ជំនួបប្រចាំទសវត្សរបស់អ.ស.ប.ស្តីពីគ្រោះមហន្តរាយបើកនៅជប៉ុន
អ្នករៀបចំគោលនយោបាយទាំងឡាយបានមកជួបជុំគ្នាដើម្បីពិភាក្សានៅថ្ងៃសៅរ៍នេះ អំពីការកាត់បន្ថយហានិភ័យនៃគ្រោះមហន្តរាយ។ ពួកគេមានសង្ឃឹមខ្លាំងថា សន្និសីទនៅប្រទេសជប៉ុនដែលរងគ្រោះដោយរលកយក្សស៊ូណាមិនោះ អាចបង្កើតបាននូវចំណុចចាប់ផ្តើមមួយសម្រាប់ការប្រឹងប្រែងដ៏ពិតប្រាកដ ដើម្បីដោះស្រាយគ្រោះមហន្តរាយធម្មជាតិនានាក៏ដូចជាការប្រែប្រួលអាកាសធាតុដែលបំផ្លាញទ្រព្យសម្បត្តិជាអនេកនាពេលបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
កិច្ចប្រជុំស្តីពីការកាត់បន្ថយហានិភ័យនៃគ្រោះមហន្តរាយនោះចូលមកដល់ចំពេលដែលព្យុះសង្ឃរាមួយបានឆ្លងកាត់ប្រទេសវ៉ានុយអាទុយនៅក្នុងមហាសមុទ្រប៉ាស៊ីហ្វិកខាងត្បូង។ ព្យុះកំណាចនោះបានធ្វើឱ្យអ្នកស្រុកភ័យជាខ្លាំង និងបង្កក្តីបារម្ភនៅថ្ងៃសៅរ៍នេះថា វាអាចសម្លាប់មនុស្សដល់ទៅរាប់សិបនាក់។
លោក បាន គី មូន (Ban Ki-moon) ប្រាប់ថាបានជួបប្រធានាធិបតីវ៉ានុយអាទុយនៅព្រឹកនេះ និងបានបង្ហាញនូវ«ការរំលែកទុក្ខដ៏ជ្រាលជ្រៅបំផុត» ក៏ដូចជាសាមគ្គីភាពជាមួយប្រជាជននៅលើប្រជុំកោះនោះ។
លោកអគ្គលេខាធិការអង្គការសហប្រជាជាតិបានថ្លែងដូច្នេះថា៖ «អ្វីដែលយើងពិភាក្សាគ្នានៅថ្ងៃនេះគឺជាក់ស្តែងណាស់សម្រាប់ប្រជាជនរាប់លាននាក់នៅក្នុងពិភពលោក។ វាជាការវិនិយោគដ៏ឈ្លាសវៃដើម្បីអាជីវកម្ម និងជាការវិនិយោគប្រកបដោយគតិបណ្ឌិតដើម្បីសង្គ្រោះជីវិត»។
លោក បាន គី មូន ដែលបានគូសបញ្ជាក់អំពីកំណើននៃធាតុអាកាសពិបាកទ្រាំនៅពេលដែលកំដៅផែនដីរិតតែបង្កើនល្បឿនក្នុងរយៈពេល១០ឆ្នាំកន្លងទៅ ក៏បានអះអាងផងដែរថា៖ «ការកាត់បន្ថយហានិភ័យនៃគ្រោះមហន្តរាយគឺជាខ្សែត្រៀមជួរមុខនៃការការពារទប់ទល់នឹងផលប៉ះពាល់បង្កឡើងដោយបម្រែបម្រួលអាកាសធាតុ»។
របាយការណ៍មួយរបស់ការិយាល័យអង្គការសហប្រជាជាតិសម្រាប់កាត់បន្ថយហានិភ័យនៃគ្រោះមហន្តរាយ (UNISDR) បានលើកឡើងថា ការខាតបង់ផ្នែកសេដ្ឋកិច្ចនៅទូទាំងសាកលលោក ដោយសារតែគ្រោះមហន្តរាយនានា មានតម្លៃជាមធ្យមពី២៥០ពាន់លានដុល្លារ ទៅ៣០០ពាន់លានដុល្លារក្នុងមួយឆ្នាំ។
លោក ឡូរ៉ង់ ហ្វាប៊ីយឺស (Laurent Fabius) រដ្ឋមន្ត្រីការបរទេសបារាំង បានប្រាប់ទីភ្នាក់ងារសារព័ត៌មានបារាំងមុនពេលថ្លែងសុន្ទរកថានៅថ្ងៃសៅរ៍នេះថា៖ «ពីរភាគបីនៃគ្រោះមហន្តរាយធម្មជាតិបង្កឡើងដោយបម្រែបម្រួលអាកាសធាតុ»។
លោក ហ្វាប៊ីយឺស គឺជាប្រធាននៃសន្និសីទអង្គការសហប្រជាជាតិស្តីពីការប្រែប្រួលអាកាសធាតុ (COP 21) ដែលនឹងត្រូវរៀបចំធ្វើនៅរដ្ឋធានីប៉ារីស ក្នុងខែធ្នូ ឆ្នាំ២០១៥នេះ។
លោករដ្ឋមន្ត្រីការបរទេសបារាំងរូបនេះនិយាយទៀតថា៖ «ជោគជ័យនៅក្នុងកិច្ចប្រជុំនៅទីក្រុងសេនដាយ (Sendai) [នៃប្រទេសជប៉ុនថ្ងៃសៅរ៍នេះ] នឹងបង្ហាញអំពីរូបភាពនៃសន្និសីទទីក្រុងប៉ារីស»។ លោក ឡូរ៉ង់ ហ្វាប៊ីយឺស បានបន្ថែមថា លោកចង់គូរប្លង់មួយដែលនៅក្នុងនោះរាល់ប្រទេសនិងប្រជាជនងាយរងគ្រោះនឹងទទួលបានប្រព័ន្ធនៃការជូនដំណឹងជាមុនអំពីគ្រោះមហន្តរាយ។
សន្និសីទស្តីពីការកាត់បន្ថយហានិភ័យនៃគ្រោះមហន្តរាយនេះប្រព្រឹត្តទៅនៅភាគខាងជើងនៃទីក្រុងសេនដាយ តែប៉ុន្មានថ្ងៃប៉ុណ្ណោះបន្ទាប់ពីប្រទេសជប៉ុនប្រារព្ធខួបទី៤នៃការរញ្ជួយដីកម្លាំង៩រិចទ័រ។ ការរញ្ជូយដីក្រោមបាតសមុទ្រនៅថ្ងៃទី១១ ខែមីនា ឆ្នាំ២០១១ បានបង្កើតរលកយក្សស៊ូណាមិ ដែលបានសម្លាប់មនុស្សប្រហែល១៩០០០នាក់ និងបានបង្កមហន្តរាយនុយក្លែអ៊ែរទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ