អ៊ីរ៉ង់ចាប់នាវាដឹកប្រេងមួយគ្រឿង ដោយចោទពីបទរត់ពន្ធប្រេង
ឆ្មាំសមុទ្រអ៊ីរ៉ង់ បានជូនដំណឹងនៅថ្ងៃព្រហស្បតិ៍ ទី១៨កក្កដានេះ អំពីការឃាត់នាវាដឹកប្រេង «បរទេស» មួយគ្រឿង និងក្រុមនាវិកនៅក្នុងនាវានោះ។ ដោយមិនបញ្ចេញឲ្យដឹងពីអត្តសញ្ញាណ អ៊ីរ៉ង់បានចោទនាវាដឹកប្រេងមួយគ្រឿងនោះ ថាបានរត់ពន្ធប្រេងឥន្ធនៈពីអ៊ីរ៉ង់ ទៅកាន់ប្រទេសគោលដៅដែលនៅឆ្ងាយ។
ចុះផ្សាយនៅថ្ងៃ៖ កែប្រែថ្ងៃទី៖
គ្មានព័ត៌មានលម្អិតអំពីអត្តសញ្ញាណនាវាដឹកប្រេងដែលអ៊ីរ៉ង់ឃាត់ទុកនេះឡើយ។ អ៊ីរ៉ង់ គ្រាន់តែឲ្យដឹងថា នាវាដឹកប្រេងនេះ មានសមត្ថភាពផ្ទុកប្រេងចំនួន២លានបារ៉ែល និងមាននាវិកចំនួន១២នាក់។ បើតាមការឲ្យដឹងពីអ៊ីរ៉ង់ ការឃាត់នាវាបរទេសមួយគ្រឿងនេះ ធ្វើឡើងនៅភាគខាងត្បូងកោះ Larak របស់អ៊ីរ៉ង់ ក្នុងពេលកំពុងដឹកប្រេងឆៅឆ្ពោះទៅកាន់ប្រទេសគោលដៅមួយ។
បើទោះបីជាអ៊ីរ៉ង់មិនបានបញ្ចេញឲ្យដឹងពីអត្តសញ្ញាណរបស់នាវាដែលខ្លួនឃាត់នោះក៏ដោយ ក៏គេដឹងថា មាននាវាបំពាក់ទង់ជាតិប៉ាណាម៉ាមួយគ្រឿង បានឆ្លងចូលដែនទឹករបស់អ៊ីរ៉ង់ កាលពីថ្ងៃអាទិត្យ ទី១៤កក្កដា មុននឹងបាត់សញ្ញាពីរ៉ាដានៅថ្ងៃដដែលនោះ។ បើតាមការឲ្យដឹងពីវេបសាយតាមដាននាវាដឹកប្រេង TankerTrackers នាវាបំពាក់ទង់ជាតិប៉ាណាម៉ា ប្រភេទ Riah នេះ ត្រូវបានប្រើប្រាស់នៅច្រកសមុទ្រអកមូស ដើម្បីបំពេញប្រេងបន្ថែមឲ្យនាវាផ្សេងទៀត មិនមែនរត់ពន្ធប្រេងដូចការចោទប្រកាន់របស់អ៊ីរ៉ង់ទេ។
សូមជម្រាបថា នេះគឺជាលើកទីមួយហើយ ដែលអ៊ីរ៉ង់ប្រកាសទទួលស្គាល់ជាផ្លូវការ ពីការឃាត់នាវាបរទេស។ ចាប់តាំងពីស្ថានការណ៍នៅច្រកសមុទ្រអកមូសជួបភាពតានតឹងមក បណ្ដាប្រទេសមួយចំនួន បានចោទប្រកាន់អ៊ីរ៉ង់ថា ចេះតែរករឿងចាប់នាវាដឹកប្រេងរបស់ពួកគេ ប៉ុន្តែអ៊ីរ៉ង់មិនដែលទទួលស្គាល់ទេ។
កាលពីសប្ដាហ៍មុន សារព័ត៌មានអង់គ្លេសបានរាយការណ៍ថា នាវាយោធាអ៊ីរ៉ង់ចំនួន៥គ្រឿង បានសាកល្បងបង្អាក់ដំណើររបស់នាវាដឹកប្រេងអង់គ្លេស នៅច្រកអកមូស។ អ៊ីរ៉ង់ បានច្រានចោលសេចក្ដីរាយការណ៍នេះ ដោយអះអាងថា នាវាល្បាតរបស់អ៊ីរ៉ង់ គ្មានបានជួបនាវាបរទេសណាមួយទេ នៅក្នុងអំឡុងពេលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ