អ្នកសារព័ត៌មាន ជាមុខសញ្ញាទាក់ទាញការពាក់មួកសុវត្ថិភាព
ប្រព័ន្ធផ្សព្វផ្សាយ មានសារៈសំខាន់ណាស់ ក្នុងការទាក់ទាញមតិគាំទ្រលើការពាក់មួកសុវត្ថិភាព សម្រាប់កុមារ នៅទូទាំងប្រទេសកម្ពុជា។ នេះគឺជាខ្លឹមសារនៅក្នុងវេទិកាថ្នាក់និពន្ធនាយកសារព័ត៌មាន ស្តីពីការរួមគ្នាជំរុញការពាក់មួកសុវត្ថិភាពនៅកម្ពុជា ដែលបានរៀបចំនៅសណ្ឋាគារ អ៊ិនធឺកុងទីណង់តាល់ ក្រុងភ្នំពេញ នាថ្ងៃទី ១៥កក្កដានេះ។ ជាវេទិកា ដែលមានការចូលរួមស្តាប់មតិយោបល់ ពីក្រសួងព័ត៌មាន ក្រសួងសាធារណការ និងដឹកជញ្ជូន អង្គការមូលនិធិបង្ការរបួសអាស៊ី រួមនឹងក្លឹបអ្នកកាសែតកម្ពុជា។
ចុះផ្សាយនៅថ្ងៃ៖
ស្តាប់ - ០២:០៨
ក្រសួងពាក់ព័ន្ធនានា រួមជាមួយក្លឹបអ្នកកាសែតកម្ពុជា នៅថ្ងៃពុធនេះ បានរួមគ្នារៀបចំវេទិកាមួយ ដើម្បីផ្តល់អនុសាសន៍ ក៏ដូចជាពង្រឹងប្រព័ន្ធផ្សព្វផ្សាយ ឲ្យបំផុសការចូលរួម ដល់ពលរដ្ឋ និងកុមារ ក្នុងការ ពាក់មួកសុវត្ថិភាព នៅកម្ពុជា។ ការពាក់មួកសុវត្ថិភាព ដែលភាគីទាំងអស់យល់ថា ជាផ្នែកមួយដ៏សំខាន់ ក្នុងការចូលរួមកាត់បន្ថយអត្រាស្លាប់ និងរបួស ដោយសារគ្រោះថ្នាក់ចរាចរណ៍ ពីមួយឆ្នាំ ទៅមួយឆ្នាំ។
ថ្លែងនៅក្នុងវេទិកានោះ និពន្ធនាយកនៃសារព័ត៌មានផ្សេងៗ បានលើកឡើងថា អ្នកសារព័ត៌មាន ជាក្រុមមួយ ដែលអាចទាក់ទាញពលរដ្ឋឲ្យយល់ដឹងពីគុណតំលៃនៃការពាក់មួកសុវត្ថិភាព។ តាមមតិរបស់ក្រុមនិពន្ធនាយកទាំងនោះ ពួកគេចង់ឲ្យអ្នកសារព័ត៌មាន ត្រូវតែផ្សាយដំណឹងអប់រំពលរដ្ឋ ដើម្បីបញ្ចៀសកុំឲ្យមានគ្រោះថ្នាក់ចរាចរណ៍ មិនមែនគ្រាន់តែផ្សាយព័ត៌មានពីគ្រោះថ្នាក់ចរាចរណ៍នោះទេ។
និពន្ធនាយកគេហទំព័រ និងកាសែតធំៗនៅកម្ពុជា ក៏ចង់ឲ្យមានយុទ្ធនាការធំមួយ ដោយមានការចូលរួមពីក្រសួងពាក់ព័ន្ធនានា ដើម្បីបណ្តុះបណ្តាលអ្នកសារព័ត៌មានថែមទៀត ឲ្យយល់កាន់តែច្បាស់ពីយុទ្ធសាស្រ្ត ក្នុងការបញ្ច្រាបព័ត៌មានពីគ្រោះថ្នាក់ចរាចរណ៍ និងការការពារ។ លើសពីនេះ ក៏មានការសំណូមពរ ឲ្យមានការពង្រឹងច្បាប់ ពីសំណាក់ក្រសួងដែលធ្វើការលើផ្នែកចរាចរណ៍ផងដែរ។
លោកគឹម បញ្ញា នាយកប្រតិបត្តិអង្គការមូលនិធិបង្ការរបួសអាស៊ី បានថ្លែងក្នុងវេទិកានោះដែរថា ក្នុងរយៈពេល ៩ឆ្នាំចុងក្រោយនេះ ចំនួនអ្នកស្លាប់ដោយគ្រោះថ្នាក់ចរាចរណ៍ បានកើនឡើង ១០០ភាគរយ ពោលគឺមានមនុស្សប្រមាណ ២ម៉ឺន២ពាន់នាក់ បានស្លាប់។ ក្នុងឆ្នាំ ២០១៤ ចំនួនអ្នកស្លាប់ដោយគ្រោះថ្នាក់ចរាចរណ៍ នៅកម្ពុជា មានចំនួន ៣០ដង ច្រើនជាង ចំនួនអ្នកស្លាប់ដោយសារជំងឺគ្រុនចាញ់ គ្រុនឈាម និងគ្រាប់មីនជាដើម។ តាមលោកគឹម បញ្ញា ការពាក់មួកសុវត្ថិភាព បានត្រឹមត្រូវ អាចកាត់បន្ថយហានិភ័យនៃការរងរបួសក្បាលធ្ងន់ធ្ងរ បាន ៦៩ភាគរយ និងកាត់បន្ថយហានិភ័យនៃការស្លាប់ បាន ៤២ភាគរយ។
តំណាងឲ្យអង្គការមូលនិធិបង្ការរបួសអាស៊ី លោកគឹម បញ្ញា ចង់ឲ្យអ្នកសារព័ត៌មានចូលរួមផ្សព្វផ្សាយលើយុទ្ធសាស្ត្រ ឆ្នាំ ២០១៥-២០២០ ចំនួន ៣គម្រោង ដែលរួមមាន គម្រោងមួកសុវត្ថិភាពមួយ ជួយជីវិតបានម្នាក់ គម្រោងសុវត្ថិភាពចរាចរណ៍លើដងផ្លូវ-សហគមន៍មានសុវត្ថិភាព និងគម្រោងភ្នាក់ងារជំរុញឲ្យមានការប្រែប្រួលជាវិជ្ជមាន។ គម្រោងទាំងនេះ គឺនឹងរួមចំណែក ក្នុងកិច្ចខិតខំជំរុញការពាក់មួកសុវត្ថិភាព ដល់អ្នករួមដំណើរតាមម៉ូតូ រួមនឹងកុមារផង ឲ្យបាន ៨០ភាគរយ នៅឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ