លោកហ៊ុន សែនស្នើឱ្យអន្តរជាតិយោគយល់ពីវិធានការក្តៅដើម្បីបង្ការភាពវឹកវរ
ប្រមុខរដ្ឋាភិបាលលោកនាយករដ្ឋមន្ត្រីហ៊ុន សែននៅថ្ងៃទី១៤ មេសា បានថ្លែងសន្ទរកថាបើកព្រឹត្តិការណ៍អង្គរសង្ក្រាន្តឆ្នាំ២០១។ ឆ្នាំ២០១៦ដែលសង្គមនយោបាយកម្ពុជាបានកើនឡើងកំដៅសារជាថ្មីដោយសារតែ ការចាប់តំណាងរាស្ត្រគណបក្សប្រឆាំងដែលបានធ្វើឱ្យមានការរិះគន់។ ទន្ទឹមនឹងនោះ លោកនាយករដ្ឋមន្ត្រីបានស្នើសហគមន៍អន្តរជាតិយោគយល់ពីវិធានការរបស់រដ្ឋអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
“សង្ឃឹមថាប្រជាជនកម្ពុជាទាំងអស់និងរួបជាមួយខ្ញុំដើម្បីថែរក្សាសុខសន្តិភាពរបស់យើង ហើយបញ្ហាសន្តិភាព និងស្ថេរភាព សង្ឃឹមថាមិត្តភក្តិ បរទេសនឹងមានការយោគយល់ដល់កម្ពុជា។ យោគយល់ដល់វិធានការទាំងឡាយដែលរាជរដ្ឋាភិបាលបានចាត់វិធានការដើម្បីទប់ស្កាត់នូវចលាចលណាមួយក្នុងសង្គមកម្ពុជា” នេះគឺជាប្រសាសន៍លោកនាយករដ្ឋមន្ត្រី ដែលបានថ្លែងក្រោយការចាប់ខ្លួនតំណាងរាស្ត្រគណបក្សសង្គ្រោះជាតិដែលជាបក្សប្រឆាំងធំជាងគេនៅកម្ពុជា ខណៈដែលមានការរិះគន់លើចំណាត់ការក្តៅនេះ។
ជាការរិះគន់ទៅលើទិដ្ឋភាពច្បាប់ព្រោះថាលោកអុំសំអានដែលជាតំណាងរាស្ត្រ ត្រូវចាប់ខ្លួនទាំងរដ្ឋសភាមិនបានដកភ័យឯកសិទ្ធ។ សម្រាប់អ្នកវិភាគមួយចំនួននេះ គឺជាយុទ្ធនាការដើម្បីបង្ក្រាបអ្នកប្រឆាំងនៅកម្ពុជា។ បន្ថែមពីលើនេះតាមរយៈបណ្តាញសារព័ត៌មាននៅក្នុងស្រុក ស្ថានទូតអាមេរិក បានសុំការពន្យល់ពីរដ្ឋាភិបាលកម្ពុជាចំពោះការចាប់ខ្លួនលោកអ៊ុំ សំអានដែលជាជនជាតិខ្មែរសញ្ជាតិអាមេរិកនេះផងដែរ។ ប៉ុន្តែរដ្ឋាភិបាលបានចាត់ទុកវិធានការទាំងឡាយថាជាយន្តការដើម្បីការពារសន្តិភាពនៅកម្ពុជា និងដើម្បីបង្កភាពវឹកវរណាមួយដែលជាចេតនានយោបាយនៅពីខាងក្រោយ។
សម្រាប់លោកនាយករដ្ឋមន្ត្រី ខ្មែរមានវប្បធម៌អត់អោន និងអធ្យាស្រ័យគ្នា ហើយនៅពេលដែលមានបញ្ហាអស្ថេរភាពមួយណាកើតឡើងនោះ ពលរដ្ឋកម្ពុជាទេដែលជាអ្នករងទុក្ខវេទនា។ សូមបញ្ជាក់ថា លោកអ៊ុំ សំអានត្រូវបានចាប់ខ្លួន និងចោទប្រកាន់ពីបទបង្កភាពវឹកវរដល់សង្គម។ ការចាប់ខ្លួននេះ គឺបន្ទាប់ពីតំណាងរាស្ត្រដែលសកម្មរឿងព្រំដែនរូបនេះបានបង្ហោះផែនទីនិងអត្ថាធិប្បាយពីការបាត់បងទឹកដីកម្ពុជាទៅឱ្យវៀតណាម ដែលរដ្ឋាភិបាលបានអះអាងថាជាការបំភ្លៃ និងជាការធ្វើនយោបាយប្រជាភិថុទ។
ដោយឡែកគណបក្សសង្គ្រោះជាតិវិញ មិនបានឆ្លើយតបចំពោះការលើកឡើងរបស់លោកនាយករដ្ឋមន្ត្រីនោះទេ គណបក្សប្រឆាំងដែលធំជាងគេមួយនេះ បានអះអាងថា គណបក្សមានគោលជំហរ សាមគ្គី ឯកភាពជាតិ ហើយនេះគឺជាអ្វីដែលអ្នកនយោបាយត្រូវតែគោរព។ សម្រាប់គណបក្សប្រឆាំង សន្តិភាពមិនមែនមានតែសន្តិភាពគ្មានសង្គ្រាមនោះទេ សន្តិភាពគឺត្រូវតែមាននៅក្នុងផ្លូវចិត្ត។ ជាសន្តិភាព និងយុត្តិធម៌ ដែលកើតចេញពីការគោរពច្បាប់។
យ៉ាងណាក៏ដោយ ការអំពាវនាវពីប្រមុខរដ្ឋាភិបាលកម្ពុជាចំពោះវិធានការក្តៅនេះ ត្រូវបានអ្នកវិភាគបានអះអាងថារដ្ឋាភិបាលទីក្រុងភ្នំពេញអាចទទួលរងគំនាបណាមួយពីសហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ