អ្នកបំរើតាមផ្ទះជាតិឥណ្ឌូណេស៊ី ធ្វើបាតុកម្ម បរិហារទាសភាពបែបថ្មីនៅហុងកុង
បុគ្គលិកអ្នកបំរើតាមផ្ទះរាប់ពាន់នាក់ បាននាំគ្នាធ្វើបាតុកម្ម ក្នុងថ្ងៃអាទិត្យនេះ នៅតាមផ្លូវក្រុងហុងកុង ដើម្បីទាមទារឱ្យតុលាការជួយរកយុត្តិធម៌ដល់អ្នកបំរើស្រីឥណ្ឌូណេស៊ីមា្នក់ ដែលត្រូវម្ចាស់ផ្ទះធ្វើបាបជាទម្ងន់។ អ្នកបំរើ ដែលជាញឹកញយតែងរងការធ្វើបាប និងទារុណកម្មពីសំណាក់ម្ចាស់ផ្ទះ តែមិនត្រូវបានការពារដោយច្បាប់ទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
មានគ្នាប្រមាណ៥ពាន់នាក់ បណ្តាអ្នកបំរើតាមផ្ទះជាតិឥណ្ឌូណេស៊ី គាំទ្រដោយក្រុមអ្នកការពារសិទ្ធិមនុស្ស បាននាំគ្នាចុះថ្នល់ ហែញត្តិទៅប្រគល់ឱ្យមេប៉ូលិសហុងកុងផ្ទាល់ ដើម្បីជំរុញឱ្យមានការបើកអង្កេតត្រឹមត្រូវលើករណីធ្វើទារុណកម្មលើអ្នកបំរើ និងទាមទារឱ្យរដ្ឋាភិបាលហុងកុងចាត់វិធានការទប់ស្កាត់ការធ្វើបាបបុគ្គលិកក្នុងផ្ទះ។
ដើមហេតុនៃការផ្ទុះកំហឹងនេះ បណ្តាលមកពីយុវតីឥណ្ឌូណេស៊ីម្នាក់ អាយុ២២ឆ្នាំ Erwiana Sulistyaningsih បានមកធ្វើការងារតាមផ្ទះនៅ ហុងកុង កាលពីខែឧសភា ២០១៣ ទើបបញ្ជូនត្រលប់ទៅស្រុកកំណើតវិញកាលពីថ្ងៃទី១០ មករា ដើម្បីទទួលការព្យាបាល បន្ទាប់ពីបានរងគ្រោះទារុណកម្ម និងធ្វើបាបពីសំណាក់ម្ចាស់ផ្ទះ ជាថៅកែជនជាតិហុងកុង អស់រយៈពេលជិត៨ខែ។
ហុងកុង អតីតដែនដីអាណានិគមអង់គ្លេស ត្រូវការកម្លាំងពលកម្មបំរើការងារតាមផ្ទះប្រមាណជាងបីសែននាក់ ភាគច្រើនជាជនជាតិហ្វីលីពីន និងឥណ្ឌូណេស៊ី។ ថ្វីបើជាទូទៅ ហុងកុង មានការការពារសិទ្ធិបុគ្គលិកតាមផ្ទះខ្លាំងជាងបណ្តាប្រទេសអាស៊ីភាគខាងត្បូងមែន ប៉ុន្តែការរិះគន់មានកាន់តែច្រើនឡើងៗ ចំពោះករណីម្ចាស់ផ្ទះធ្វើបាបអ្នកបំរើ និងចំពោះភាពស្ពឹកស្រពន់របស់អាជ្ញាធរ ដែលមិនអើពើស្តាប់បណ្តឹង ឬបើកសំណុំរឿងរំលោភបំពានរបស់ថៅកែមកលើបុគ្គលិកទេ។
ជាក់ស្តែងក្នុងករណីនាង Erwiana Sulistyaningsih ប៉ូលិសហុងកុង បានចាត់ទុកជាបឋម ត្រឹមប្រព្រឹត្តបទល្មើស ដែលមានលក្ខណៈធ្ងន់ធ្ងរតិចតួចប៉ុណ្ណោះ មុននឹងប្តូរទៅការអង្កេតឧក្រិដ្ឋវិញ។ ក្រុមអ្នកអង្កេតនឹងធ្វើដំណើរទៅឥណ្ឌូណេស៊ី ដើម្បីសាកសួរជនរងគ្រោះ។ ប៉ុន្តែសំណុំរឿងអាចវិវឌ្ឍន៍ផ្អើលពិភពលោកនៅពេលនេះ ក៏ព្រោះតែក្រុមអ្នកបំរើ និងសារព័ត៌មាន បានបកអាក្រាតនិងដាក់សម្ពាធខ្លាំងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ