លោកស្ហ៊ីនហ្សូ អាបេទៅមជ្ឈិមបូព៌ាដើម្បីព្យាយាមលក់បច្ចេកវិទ្យានុយក្លេអ៊ែរស៊ីវិល
លោកនាយករដ្ឋមន្រ្តីជប៉ុន ស្ហ៊ីនហ្សូ អាបេ ចាប់ផ្តើមដំណើរទស្សនកិច្ចរយៈពេល ៦ថ្ងៃ ទៅកាន់តំបន់មជ្ឈិមបូព៌ា នៅថ្ងៃសៅរ៍នេះ។ បើតាមអ្នកនាំពាក្យរដ្ឋាភិបាលជប៉ុន នៅក្នុងដំណើរទស្សនកិច្ចនេះ លោកស្ហ៊ីនហ្សូ អាបេ នឹងព្យាយាមទាក់ទាញឲ្យគេទិញបច្ចេកវិទ្យានុយក្លេអ៊ែរស៊ីវិលរបស់ជប៉ុន ក្នុងពេលដែលជប៉ុនខ្លួនឯងកំពុងប្រឈមមុខនឹងបញ្ហានុយក្លេអ៊ែរធ្ងន់ធ្ងរ នៅហ៊្វូគូស្ហ៊ីម៉ា។
ចុះផ្សាយនៅថ្ងៃ៖
ស្តាប់ - ០១:៣៩
នៅក្នុងដំណើរទស្សនកិច្ចរយៈពេល ៦ថ្ងៃនេះ លោកស្ហ៊ីនហ្សូ អាបេ នឹងធ្វើដំណើរទៅកាន់ប្រទេសបារ៉ែន កូវ៉ែត ជីប៊ូទី និងកាតារ ហើយបញ្ហានុយក្លេអ៊ែរ គឺជារបៀបវារៈសំខាន់ជាងគេ នៅក្នុងដំណើរទស្សនកិច្ចនេះ។
ចាប់តាំងពីឡើងកាន់តំណែងជានាយករដ្ឋមន្រ្តីជប៉ុនមក លោក ស្ហ៊ីនហ្សូ អាបេ ដែលជាអ្នកមានគំនិតគាំទ្រកម្មវិធីនុយក្លេអ៊ែរស៊ីវិល បានព្យាយាមដុតដៃដុតជើង នាំចេញបច្ចេកវិទ្យានុយក្លេអ៊ែរជប៉ុនទៅក្រៅប្រទេស បើទោះបីជាជប៉ុនខ្លួនឯង បានជួបនឹងគ្រោះថ្នាក់នុយក្លេអ៊ែរយ៉ាងធ្ងន់ធ្ងរ នៅហ៊្វូគូស្ហ៊ីម៉ា ក៏ដោយ។
កាលពីខែឧសភាកន្លងទៅថ្មីៗនេះ លោកស្ហ៊ីនហ្សូ អាបេ បានធ្វើដំណើរទៅកាន់ប្រទេសតួកគី ហើយបានបញ្ចុះបញ្ចូលរដ្ឋាភិបាលតួកគីឲ្យចុះកិច្ចសន្យាប្រគល់សិទ្ធិឲ្យក្រុមហ៊ុនជប៉ុន និងក្រុមហ៊ុនបារាំង ជាអ្នកសាងសង់រោងចក្រអគ្គិសនីនុយក្លេអ៊ែរចំនួន ៤កន្លែង។ មុនចុះកិច្ចសន្យាជាមួយតួកគី ជប៉ុនក៏បានចុះកិច្ចព្រមព្រៀងសហប្រតិបត្តិការក្នុងវិស័យនុយក្លេអ៊ែរស៊ីវិលជាមួយប្រទេសអារ៉ាប់រួមផងដែរ។
ដំណើរទស្សនកិច្ចជាថ្មីរបស់លោកស្ហ៊ីនហ្សូ អាបេ ទៅកាន់តំបន់មជ្ឈិមបូព៌ា ដើម្បីផ្សព្វផ្សាយពាណិជ្ជកម្មពីបច្ចេកវិទ្យានុយក្លេអ៊ែរជប៉ុនពេលនេះ ធ្វើឡើង នៅចំពេលដែលជប៉ុនខ្លួនឯង កំពុងប្រឈមមុខកាន់តែខ្លាំងនឹងបញ្ហាលេចធ្លាយធាតុវិទ្យុសកម្ម ពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា ហូរចូលទៅក្នុងទឹកសមុទ្រ។ ក៏ប៉ុន្តែ បើតាមការអះអាងរបស់មន្រ្តីក្រសួងការបរទេសជប៉ុន បញ្ហានៅហ៊្វូគូស្ហ៊ីម៉ានេះទំនងជានឹងមិនធ្វើឲ្យប៉ះពាល់ដល់ទស្សនកិច្ចរបស់លោកស្ហ៊ីនហ្សូ អាបេនេះទេ។
គួររំឭកឡើងវិញថា ចាប់តាំងពីមានគ្រោះថ្នាក់នុយក្លេអ៊ែរនៅហ៊្វូគូស្ហ៊ីម៉ាមក ជប៉ុនបានផ្អាកដំណើរការស្ទើរតែទាំងស្រុង នូវមជ្ឈមណ្ឌលនុយក្លេអ៊ែរទាំង ៥០កន្លែងរបស់ខ្លួន។ ការជាប់គាំងនៃទីផ្សារនុយក្លេអ៊ែរក្នុងស្រុកបានជំរុញឲ្យក្រុមហ៊ុនជប៉ុន ងាកទៅផ្តោតលើការនាំចេញបច្ចេកវិទ្យានុយក្លេអ៊ែរទៅក្រៅប្រទេសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ