ពលករខ្មែរកំពុងធ្វើការនៅថៃបច្ចុប្បន្ន មានជិត ៧០ ម៉ឺននាក់
បច្ចុប្បន្នពលករខ្មែរដែលកំពុងស្នាក់នៅ និង ធ្វើការនៅក្នុងប្រទេសថៃ មានចំនួនជិត ៧០ ម៉ឺននាក់ក្នុងនោះ ជាង ៤២ ម៉ឺននាក់ ជាពលករស្របច្បាប់អចិន្ត្រៃយ៍ និង ជាង ២៧ ម៉ឺននាក់ផ្សេង ទៀតកំពុងស្ថិតក្នុងភាពស្របច្បាប់បណ្តោះអាសន្ន ។ ប៉ុន្តែចំនួននេះ មិនរាប់បញ្ចូលទាំងពលករខ្មែរដែលត្រូវថៃចាប់បញ្ជូនមកវិញនោះទេ។ នេះ បើតាមបញ្ជាក់របស់លោក កុយ គួង អ្នកនាំពាក្យក្រសួងការបរទេសកម្ពុជា។ លោក កុយ គួង បានបញ្ជាក់ដូច្នេះក្រោយជំនួបរវាង លោក ឧបនាយករដ្ឋមន្ត្រី ហោ ណាំហុង ជាមួយលោក ទូចឆៃយុទ្ធ ភក្តី ឯកអគ្គរាជទូតថៃប្រចាំនៅកម្ពុជានៅទីស្តីការក្រសួងការបរទេសនៅព្រឹកថ្ងៃព្រហស្បតិ៍ ទី ២១ សីហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោក កុយ គួង អ្នកនាំពាក្យក្រសួងការបរទេសកម្ពុជា បានឲ្យដឹងថា គិតត្រឹមថ្ងៃទី ១៩ សីហា កន្លងទៅ ពលករខ្មែរដែលកំពុងស្នាក់នៅ និង ធ្វើស្របច្បាប់អចិន្ត្រៃយ៍នៅប្រទេសថៃបច្ចុប្បន្ន មានចំនួនប្រមាណជាង ៤២ ម៉ឺននាក់ ។ ចំណែកពលករទទួលបានភាពស្របច្បាប់បណ្តោះអាសន្នវិញនោះ មានចំនួនជាង ២៧ ម៉ឹននាក់។
អ្នកនាំពាក្យក្រសួងការបរទេសកម្ពុជា បានបន្ថែមថា ក្នុងចំណោមពលករដែលស្របច្បាប់អចិន្ត្រៃយ៍ជាង៤២ ម៉ឺននាក់នោះ គឺ ជាង៣៩ ម៉ឺននាក់ជាពលករស្របច្បាប់ស្រាប់ និង ជាង ២ម៉ឺន ៧ ពាន់នាក់ទៀត ជាពលករដែលស្របច្បាប់តាមការធ្វើកំណត់ទូតរបស់ក្រសួងការបរទេសកម្ពុជាទៅរដ្ឋាភិបាលថៃ។ ចំពោះពលករស្របច្បាប់បណ្តោះអាសន្នវិញ ត្រូវបានលោក កុយ គួង ពន្យល់ថា ពួកគេបានទៅចុះបញ្ជីទទួលបានបណ្ណស៊ីជម្ពូរដែលបញ្ជាក់ថា ពួកគេកំពុងរៀបចំទទួលភាពស្របច្បាប់ពេញលេញពីការិយាល័យច្រកចេញចូលតែមួយដែលមាននៅតាមបណ្តាខេត្តមួយចំនួនរបស់ថៃ។
សូមបញ្ជាក់ថា កាលពីអំឡុងខែមិថុនា កន្លងទៅ អាជ្ញាធរថៃបានចាប់បញ្ជូនទាំងបង្ខំនូវពលករខ្មែរខុសច្បាប់ប្រមាណជាង ២៥ ម៉ឺននាក់មកកាន់ប្រទេសកម្ពុជាវិញ។ ពលករខ្មែរទាំងនោះ មួយចំនួនបានសម្រុករៀបចំបែបបទស្របច្បាប់ដើម្បីទៅធ្វើការនៅប្រទេសថៃវិញ និង មួយចំនួនទៀតដែលនៅក្នុងប្រទេសថៃស្រាប់បានទៅចុះបញ្ជីនៅការិយាល័យច្រកចេញចូលតែមួយ ដើម្បីស្វែងរកភាពស្របច្បាប់នៅក្នុងប្រទេសថៃ។ ជាការសម្រួលដល់ពលករទាំងនោះ រដ្ឋាភិបាលកម្ពុជាបានបញ្ចុះតម្លៃធ្វើលិខិតឆ្លងដែនមកត្រឹមតែ ៤ ដុល្លារប៉ុណ្ណោះ។
ដោយឡែក ចំពោះ កម្មករខ្មែរចំនួន ៣ នាក់ដែលបានស្លាប់ និង ម្នាក់ទៀតបានរងរបួសក្នុងហេតុការណ៍បាក់អាគារនៅក្នុងប្រទេសថៃនាពេលថ្មីៗកន្លងទៅនេះ មិនទាន់ទទួលសំណងពេញលេញនៅឡើយទេ។ ក៏ប៉ុន្តែបើតាម លោក កុយ គួង អាជ្ញាធរថៃបានសងសំណងបឋមដល់ជនរងគ្រោះ ដោយក្នុងម្នាក់ទទួលបាន៦ ម៉ឹន ៥ ពាន់បាត សម្រាប់អ្នកស្លាប់ និង ៥ ម៉ឹនបាតសម្រាប់អ្នករងរបួស។ លោក កុយ គួង បានសង្កត់ធ្ងន់ថា ពេលនេះអគ្គកុងសុលកម្ពុជាប្រចាំនៅប្រទេសថៃកំពុងរៀបចំមេធាវី ដើម្បីប្តឹងទាមទារសំណងបន្ថែមពីក្រុមហ៊ុនដែលជួលកម្មករខ្មែរទៅធ្វើការនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ