិស្តឡាវ និងគ្រាប់បែកមិនទាន់ផ្ទុះជាច្រើនដែលនៅបង្កប់ក្នុងទឹកដីនៃប្រទេសឡាវ។
ក្រៅពីនេះ លោកស្រីរដ្ឋមន្ត្រីការបរទេសអាមេរិកាំងក៏បានលើកឡើងផងដែរ នូវគម្រោងទំនប់វារិអគ្គិសនីទន្លេមេគង្គរបស់រដ្ឋាភិបាលឡាវ គម្រោងដែលបាននិងកំពុងបន្តធ្វើឱ្យវៀតណាមនិងកម្ពុជាដែលជាប្រទេសជិតខាងមិនសប្បាយចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ