ជប៉ុនតវ៉ា នៅចំពោះមុខទង្វើប្រថុយប្រថានពេករបស់ទ័ពចិន
ជាថ្មីម្តងទៀត នៅព្រឹកថ្ងៃអង្គារទី៨មីនានេះ រដ្ឋាភិបាលនៃប្រទេសជប៉ុនបានតវ៉ាជាផ្លូវការសូមឲ្យកងទ័ពចិនបញ្ឈប់ ជាបន្ទាន់រាល់ទង្វើដែលទីក្រុងតូក្យូវាយតម្លៃថា ប្រកបទៅដោយ«គ្រោះថ្នាក់ជាទីបំផុត»។ ការប្រកាសតវ៉ាបែបនេះ ត្រូវបានធ្វើឡើង ក្រោយពីឧទ្ធម្ភាគចក្រយោធាមួយគ្រឿងរបស់ចិនបានហោះចូលមកជិតនាវា ចម្បាំងរបស់ជប៉ុនពេក កាលពីថ្ងៃចន្ទទី៧មីនាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
អ្វីដែលបានកើតឡើង កាលពីថ្ងៃចន្ទម្សិលមិញ គឺជា«ទង្វើមួយគ្រោះថ្នាក់ជាទីបំផុត» នេះជាសំដីរបស់រដ្ឋមន្ត្រីក្រសួងការពារជាតិជប៉ុន Toshimi Kitazawa ។ កាលពីម្សិលមិញ ឧទ្ធម្ភាគចក្រយោធាមួយគ្រឿងរបស់ចិនបានហោះបន្ទាបខ្លួនចូលមកជិតនាវាdestroyers របស់ជប៉ុន នៅប៉ែកខាងត្បូងនៃសមុទ្រចិន ម្តុំទីតាំងនៃអណ្តូងឧស្ម័នធម្មជាតិមួយ ដែលចិននិងជប៉ុនដណ្តើមគ្នាកាន់កាប់ជាយូរមកហើយ។
ឧប្បត្តិហេតុបែបនេះ ធ្លាប់បានកើតឡើងជាច្រើនដងមកហើយ។ ឧទាហរណ៍ កាលពីខែមេសាឆ្នាំទៅមិញ ឧទ្ធម្ភាគចក្រយោធាចិនបានបន្ទាបខ្លួនមកជិតនាវាយាមល្បាតរបស់ជប៉ុនចំនួនពីរលើក។
ក៏ប៉ុន្តែពីរសប្តាហ៍ចុងក្រោយនេះ ចិនហាក់ដូចជាបាននិងកំពុងបន្តបង្កើនទង្វើរបៀបនេះ។ ក្រៅពីប្រទេសជប៉ុន វៀតណាមនិងហ្វីលីពីនក៏បានលើកឡើងដែរថា នាវាចម្បាំងឬក៏នាវាយាមល្បាតរបស់ចិនបានចេញពីដែនទឹករបស់ខ្លួនហើយចូលមកកៀកទីប្រជុំកោះSpratly ដែលបណ្តាប្រទេសអាស៊ីមួយចំនួនរួមទាំងចិនផងទាមទារចង់បាន។ ដូចគ្នាអ៊ីចឹងដែរ កាលពីសប្តាហ៍មុន យន្តហោះប្រដេញពីរគ្រឿងរបស់ចិនបានហោះចូលមកជិតទីប្រជុំកោះSenkaku ជាហេតុបានជំរុញឲ្យអាជ្ញាធរយោធាជប៉ុនបញ្ជូនយន្តហោះចម្បាំងទៅកាន់ទីនោះដែរ ពីព្រោះSenkaku ដែលឋិតនៅក្រោមការកាន់កាប់របស់ជប៉ុនកំពុងត្រូវប្រទេសចិនទាមទារចង់បាន។
ចំពោះក្រុមអ្នកសង្កេតការណ៍ អាជ្ញាធរចិនប្រហែលជាបានចេញបញ្ជាឲ្យកងទ័ពបង្កឧប្បត្តិហេតុបែបនេះឡើង ក្នុងគោលដៅបំផុសបំផុលមនោសញ្ចេតនាជាតិនិយម និងបង្វែរអារម្មណ៍របស់មហាជនចិនចេញពីបដិវត្តន៍ផ្កាម្លិះនៅពិភពអារ៉ាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ