ចិននិងជប៉ុនចរចាគ្នាបន្ធូរបន្ថយភាពតានតឹងជុំវិញជម្លោះព្រំដែន
ចិន និងជប៉ុនបានជួបចរចាគ្នា នៅថ្ងៃអង្គារនេះ ដើម្បីស្វែងរកដំណោះស្រាយបន្ធូរបន្ថយភាពតានតឹង ដែលកើតចេញពីជម្លោះដណ្តើមប្រជុំកោះ Senkaku (Diaoyu តាមភាសាចិន)។ ប្រទេសទាំងពីរសុទ្ធតែយល់ថា ជម្លោះការទូតនឹងធ្វើឲ្យខូចប្រយោជន៍ទាំងសងខាង។ ក៏ប៉ុន្តែ ក្នុងពេលជាមួយគ្នា សង្រ្គាមពាក្យសម្តី នៅតែបន្តកើតមានឡើងរវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
ការចរចា នៅថ្ងៃអង្គារនេះ ត្រូវបានធ្វើឡើង នៅក្នុងទីក្រុងប៉េកាំង រវាងអតីតប្រធានរដ្ឋសភាជប៉ុន ដែលជាអ្នកស្និទ្ធនឹងនាយករដ្ឋមន្រ្តីជប៉ុន និងរដ្ឋមន្រ្តីការបរទេសចិន លោក យ៉ាង ជៀឈី (Yang Jiechi)។ នេះបើយោងតាមរបាយការណ៍របស់ទីភ្នាក់ងារព័ត៌មានជប៉ុន ឈ្មោះ Jiji Press ។ អ្នកនាំពាក្យក្រសួងការបរទេសចិនបានបញ្ជាក់ថា ជំនួបនេះពិតជាកើតមានមែន ក៏ប៉ុន្តែ វាជាជំនួបក្រៅផ្លូវការប៉ុណ្ណោះ។
យោងតាមទីភ្នាក់ងារព័ត៌មាន Jiji Press ចិន និងជប៉ុនបានព្រមព្រៀងគ្នាថា លោក ណាអូតូ កាន់ (Naoto Kan) នាយករដ្ឋមន្រ្តីជប៉ុន និងលោក វេន ជៀប៉ាវ (Wen Jiabao) នាយករដ្ឋមន្រ្តីចិន គួរតែជួបពិភាក្សាគ្នា នៅក្នុងអំឡុងពេលធ្វើជំនួបកំពូលអាស៊ាន នៅវៀតណាម នាចុងខែតុលាខាងមុខនេះ ដើម្បីស្វែងរកដំណោះស្រាយបញ្ចប់ជម្លោះ កុំឲ្យខូចខាតដល់ប្រយោជន៍ទាំងសងខាង។
អ្នកនាំពាក្យក្រសួងការបរទេសចិន បានទទួលស្គាល់ថា ទំនាក់ទំនងល្អរវាងចិន និងជប៉ុន ពិតជាមានសារៈប្រយោជន៍ដល់ប្រទេសទាំងពីរមែន ក៏ប៉ុន្តែ បានរិះគន់រដ្ឋមន្រ្តីក្រសួងការបរទេសជប៉ុនថាបានប្រើពាក្យមិនសមរម្យមកលើចិន។
គួររំឭកថា កាលពីថ្ងៃចន្ទ ម្សិលមិញ រដ្ឋមន្រ្តីការបរទេសជប៉ុនបានរិះគន់ចិនថាបានរឹតត្បឹតការនាំចេញធនធានធម្មជាតិកម្រមួយចំនួនទៅឲ្យជប៉ុន ដោយបានហៅវិធានការនេះថា មានលក្ខណៈជ្រុលហួសហេតុ ធ្វើឡើងទៅតាមចិត្តខឹង ខ្វះការពិចារណា។
អ្នកនាំពាក្យក្រសួងការបរទេសចិនបានថ្លែងប្រាប់អ្នកសារព័ត៌មាន នៅថ្ងៃអង្គារនេះថា លោកមានការភ្ញាក់ផ្អើលយ៉ាងខ្លាំង ដែលរដ្ឋមន្រ្តីក្រសួងការបរទេសរបស់ប្រទេសមួយអាចប្រើពាក្យសម្តីមិនសមរម្យបែបនេះ ហើយថា ការប្រើពាក្យសម្តីបែបនេះ គឺជាឧបសគ្គក្នុងការស្តារទំនាក់ទំនងចិន-ជប៉ុន។
គួររំឭកឡើងវិញថា ជម្លោះការទូតរវាងចិន និងជប៉ុនបានផ្ទុះឡើង កាលពីដើមខែកញ្ញា ក្រោយពីជប៉ុនបានចាប់ខ្លួនអ្នកបើកបរនាវាចិនម្នាក់ ដោយចោទថាបានឆ្លងដែនខុសច្បាប់ ចូលទៅក្នុងប្រជុំកោះ Senkaku ។ ប្រជុំកោះនេះស្ថិតក្រោមការគ្រប់គ្រងរបស់ជប៉ុន ក៏ប៉ុន្តែ ចិនកំពុងតែទាមទារ។
កាលពីថ្ងៃសៅរ៍ ថ្ងៃអាទិត្យ និងថ្ងៃចន្ទ កន្លងទៅនេះ ជនជាតិចិនក្មេងៗរាប់ពាន់នាក់ បាននាំគ្នាធ្វើបាតុកម្ម នៅតាមបណ្តាក្រុងមួយចំនួន ក្នុងប្រទេសចិន ដោយបានវាយបំផ្លាញក្រុមហ៊ុនជប៉ុនមួយចំនួនផង។ រដ្ឋាភិបាលជប៉ុនបានសម្តែងការព្រួយបារម្ភអំពីសុវត្ថិភាពរបស់ជនជាតិជប៉ុន ដែលកំពុងរស់នៅលើទឹកដីចិន ហើយបានជំរុញឲ្យអាជ្ញាធរចិន ធ្វើយ៉ាងណារក្សាសុវត្ថិភាពជនជាតិជប៉ុនឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ