ឥណ្ឌូនេស៊ីប្រហារជីវិតអ្នកទោស៨នាក់ ក្រោមសំឡេងថ្កោលទោសពីសហគមន៍អន្ដរជាតិ
ឥណ្ឌូនេស៊ី កាត់ទោសប្រហារជីវិតអ្នកទោសបរទេសចំនួន៧នាក់ និងអ្នកទោសជនជាតិឥណ្ឌូនេស៊ីម្នាក់ ដែលជាប់ពាក់ព័ន្ធនឹងការរត់ពន្ធគ្រឿងញៀនខុសច្បាប់។ ការប្រហារជីវិតនេះ ធ្វើឡើងដោយបាញ់សម្លាប់ នៅរំលងអាធ្រាតយប់ថ្ងៃអង្គារ ឈានចូលថ្ងៃពុធនេះ នៅពន្ធនាគារលើកោះ Nasakambangan ភាគកណ្ដាលប្រទេសឥណ្ឌូនេស៊ី។ គួរជម្រាបជូនថា ការកាត់ទោសនេះ ទទួលរងការថ្កោលទោសយ៉ាងខ្លាំងពីសហគមន៍អន្ដរជាតិ ជាពិសេសអូស្ត្រាលី និងបារាំង ព្រោះក្នុងចំណោមអ្នកទោសបរទេសទាំង៧នាក់ដែលត្រូវប្រហារជីវិតនោះ ក៏មានផងដែរ អ្នកទោសជនជាតិអូស្ត្រាលីចំនួន២នាក់ និងអ្នកទោសបារាំងម្នាក់។
ចុះផ្សាយនៅថ្ងៃ៖
ឥណ្ឌូនេស៊ី មានគម្រោងប្រហារជីវិតអ្នកទោសចំនួន៩នាក់ ដែលជាប់ពាក់ព័ន្ធនឹងការរត់ពន្ធគ្រឿងញៀនខុសច្បាប់ នៅពេលរំលងអាធ្រាតយប់ថ្ងៃអង្គារឈានចូលព្រឹកថ្ងៃពុធនេះ។ ប៉ុន្តែនៅម៉ោង១១យប់ ម៉ោងក្នុងតំបន់ អ្នកទោសស្រីហ្វីលីពីនឈ្មោះ Mary Jane Veloso ត្រូវបានលើកលែងទោសប្រហារជីវិត ក្រោយពីជនសង្ស័យម្នាក់បានប្រគល់ខ្លួនឲ្យអាជ្ញាធរហ្វីលីពីន ដោយបានសារភាពថា ខ្លួនជាអ្នកប្រើល្បិចបោកប្រាស់ Mary Jane Veloso ឲ្យយកគ្រឿងញៀនចូលទៅប្រទេសឥណ្ឌូនេស៊ី។
នៅទីបំផុត មានអ្នកទោសតែ៨នាក់ប៉ុណ្ណោះ ដែលត្រូវបានបាញ់សម្លាប់ចោល នៅពន្ធនាគារលើកោះ Nasakambangan ភាគកណ្ដាលប្រទេសឥណ្ឌូនេស៊ី ដោយក្នុងនោះមានអ្នកទោសបរទេសចំនួន៧នាក់ និងអ្នកទោសជនជាតិឥណ្ឌូនេស៊ីម្នាក់។
ការកាត់ទោសនេះ ទទួលរងការថ្កោលទោសយ៉ាងខ្លាំងពីសហគមន៍អន្ដរជាតិ ជាពិសេសអូស្ត្រាលី និងបារាំង ព្រោះក្នុងចំណោមអ្នកទោសបរទេសទាំង៧នាក់ដែលត្រូវប្រហារជីវិតនោះ ក៏មានផងដែរ អ្នកទោសជនជាតិអូស្ត្រាលីចំនួន២នាក់ និងអ្នកទោសបារាំងម្នាក់។
ភ្លាមៗក្រោយកាត់កាត់ទោសនេះ ប្រទេសអូស្ត្រាលីបានកោះហៅឯកអគ្គរដ្ឋទូតរបស់ខ្លួន ឲ្យចាកចេញពីប្រទេសឥណ្ឌូនេស៊ីជាបន្ទាន់ និងបានហៅការកាត់ទោសនេះថា ជាអំពើឃោឃៅ និងមិនចាំបាច់។ ទំនាក់ទំនងរវាងទីក្រុងកង់បេរ៉ានិងចាកាតាប្រែជាល្អក់កករយ៉ាងដូច្នេះ គឺជាលទ្ធផលទទួលបានពីទង្វើដែលឥណ្ឌូនេស៊ីបានធ្វើនៅក្នុងរយៈពេលប៉ុន្មានម៉ោងចុងក្រោយនេះ។ ប្រទេសបារាំងឯណោះវិញ ក៏បានថ្កោលទោសការប្រហារជីវិតនេះដែរ។ តាមរយៈអ្នកនាំពាក្យក្រសួងការបរទេស រដ្ឋាភិបាលបារាំងបានរំលឹកឡើងវិញនូវការប្រឆាំងជំទាស់របស់ខ្លួន ចំពោះការកាត់ទោសប្រហារជីវិតនៅក្នុងករណីទាំងអស់ និងគ្រប់កាលៈទេសៈទាំងអស់។
គួរជម្រាបជូនដែរថា ក្រៅពីអ្នកទោសជនជាតិអូស្ត្រាលី២នាក់ និងអ្នកទោសបារាំងម្នាក់ អ្នកទោសបរទេសដែលត្រូវបានប្រហារជីវិតដោយឥណ្ឌូនេស៊ី កាលពីយប់រំលងអាធ្រាតថ្ងៃអង្គារ ឈានចូលព្រឹកថ្ងៃពុធនេះ ក៏មានផងដែរ ជនជាតិប្រេស៊ីលម្នាក់ និងជនជាតិនីហ្សេរីយ៉ា៣នាក់ និងម្នាក់ទៀតមកពីទ្វីបអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ