សាលាក្តីខ្មែរក្រហមខ្វះថវិកាបើកប្រាក់ខែឲ្យបុគ្គលិកជនជាតិខ្មែរទៀតហើយ
វិបត្តិថវិការបស់សាលាក្តីខ្មែរក្រហមបានមកដល់ទៀតហើយ។ នៅដំណាច់ខែឧសភានេះ បុគ្គលិកជនជាតិខ្មែរមួយចំនួននៃសាលាក្តីនេះបានទទួលប្រាក់ខែពេញ ប៉ុន្តែ មួយចំនួនទៀតបានត្រឹមពាក់កណ្តាលប៉ុណ្ណោះដោយសារតែសាលាក្តីខ្វះថវិកា។ ចាប់ពីពេលនេះតទៅ ប្រសិនបើគ្មានជំនួយថ្មីទៀតទេ សាលាក្តីនេះនឹងគ្មានថវិកាបើកឲ្យបុគ្គលិកជនជាតិខ្មែរទៀតឡើយ។ ចំណែកឯភាគីអន្តរជាតិវិញនៅមានថវិការហូតដល់ខែកញ្ញា។
ចុះផ្សាយនៅថ្ងៃ៖
ស្តាប់ - ០២:១៦
បុគ្គលិកជនជាតិខ្មែរនៃសាលាក្តីខ្មែរក្រហមមិនបានទទួលប្រាក់ខែពេញលេញគ្រប់គ្នាទេនៅដំណាច់ខែឧសភានេះ។ មានតែបុគ្គលិកថ្នាក់ក្រោមមួយចំនួនប៉ុណ្ណោះដែលបានទទួលប្រាក់ខែពេញលេញ ចំណែកឯបុគ្គលិក និងមន្ត្រីថ្នាក់ខ្ពស់ដែលមានប្រាក់ខែច្រើនបានទទួលត្រឹម៦០ភាគរយតែប៉ុណ្ណោះ។
លោក នេត្រ ភក្ត្រា អ្នកនាំពាក្យនៃសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា ចាប់ពីពេលនេះតទៅ ប្រសិនបើគ្មានជំនួយធ្លាក់មកទេនោះ ភាគីកម្ពុជានឹងគ្មានថវិកាបើកប្រាក់ខែឲ្យបុគ្គលិកទៀតឡើយ។ ចំណែកឯភាគីអន្តរជាតិនៅមានថវិការហូតដល់ខែកញ្ញា។ សូមបញ្ជាក់ថា ថវិកាសម្រាប់បើកប្រាក់ខែឲ្យបុគ្គលិកជនជាតិខ្មែរបានរហូតដល់ពេលនេះគឺជាកញ្ចប់ថវិកាសង្គ្រោះបន្ទាន់ដែលផ្តល់ដោយភាគីអន្តរជាតិតែប៉ុណ្ណោះ។ ប៉ុន្តែ កញ្ចប់ថវិកាសង្គ្រោះបន្ទាន់នេះត្រូវបានប្រើប្រាស់អស់ទៅហើយ។
ដើម្បីពន្លឿនសវនាការ សាលាក្តីខ្មែរក្រហមបានសម្រេចបំបែកសំណុំរឿង ០០២ ជាផ្នែកតូចៗ។ ប្រសិនបើដំណើរការប្រព្រឹត្តទៅតាមការគ្រោងទុក សំណុំរឿង០០២ ផ្នែកទី១ ដែលកំហិតត្រឹមឧក្រិដ្ឋកម្មប្រឆាំងមនុស្សជាតិ ទាក់ទងនឹងការជម្លៀសប្រជាជនដោយបង្ខំ នឹងត្រូវបិទបញ្ចប់នៅក្នុងអឡុងខែកក្កដា ឬសីហាខាងមុខនេះ។ សាលក្រមទី១នេះត្រូវគេគ្រោងនឹងប្រកាសនៅក្នុងអំឡុងត្រីមាសទី១ដើមឆ្នាំ ២០១៤ ។ ប៉ុន្តែ វិបត្តិថវិកា និងបញ្ហាសុខភាពរបស់ជនជាប់ចោទដែលមានវ័យកាន់តែចាស់ជរាណាស់ទៅហើយនោះអាចជាឧបសគ្គក្នុងការសម្រេចតាមកាលកំណត់នេះ។
ដើម្បីកាត់បន្ថយការចំណាយ សាលាក្តីខ្មែរក្រហមក៏គ្រោងនឹងកាត់បន្ថយបុគ្គលិកមិនចាំបាច់មួយចំនួនផងដែរ។ បើយោងតាមអ្នកនាំពាក្យសាលាក្តី នៅដំណាច់ខែមិថុនានេះ បុគ្គលិកចំនួន ១០ភាគរយក្នុងចំណោមបុគ្គលិកសរុបជិត ៣០០ នាក់ នឹងត្រូវកាត់បន្ថយ។ បុគ្គលិក ១០ ភាគរយទៀតនឹងត្រូវបញ្ឈប់កិច្ចសន្យាការងារនៅដំណាច់ឆ្នាំ ២០១៣ ។ បើយោងតាមលោក នេត្រ ភក្ត្រា ភាគីកម្ពុជាត្រូវការថវិកាចំនួនជាង ៣ លានដុល្លារអាមេរិកទៀតដើម្បីអាចបន្តការងាររហូតដល់ដំណាច់ឆ្នាំ២០១៣នេះ។
រដ្ឋបាលរបស់សាលាក្តីកំពុងធ្វើការយ៉ាងមមាញឹកជាមួយប្រទេសជាមិត្តរបស់សាលាក្តីដើម្បីកៀងគរថវិកា ប៉ុន្តែ កិច្ចខិតខំជាច្រើនខែកន្លងទៅនេះហាក់មិនទាន់បានទទួលលទ្ធផលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ