អាជ្ញាធរភ្នំពេញសម្ពោធស្ពាន២ទៀតនៅកោះពេជ្រ ដើម្បីការពារកុំឲ្យមានករណីរត់ជាន់គ្នាស្លាប់ ក្នុងពិធីបុណ្យអុំទូក
ដោយមានបទពិសោធន៍ដ៏ជូរចត់ ក្នុងឧបទ្ទវហេតុរត់ជាន់គ្នា បណ្តាលឲ្យ មនុស្សចំនួន៣៥៣នាក់ស្លាប់ នៅកណ្តាលរាជធានីភ្នំពេញ លើស្ពានពេជ្រ ក្នុងពិធីបុណ្យអុំទូកឆ្នាំមុននោះ អាជ្ញាធរនិងតំណាងក្រុមហ៊ុនអភិវឌ្ឍន៍តំបន់កោះពេជ្រ បានដាក់សម្ពោធស្ពាន២បន្ថែមទៀត ឲ្យប្រើប្រាស់ជាផ្លូវការនៅព្រឹកថ្ងៃចន្ទ ទី ៧ វិច្ឆិកានេះ ដើម្បីសម្រួលចរាចរណ៍ និងការពារកុំឲ្យមានឧបទ្ទវហេតុអាក្រក់ជាថ្មីម្តងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
អាជ្ញាធររាជធានីភ្នំពេញ នៅតែមានអារម្មណ៍ភ័យខ្លាច ថាឧបទ្ទវហេតុរត់ជាន់គ្នា ស្លាប់នៅលើស្ពានពេជ្រ អាចនឹងកើតឡើងជាថ្មីម្តងទៀត ក្នុងពិធីបុណ្យអុំទូក ដែលមានមនុស្សម្នាច្រើនកុះករមកកំសាន្តនៅភ្នំពេញ។
អភិបាលរាជធានីភ្នំពេញ លោក កែប ជុតិមា និងលោក ពុង ឃាវសែ ប្រធាន ក្រុមហ៊ុនអភិវឌ្ឍន៍តំបន់កោះពេជ្រ សម្រេចសម្ពោធស្ពាន២បន្ថែមទៀត ឲ្យប្រើប្រាស់ ជាផ្លូវការ នៅព្រឹកថ្ងៃចន្ទនេះ មុនពិធីបុណ្យអុំទូក២ថ្ងៃមកដល់ បើទោះបីជា ស្ពាននោះមិនទាន់សង់រួចស្ថាពរក្តី។
ស្ពានថ្មនាគភ្លោះ ដែលមានរចនាបទខ្មែរបុរាណ មានទទឹង១២,៥ម៉ែត្រ និងបណ្តោយ១០០ម៉ែត្រ ធ្វើស្របនឹងស្ពានពេជ្រ តភ្ជាប់ពីតំបន់កោះពេជ្រ មកសួនច្បារ ហ៊ុន សែន ឆ្ពោះត្រង់ទៅវិមានឯករាជ្យ ។ ស្ពាននាគមួយគូនេះត្រូវការចំណាយ ថវិកាជាង២លានដុល្លារអាមេរិក ប៉ុន្តែ វាមិនទាន់មានរូបចម្លាក់នាគដូចឈ្មោះ នៅឡើយ ទេដោយត្រូវប្រញិបប្រញាប់ដាក់ឲ្យប្រើប្រាស់មុនការកំណត់ ដើម្បីការពារកុំឲ្យមាន ការរត់ជាន់គ្នាស្លាប់ជាថ្មីម្តងទៀត និងដើម្បីសម្រួលចរាចរណ៍ក្នុងរាជធានី ភ្នំពេញ។
ពិធីបុណ្យអុំទូកនឹងចាប់ផ្តើម ពីថ្ងៃទី៩ដល់ថ្ងៃទី១១ ខែវិច្ឆិកា ហើយថ្ងៃបុណ្យ ឯករាជ្យជាតិ ក៏ធ្វើចំថ្ងៃបុណ្យអុំទូកផងដែរ តែអាជ្ញាធរមិនរំពឹងថា នឹង មានមនុស្សម្នាពីតាមបណ្តាខេត្តនានា មកកំសាន្តកុះករដូចរាល់ឆ្នាំនោះឡើយ ដោយសាររដ្ឋបានកាត់ពិធីប្រណាំងទូកចេញពីពិធីបុណ្យនេះ។ ការប្រគំតន្រ្តីរបស់ស្ថានីយទូរទស្សន៍ នានា និងស្តង់លក់ដូរទំនិញជាច្រើន ដែលរាល់ឆ្នាំត្រៀមទុកសម្រាប់បុណ្យអុំទូក នឹងអវត្តមាន នៅក្នុងឆ្នាំនេះ។
ទោះជាយ៉ាងណា សមត្ថកិច្ចនៅតែត្រៀមកម្លាំងជាង៥០០០នាក់ ចែកចេញជា ៧៧គោលដៅ ដើម្បីជួយសម្រួលចរាចរណ៍ក្នុងពិធីបុណ្យអុំទូក និងពិធីបុណ្យឯករាជ្យ ជាតិដដែល។ ចំណុចសំខាន់ដែលសមត្ថកិច្ចយកចិត្តទុកដាក់ខ្ពស់បំផុតនោះ គឺតំបន់កោះពេជ្រដែលមានការប្រគំតន្រ្តី និងមណ្ឌលកំសាន្តDream Land ដែលអាចមានមនុស្ស ជាច្រើនប្រជ្រៀតគ្នា ចូលកំសាន្ត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ