ចិនចំអកជប៉ុនដែលបានផ្តល់ឈ្មោះអោយបណ្តាកោះជម្លោះ នៅសមុទ្រចិន
នៅថ្ងៃអាទិត្យនេះ ចិនបានចំអកជប៉ុន ពីការដែលជប៉ុនបានសម្រេចដាក់ឈ្មោះអោយដល់បណ្តាកោះនានា នៅសមុទ្រចិនខាងកើត។ សារព័ត៌មានរដ្ឋចិនបានចាត់ទុកទង្វើជប៉ុន ថាជាឆាកកំប្លែង និងបានរំលឹកជប៉ុនឡើងវិញថា បណ្តាកោះទាំងនោះមានឈ្មោះរបស់ខ្លួនជាភាសាចិនយូរណាស់មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
កាលពីថ្ងៃសុក្រ ជប៉ុនបានផ្តល់ឈ្មោះដល់កូនកោះប្រមាណ១៦០ នៅសមុទ្រចិនខាងកើត ក្នុងនោះ មានកោះទាំង៥ នៃប្រជុំកោះសេនកាគូផងដែរ។ កោះសេនកាគូ ដែលចិនហៅថា កោះទៀវយូនោះ ស្ថិតក្រោមការគ្រប់គ្រងរបស់ជប៉ុន តែចិនបានដណ្តើមបូរភាពប្រជុំកោះនេះ។ ថ្ងៃអាទិត្យនេះ ក្រុងប៉េកាំងបានប្រតិកម្មនឹងក្រុងតូក្យូដែលបានសម្រេចដាក់ឈ្មោះអោយបណ្តាកោះ នៅសមុទ្រចិន ដោយបានលើកឡើងថា ទង្វើនេះជាឆាកកំប្លែង និងមិនបានផ្លាស់ប្តូរអ្វីទាក់ទងនឹងបូរភាពទឹកដីចិន ចំពោះប្រជុំកោះទៀវយូ និងកោះផ្សេងៗទៀតដែលជារបស់ចិនទេ។
សារព័ត៌មានរដ្ឋចិន បានលើកឡើងថា ជប៉ុនបានដាក់ឈ្មោះដល់កោះទាំងនេះ ដើម្បី បង្ហាញថា កោះទាំងនេះជាបូរភាពជាតិខ្លួន ប៉ុន្តែត្រូវតែរំលឹកដល់ជប៉ុនថា កោះទាំងនេះ សុទ្ធតែមានឈ្មោះខ្លួន ជាភាសាចិនរួចមកហើយ។ ក្រសួងការបរទេសចិនបានបរិហារសកម្មភាពជប៉ុនក្នុងការដាក់ឈ្មោះកោះទាំងនេះ ថាជាទង្វើខុសច្បាប់ និងគ្មានសុពលភាពអ្វីឡើយ។ យោងតាមក្រុងប៉េកាំង កោះទៀវយូ ដែលជប៉ុនហៅថា កោះសេនកាគូនោះ មានវត្តមានជាលាយលក្ខណ៍អក្សរដំបូងបំផុតនៅដើមសតវត្សទី១៥ ដូច្នេះមានន័យថា ចិនបានរកឃើញកោះទាំងនេះ យូរលង់មកហើយ ហើយក៏បានដាក់ឈ្មោះកោះទាំងនេះ យូរយារមកហើយដែរ។
ទំនាក់ទំនងរវាងចិននិងជប៉ុនបានធ្លាក់ដុនដាបខ្លាំង ក្នុងរយៈពេល២ឆ្នាំចុងក្រោយនេះ ដោយសារតែជម្លោះបូរភាពដែនទឹក នៅសមុទ្រចិន ពិសេសចាប់ពីពេលជប៉ុនបានទិញយកកោះចំនួន៣ នៅប្រជុំកោះសេនកាគូ ដាក់ជាកម្មសិទ្ធិជាតិជប៉ុន កាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ