ជប៉ុននិងកូរ៉េខាងត្បូងត្រូវនិយាយចុះសម្រុងគ្នាមុនទស្សនកិច្ចរបស់លោកអូបាម៉ា នៅអាស៊ី
មន្រ្តីជាន់ខ្ពស់របស់រដ្ឋាភិបាលកូរ៉េខាងត្បូង និងជប៉ុនត្រូវជួបប្រជុំគ្នា នៅក្នុងសប្តាហ៍នេះ ដើម្បីដោះស្រាយចំណុចខ្វែងគំនិតដែលប្រទេសទាំងពីរមានជាមួយគ្នា។ ចំណុចធូរស្រាលរវាងប្រទេសសម្ព័ន្ធទាំងពីររបស់អាមេរិកត្រូវរកឲ្យឃើញ នៅមុនទស្សនកិច្ចរបស់លោកប្រធានាធិបតីដែលនឹងត្រូវធ្វើ នៅទីក្រុងតូក្យូ នៅថ្ងៃទី ២៣មេសា ខាងមុខ។
ចុះផ្សាយនៅថ្ងៃ៖
ស្តាប់ - ០២:១៤
រដ្ឋាភិបាលរបស់ប្រទេសទាំងពីរបានសម្រេចចិត្តជួបពិភាក្សាគ្នា ដើម្បីបន្ធូរភាពតានតឹងដែលប្រទេសទាំងពីរមានជាមួយគ្នា នៅក្នុងរយៈពេលប៉ុន្មានឆ្នាំចុងក្រោយនេះ។ នោះ គឺក្រៅតែពីរឿងដណ្តើមដីប្រជុំកោះ ជប៉ុន និងកូរ៉េខាងត្បូង ដែលជាប្រទេសជិតខាងនឹងគ្នា នៅមើលមុខគ្នាមិនចំ ដោយសារស្លាកស្នាមប្រវត្តិសាស្រ្ត ក្នុងអតីតកាល ជាពិសេស រឿងស្រ្តីកូរ៉េខាងត្បូង ដែលជប៉ុនបានចាប់យកទៅធ្វើទាសករផ្លូវភេទ នៅក្នុងសម័យសង្រ្គាមលោកលើកទីពីរ។
តាមលោកជូនីឈិ អិហារ៉ា មន្រ្តីទទួលបន្ទុកកិច្ចការអាស៊ី និងអូសេអានី របស់ក្រសួងការបរទេសជប៉ុន ដែលនឹងធ្វើដំណើរទៅទីក្រុងសេអ៊ូល នៅថ្ងៃពុធ រដ្ឋាភិបាលជប៉ុន និងកូរ៉េខាងត្បូង នឹងពិភាក្សារាល់គ្រប់ប្រធានបទ ដែលធ្វើឲ្យប្រទេសទាំងពីរឈ្លោះ មិនចុះសម្រុងនឹងគ្នារហូតមក ក្នុងនោះ ក៏មាននិយាយពីនារីទាសករផ្លូវភេទ ដែលទាហានជប៉ុនចាប់បង្ខំដែរ។ នារីកំដរអារម្មណ៍ ជាឈ្មោះ ដែលទាហានជប៉ុនហៅសំដៅនារីអាស៊ី ដែលទាហានជប៉ុនចាប់យកមកពីកូរ៉េ ចិន ឥណ្ឌូណេស៊ី ដើម្បីបម្រើតណ្ហារបស់ទាហានជប៉ុន នៅក្នុងអំឡុងសង្រ្គាមលោក។ អ្នកប្រវត្តិសាស្រ្តបានវាយតម្លៃថា មាននារីប្រមាណ ២សែននាក់ នៅអាស៊ី ត្រូវទាហានជប៉ុនចាប់ឲ្យធ្វើទាសករផ្លូវភេទនៅសម័យនោះ។
ជម្លោះខ្វែងគំនិតគ្នារវាងកូរ៉េខាងត្បូង និងជប៉ុនត្រូវតែដោះស្រាយឲ្យចេញ នៅមុនដំណើរទស្សនកិច្ចរបស់លោកអូបាម៉ា នៅអាស៊ី។ លោកប្រធានាធិបតីបារ៉ាក់ អូបាម៉ា ចង់ឲ្យសម្ព័ន្ធមិត្តរួមរបស់អាមេរិកឈប់ឈ្លោះគ្នា និងរួមគ្នា ជាពិសេស នៅក្នុងពេលដែលការគំរាមកំហែងពីសំណាក់សត្រូវរួម គឺកូរ៉េខាងជើង មានកាន់តែខ្លាំងឡើងៗនោះ។ កាលពីជំនួបប្រជុំនៅប្រទេសហូឡង់ លោកអូបាម៉ាថែមទាំងបានជំរុញឲ្យមេដឹកនាំជប៉ុន និងកូរ៉េខាងត្បូងជួបពិភាក្សាគ្នា។
កូរ៉េខាងត្បូង ដែលធ្លាប់រងអាណានិគមកិច្ចរបស់ជប៉ុន ក្នុងអតីតកាល ចាប់ផ្តើមថ្នាំងថ្នាក់ចិត្តនឹងជប៉ុន កាន់តែខ្លាំង។ ភាពតានតឹងរវាងប្រទេសទាំងពីរ បានឡើងដល់កម្រិតកំពូលបន្ទាប់ពីនាយករដ្ឋមន្រ្តីជប៉ុន ស៊ីនហ្សូ អាបេ បានទៅគោរពសព ឧក្រិដ្ឋជនសង្រ្គាម នៅវិហារយ៉ាស៊ូគូនី។ កូរ៉េខាងត្បូងបានបន្ទោសលោកអាបេ ចំពោះនយោបាយជាតិនិយម។ កន្លងមក លោកស្រីប្រធានាធិបតីកូរ៉េខាងត្បូងបានសំដែងការព្រួយបារម្ភចំពោះនយោបាយរបស់រដ្ឋាភិបាលជប៉ុនដែលចង់ សើរើ ឡើងវិញ ពាក្យសុំទោស ដែលជប៉ុនធ្លាប់បានធ្វើ ទៅកាន់នារីរងគ្រោះ កូរ៉េ កាលពីឆ្នាំ ១៩៩៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ