លោកនាយករដ្ឋមន្ត្រី ហ៊ុន សែន បញ្ជាក់ជាថ្មីថាមិនចុះចេញពីតំណែង
លោកនាយករដ្ឋមន្ត្រី ហ៊ុន សែន បានប្រកាសជាសាធារណៈម្តងទៀតនៅថ្ងៃអង្គារនេះថានឹងមិនចុះចេញពីតំណែងតាមការទាមទាររបស់បក្សប្រឆាំងទេ។ ផ្ទុយទៅវិញ លោកនឹងនៅតែបន្តធ្វើជានាយករដ្ឋមន្ត្រីសម្រាប់អាណត្តិ៥ឆ្នាំខាងមុខនេះ ប្រកបដោយការទទួលខុសត្រូវចំពោះមុខម្ចាស់ឆ្នោត។ នេះជាលើកទី២ហើយ ចាប់តាំងពីក្រោយការបោះឆ្នោតដែលប្រមុខរដ្ឋាភិបាលគណបក្សប្រជាជនបានបញ្ជាក់ជំហរមិនចុះចេញពីតំណែង ទៅតាមការទាមទាររបស់គណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ឆ្លៀតឱកាសពេលសម្ពោធស្ពាននៅស្រុកកោះធំ ខេត្តកណ្តាល នៅព្រឹកថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានប្រកាសជាថ្មីទៀតថា លោកនឹងមិនចុះចេញពីតំណែងទៅតាមការស្រែកទាមទាររបស់គណបក្សសង្គ្រោះជាតិទេ។
ការបញ្ជាក់ពីជំហរមិនព្រមចុះចេញពីតំណែងនៅពេលនេះបានធ្វើឡើងនៅចំពោះមុខប្រជាពលរដ្ឋជាច្រើននៅក្នុងស្រុកកោះធំ និងជាពិសេសនៅចំពោះមុខនាយករដ្ឋមន្ត្រីវៀតណាមលោក ង្វៀន តាន់យ៉ុង ដែលចូលរួមបើកការដ្ឋានគម្រោងសាងសង់ស្ពានជ្រៃធំ-ឡុងប៊ិញ ក្នុងស្រុកកោះធំ ខេត្តកណ្តាល ជាប់ព្រំដែនវៀតណាម។
លោកនាយករដ្ឋមន្ត្រី ហ៊ុន សែន បានថ្លែងអំណរគុណប្រជាពលរដ្ឋដែលបានបោះឆ្នោត គាំទ្រឲ្យលោកបន្តជាប់ជានាយករដ្ឋមន្ត្រី ក្នុងរយៈពេល ៥ ឆ្នាំ ទៅមុខទៀត។ ប្រមុខរដ្ឋាភិបាលដែលដឹកនាំគណបក្សប្រជាជនបានប្រកាសថា នឹងបន្តតំណែងជានាយករដ្ឋមន្ត្រីប្រកបដោយការទទួលខុសត្រូវ។ លោកអះអាងថា បានឡើងកាន់តំណែងស្របច្បាប់តាមរយៈការបោះឆ្នោត និងត្រូវបានព្រះមហាក្សត្រតែងតាំងបន្ទាប់ពីទទួលបានសេចក្តីទុកចិត្តពីរដ្ឋសភា។
នេះជាលើកទី២ហើយ ដែលនាយករដ្ឋមន្ត្រីកាន់តំណែងរយៈពេល២៨ឆ្នាំរូបនេះបានប្រកាសជំហរមិនព្រមចុះចេញពីតំណែងដឹកនាំកំពូលរបស់ប្រទេស ទោះបីជាគណបក្សប្រឆាំង និងអ្នកគាំទ្ររបស់បក្សប្រឆាំង បានទាមទារឲ្យលោកចុះចេញពីតំណែងក៏ដោយ។ កាលពីចុងខែធ្នូកន្លងទៅ លោកនាយករដ្ឋមន្ត្រីក៏ធ្លាប់បានប្រកាសនៅឯមន្ទីររដ្ឋសភាថាមិនព្រមចុះចេញពីមុខតំណែងដែរដោយលោកអះអាងថា លោកគ្មានកំហុសអ្វីទេ។
ប៉ុន្តែ ក្នុងមហាបាតុកម្មជាបន្តបន្ទាប់ គណបក្សសង្គ្រោះជាតិបានចោទប្រកាន់គណបក្សប្រជាជនកម្ពុជាថា បានលួចបន្លំសន្លឹកឆ្នោត និងបានហៅលោកនាយករដ្ឋមន្ត្រីថាឡើងកាន់តំណែងដោយមិនស្របច្បាប់។ គណបក្សសង្គ្រោះជាតិនិងអ្នកគាំទ្ររបស់គណបក្សនេះ ក៏បានស្រែកទាមទារឲ្យលោកនាយករដ្ឋមន្ត្រីហ៊ុន សែន ចុះចេញពីតំណែង។ ប៉ុន្តែ ម្តងហើយម្តងទៀត ជាចម្លើយតបវិញ លោកនាយករដ្ឋមន្ត្រី ហ៊ុន សែន នៅតែបញ្ជាក់ថា លោកឡើងតាមរដ្ឋធម្មនុញ្ញ ហើយបើចុះវិញក៏តាមរដ្ឋធម្មនុញ្ញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ