មជ្ឈមណ្ឌលសិទ្ធិមនុស្សកម្ពុជាបើកយុទ្ធនាការ “ប្រតិទិនយុត្តិធម៌” សម្រាប់លោកម៉ម សូណង់ដូ
មជ្ឈមណ្ឌលសិទ្ធិមនុស្សកម្ពុជា របស់លោក អ៊ូ វីរៈ បានប្រកាសសម្ពោធយុទ្ធនាការ "ប្រតិទិនយុត្តិធម៌ លោកម៉ម សូណង់ដូ" ដែលនឹងត្រូវធ្វើឡើង នាព្រឹកថ្ងៃទី១៥ ខែមករា សប្តាហ៍ក្រោយ។ ក្នុងយុទ្ធនាការរាប់ថ្ងៃ ជាប់ពន្ធនាគារសម្រាប់លោក ម៉ម សូណង់ដូ គម្រប់ ៦ ខែនោះ ក៏នឹងមានការប្រកួតរចនាប័ណ្ណប៉ុស្តាល់ សម្រាប់ឧទ្ទិសជាពិសេសដល់លោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ដែលត្រូវបានតុលាការផ្តន្ទាទោស ដាក់ពន្ធនាគារ ២០ ឆ្នាំ ក្នុងរឿងជម្លោះដីធ្លី នៅខេត្តក្រចេះ។
ចុះផ្សាយនៅថ្ងៃ៖
ស្តាប់ - ០២:៤០
មជ្ឈមណ្ឌលសិទ្ធិមនុស្សកម្ពុជា បានប្រកាសនៅថ្ងៃទី១០ ខែមករា ឆ្នាំ២០១៣ ថា នៅថ្ងៃទី១៥ ខែមករា ឆ្នាំ២០១៣ មជ្ឈមណ្ឌលសិទ្ធិមនុស្សកម្ពុជា នឹងប្រកាសសម្ពោធយុទ្ធនាការ "ប្រតិទិនយុត្តិធម៌ លោក ម៉ម សូណង់ដូ" និងការប្រកួតរចនាប័ណ្ណប៉ុស្តាល់ ដើម្បីជាកិច្ចគម្រប់រយៈពេល ប្រាំមួយខែ ឬរយៈពេល ១៨៦ ថ្ងៃ ចាប់ពីថ្ងៃ ដែលលោក ម៉ម សូណង់ដូ ត្រូវបានចាប់ខ្លួន និងឃុំខ្លួន ដោយសារការផ្តន្ទាទោស។
តាមសេចក្តីប្រកាស កម្មវិធីពិសេសនោះ ក៏ដើម្បីដាក់សម្ពាធបន្ថែមលើអាជ្ញាធរ ដើម្បីឲ្យមានការដោះលែងលោក ម៉ម សូណង់ដូ ផងដែរ។
លោក ម៉ម សូណង់ដូ ត្រូវបានចាប់ខ្លួន កាលពីថ្ងៃទី១៥ ខែកក្កដា ឆ្នាំ២០១២ និងចោទប្រកាន់ថា លោកបានញុះញង់ឲ្យមានការបង្កើតតំបន់អបគមន៍ ក្នុងភូមិប្រម៉ា ខេត្តក្រចេះ។ រឿងក្តីនោះ កាលពីថ្ងៃទី១តុលា ត្រូវបានចៅក្រមសាលាដំបូងរាជធានីភ្នំពេញ សម្រេចផ្តន្ទាទោស ដាក់ពន្ធនាគារ ២០ ឆ្នាំ។
សេចក្តីប្រកាសព័ត៌មានដដែល ក៏បានលើកឡើងថា យុទ្ធនាការប្រតិទិនយុត្តិធម៌ លោក ម៉ម សូណង់ដូ មានគោលបំណង ទាក់ទាញនូវចំណាប់អារម្មណ៍ ទៅលើចំនួនថ្ងៃដែលលោក ម៉ម សូណង់ដូ ត្រូវជាប់ពន្ធនាគារដោយអយុត្តិធម៌។ មជ្ឈមណ្ឌលសិទ្ធិមនុស្សកម្ពុជា នឹងដាក់បង្ហាញប្រតិទិនយុត្តិធម៌នោះ នៅមុខការិយាល័យមជ្ឈមណ្ឌលសិទ្ធិមនុស្សកម្ពុជា ហើយរាប់ចំនួនថ្ងៃ ដែលលោកត្រូវបានចាប់ខ្លួន និងអំពាវនាវឲ្យបណ្តាអង្គការសង្គមស៊ីវិល និងសាធារណជន ចូលរួមក្នុងយុទ្ធនាការនេះផងដែរ។
រួមជាមួយនឹងយុទ្ធនាការនេះ មជ្ឈមណ្ឌលសិទ្ធិមនុស្សកម្ពុជា នឹងប្រកាសអំពីការប្រកួតរចនាម៉ូដ កាតប៉ុស្តាល់ ដែលនឹងបើកចំហជាសាធារណៈ។ នៅថ្ងៃទី៣១ ខែមករា ឆ្នាំ២០១៣ មជ្ឈមណ្ឌលសិទ្ធិមនុស្សកម្ពុជា នឹងជ្រើសរើសកាត ដែលស្អាតបំផុតចំនួនបីសន្លឹក ហើយបោះពុម្ពជាកាតប៉ុស្តាល់ និងចែកជូនទៅសាធារណជន ដែលគាំទ្រលោក ម៉ម សូណង់ដូ។
សេចក្តីប្រកាស បានបង្ហាញថា "សាធារណជនអាចសរសេរជាសារលើកទឹកចិត្តទៅកាន់ លោក ម៉ម សូណង់ដូ នៅលើកាតប៉ុស្តាល់ រួចផ្ញើមកកាន់មជ្ឈមណ្ឌលសិទ្ធិមនុស្សកម្ពុជាវិញ ដែលមជ្ឈមណ្ឌលសិទ្ធិមនុស្សកម្ពុជា នឹងអានសារទាំងនេះ ក្នុងកម្មវិធីវិទ្យុ ដែលជាម៉ោងផ្សព្វផ្សាយ របស់មជ្ឈមណ្ឌលសិទ្ធិមនុស្សកម្ពុជា ហើយកាតទាំងនេះ នឹងផ្ញើជូនលោក ម៉ម សូណង់ដូ នៅក្នុងពន្ធនាគារព្រៃស"។
មានអាយុ ៧១ ឆ្នាំ លោក ម៉ម សូណង់ដូ ដែលជាប់ឃុំនៅពន្ធនាគារព្រៃស សព្វថ្ងៃកំពុងឈឺធ្មេញថ្គាម ពិសារអ្វីមិនកើតឡើយ។ លោក ម៉ម សូណង់ដូ ខ្មែរសញ្ជាតិបារាំង នឹងកោសក់ កាន់ទុក្ខ នៅថ្ងៃ៤កុម្ភៈ នៅពេលថ្វាយព្រះភ្លើង បូជាព្រះបរមសព សម្តេចព្រះ នរោត្តម សីហនុ។ នេះបើតាមអ្នកស្រី ហួន ផាណារី អគ្គលេខាធិការរង សមាគមអ្នកប្រជាធិបតេយ្យ របស់លោក ម៉ម សូណង់ដូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ