ថៃចាន់នីទើបតែវិលត្រឡប់មកពីធ្វើការ ជាអ្នកបម្រើតាមផ្ទះ នៅក្នុងប្រទេសម៉ាឡេស៊ី។ យុវតីអាយុ ១៩ ឆ្នាំរូបនេះ ទទួលរងនូវការលំបាកសព្វបែបយ៉ាង ទាំងការធ្វើការដោយស្ទើរតែគ្មានម៉ោងឈប់សម្រាក ទាំងការទទួលទានអាហារមិនគ្រប់គ្រាន់ និងត្រូវថៅកែម្ចាស់ផ្ទះម៉ាឡេស៊ី ទាត់ធាក់ រហូតដល់នាងបាក់ជើងខាងឆ្វេងថែមទៀត។ សព្វថ្ងៃនេះថៃ ចាន់នី កំពុងតែស្វះស្វែងរកអន្តរាគមន៍ពីប៉ូលិសក្រសួងមហាផ្ទៃនិងអង្គការក្រៅរដ្ឋាភិបាល ដើម្បីដាក់ពាក្យប្តឹងទាមទារយុត្តិធម៌ ចំពោះទារុណកម្មលើរូបនាង ក្នុងរយៈពេល ៣ ឆ្នាំ នៅប្រទេសម៉ាឡេស៊ី។
