អ្នកការពារព្រៃឈើសំនូមពរឲ្យមានការដេញថ្លៃជាសាធារណៈលើដីសម្បទាន
ប្រជាសហគមន៍អ្នកការពារព្រៃឈើ និងជនជាតិដើមភាគតិច បានស្នើសុំឲ្យរដ្ឋាភិបាលកម្ពុជាដេញថ្លៃជាសាធារណៈ នូវគំរោងផ្តល់ដីសម្បទានទៅឲ្យក្រុមហ៊ុន វិនិយោគផ្សេងៗ។ ការសំនូមពរបែបនេះ បានធ្វើឡើង ដោយសារតែកន្លងមករដ្ឋាភិបាលមិនបានដាក់ដេញថ្លៃនូវគំរោងផ្តល់ដីសម្បទានជាសាធារណៈនោះទេ។ ចំណែកឯព្រៃឈើមួយភាគធំត្រូវបានបំផ្លាញយ៉ាងអនាធិបតេយ្យ ក្រោមហេតុផល នៃការផ្តល់ដីសម្បទានដោយមានអាជ្ញាប័ណ្ឌពីរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៥៩
ប្រជាពលរដ្ឋតំណាងសហគម៍មកពីតំបន់ ដែលរងការប៉ះពាល់ដោយសារការកាប់ព្រៃឈើខុសច្បាប់ បានបង្ហាញនូវក្តីកង្វល់ និងសំនូមពររបស់ខ្លួនទៅកាន់រដ្ឋាភិបាលតាមរយៈសន្និសីទកាសែតមួយនៅព្រឹកនេះក្នុងរាជធានីភ្នំពេញ។ ជាសន្និសិទកាសែត ស្តីពីក្តីកង្វល់របស់ប្រជាសហគមន៍ ទៅលើការកាប់ឈើខុសច្បាប់ និងការបំផ្លាញធនធានធម្មជាតិនៅកម្ពុជា ហើយមានអ្នកចូលរួមប្រមាណ១០០នាក់ ដែលពួកគាត់ភាគច្រើនជាជនជាតិភាគតិច តំណាងសហគមន៍ និងអ្នកកាសែតផងដែរ។
លោក ស្វាយ ភឿង ជាតំណាងសហគមន៍ព្រៃឡង់ បានថ្លៃងថាការកាប់ព្រៃឈើកន្លងមកនេះ មានការកើនឡើងជាលំដាប់ ដោយសារតែក្រុមហ៊ុន ដែលទទួលបានអាជ្ញាប័ណ្ឌលើដីសម្បទានបានកាប់ព្រៃឈើដោយខុសច្បាប់។ លោកបានសំនូមពរឲ្យរដ្ឋាភិបាលបញ្ឃប់ការផ្តល់អាជ្ញាប័ណ្ឌដល់ក្រុម ហ៊ុន ដែលចង់បានដីសម្បទាន ហើយរដ្ឋត្រូវតែបញ្ឈប់ ឬដកហូតនូវអាជ្ញាបណ័្ឌពីក្រុមហ៊ុន ដែលកាប់ព្រៃឈើខុសច្បាប់កន្លងមក និងជាពិសេសរដ្ឋគួរតែដាក់ឲ្យសាធារណៈបានដឹកពីការដេញថ្លៃដីសម្បទានទាំងនោះ។
អ្នកស្រី មុំ សុគីន តំណាងសហគមន៍ខែត្រក្រចេះ បានសំនូមពរដល់រដ្ឋាភិបាលថា ឲ្យមានការស្រាវជ្រាវឡើងវិញឲ្យបានច្បាស់លាស់លើអាជ្ញាប័ណ្ឌកន្លងមក ថាតើរដ្ឋពិតជាផ្តល់ដីសម្បទាន ឬព្រៃសម្បទាន។
លោកកែម ឡី អ្នកស្រាវជ្រាវបញ្ហាសង្គមថ្លែងក្នុងសន្និសិទកាសែតដដែលនោះថាគំ រោងដេញថ្លៃផ្តល់ដីសម្បទានដល់ក្រុមហ៊ុន ផ្សេងរបស់រដ្ឋាភិបាលមិនត្រូវបានដេញថ្លៃជាសាធារណៈនោះទេ ហើយនេះគឺជារឿងដែលខុសនឹងច្បាប់ផងដែរ។ លោកបានកត់សម្គាល់ថា ក្នុងពេលបច្ចុប្បន្ននេះ ព្រៃឈើក្នុងប្រទេសកម្ពុជាមានប្រហែល៣៨ភាគរយតែប៉ុណ្ណោះ ហើយនៅឆ្នាំ២០២០ ខាងមុខនេះ ព្រៃឈើរបស់កម្ពុជានឹងនៅសល់ប្រហែលពី១៧ភាគរយ ទៅ២០ភាគរយ។
សូមបញ្ជាក់ថាក្រៅពីស្នើសុំឲ្យរដ្ឋាភិបាលដាក់ដេញថ្លៃជាសាធារណៈនូវគំរោងផ្តល់ដីសម្បទាន ក្រុមសង្គមស៊ីវិលក៏បានស្នើសុំឲ្យរដ្ឋាភិបាលកម្ពុជាពង្រឹងឡើងវិញនូវការអនុវត្តន៍ច្បាប់ការពារព្រៃឈើ លុបចេញនូវអាជ្ញាប័ណ្ឌរបស់ក្រុមហ៊ុនមួយចំនួន យកចិត្តទុកដាក់លើជនជាតិភាគតិច ពន្លឿនការទទួលស្គាល់ព្រៃសហគមន៍ និងត្រួតពិនិត្យអាជ្ញាប័ណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ