ទិវាពិភពលោកប្រឆាំងនឹងការប្រើយុទ្ធសាស្ត្ររំលោភផ្លូវភេទ ធ្វើជាអាវុធសង្គ្រាម
ការប្រើយុទ្ធសាស្ត្រចាប់រំលោភ ធ្វើជាអាវុធសង្គ្រាម ជាប្រធានបទដ៏សំខាន់សម្រាប់ពិភពលោក នៅថ្ងៃអាទិត្យ១៩មិថុនានេះ។ ជាលើកទី១ ថ្ងៃអាទិត្យនេះ នៅទូទាំងពិភពលោក មានការរៀបចំទិវាប្រយុទ្ធប្រឆាំងនឹងអាវុធសង្គ្រាមប្រភេទនេះ។ ការប្រើយុទ្ធសាស្ត្រចាប់រំលោភភេទ ធ្វើជាអាវុធសង្គ្រាមត្រូវបានអង្គការសហប្រជាជាតិបានចាត់ទុក តាំងពីឆ្នាំ២០០៨មក ថាជាបទឧក្រិដ្ឋប្រឆាំងមនុស្សជាតិ។ ប៉ុន្តែ បច្ចុប្បន្ន យុទ្ធសាស្ត្រអសីលធម៌ បែបនេះ នៅតែកើតមាន នៅឡើយ នៅតាមប្រទេសប្រហែលជាង១០ ក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
យុទ្ធសាស្ត្រចាប់រំលោភផ្លូវភេទ ធ្វើជាអាវុធសង្គ្រាម ជាយុទ្ធសាស្ត្រដែលគេប្រើប្រាស់តាំងពីយូរយារណាស់មកហើយ តែទើបតែថ្មីៗនេះទេ ទើបគេចាប់អារម្មណ៍ថា វាក៏ជាបញ្ហាចំបងមួយដែរ។ ទិសដៅធំសំខាន់ នៃអាវុធអសីលធម៌ភេទនេះ គឺបង្កការភ័យខ្លាចដល់ប្រជាជន ដើម្បីបំបាក់គូប្រឆាំងនយោបាយ។ នេះបើយោងតាមអង្គការអន្តរជាតិ We are not Weapons of War ប្រែថា យើងមិនមែនជាអាវុធសង្គ្រាម។
នៅដើមបូព៌ា ក្នុងបដិវត្តន៍បះបោរលីប៊ីកន្លងមក ទាហានរបបលោកខាដាហ្វ៊ី បានចាប់រំលោភទាំងស្ត្រី ទាំងបុរស។ ករណីបែបនេះ ក៏ធ្លាប់កើតមានដូចគ្នា នៅតាមប្រទេសអាហ្វ្រិកដូចជា កេនយ៉ា ហ្ស៊ីមបាវេ រឺក៏ នៅតំបន់Darfour។ ស្ត្រីអាហ្វ្រិករាប់ម៉ឺន រាប់សែននាក់ត្រូវបានគេបំពានភេទ។ ដោយការភ័យខ្លាច ស្ត្រីខ្លះសុខចិត្តនៅស្ងៀម មិនហ៊ានប្តឹងជនឧក្រិដ្ឋទេ។
ក្នុងយុទ្ធសាស្ត្ររំលោភភេទ ជនល្មើសមិនសម្លាប់ជនរងគ្រោះទេ។ ទិសដៅសំខាន់ គឺចាប់រំលោភភេទរហូតដល់ប្រជាជនក្នុងស្រុកភ័យខ្លាច រត់ចោលផ្ទះសម្បែង ទីកន្លែងដែលពួកគេរស់នៅ។ ប្រជាជននឹងផ្សព្វផ្សាយដំណឹងភ័យខ្លាចនេះ គ្រប់ទិសទី ធ្វើអោយប្រជាជនគ្រប់កន្លែងភ័យខ្លាច ហើយគូសត្រូវនយោបាយអាចនឹងចុះចាញ់ នៅទីបញ្ចប់។
យុទ្ធសាស្ត្រប្រភេទនេះក៏ត្រូវបានក្រុមជីហាតរដ្ឋអ៊ីស្លាមយកធ្វើជាជាយុទ្ធសាស្ត្រផ្តាច់មុខរបស់ខ្លួនដែរ។ ក្រុមជីហាតបានចុះផ្សាយសៀវភៅ ក្រោមខ្លឹមសារថា ការរំលោភផ្លូវភេទ និងទាសភាពផ្លូវភេទ ជាអាវុធ ប្រើសម្រាប់ដាក់ទណ្ឌកម្ម។
កន្លងមក សកម្មជនក្រុមជីហាតរដ្ឋអ៊ីស្លាម បានរំលោភបំពានផ្លូវភេទលើជនជាតិភាគតិច យេហ្ស៊ីឌី ក្នុងទិសដៅបំបាត់ពូជសាសន៍។ ស្ត្រីដែលគ្មានលក្ខណៈសមស្របតាមលក្ខន្តិកៈរបស់ក្រុមជីហាត ក៏ទទួលរងការរំលោភបំពានភេទដូចគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ