ការបង្រួបបង្រួមគណបក្សរាជានិយម៖ ព្រួញមួយបាញ់បានសត្វពីរ ?
ចុះផ្សាយនៅថ្ងៃ៖
ស្តាប់ - ០៤:៣៦
ទីបំផុតទៅគណបក្ស ហ៊្វុនស៊ិនប៉ិច និងគណបក្ស នរោត្តម រណឬទ្ធិដែលជាបំណែកចុងក្រោយនៃគណបក្សរាជានិយមបានស្រុះស្រួលបង្រួបបង្រួមគ្នាឡើងវិញហើយ។ ការចុះហត្ថលេខាលើសេចក្តីប្រកាសរួមកាលពីថ្ងៃព្រហស្បតិ៍ដើម្បីបង្រួបបង្រួមគណបក្សទាំងពីរបានធ្វើឡើងនៅខណៈដែលគណបក្សរាជានិយមស្ទើរតែបាត់ឈ្មោះពីឆាកនយោបាយទៅហើយ។ ជាពិសេសទៅទៀត ការរួមរួមគ្នានេះអាចសម្រេចទៅបានដោយសារតែមានការ សប្រមសម្រួលរបស់លោកនាយករដ្ឋមន្ត្រីហ៊ុន សែន។ តើព្រឹត្តិការណ៍នេះមានអត្ថន័យបែបណាខ្លះសម្រាប់ប្រទេសកម្ពុជា?
ពីគណបក្សមួយដែលមាន៥៨កៅអីនៅក្នុងរដ្ឋសភាកាលពីឆ្នាំ១៩៩៣ ទៅជាគណបក្សដែលមានសំឡេងតែ២កៅអីនាពេលបច្ចុប្បន្ន គឺជាបទពិសោធន៍ដ៏ជូរចត់បំផុតរបស់គណបក្សរាជានិយម ហ្វ៊ុនស៊ិនប៉ិច។ មូលហេតុនៃបរាជ័យនយោបាយដ៏ធ្ងន់ធ្ងរនេះ គឺការបែបបាក់នេះឯង។ ការបែកបាក់បានធ្វើឲ្យឈាមរបស់ចលនារាជានិយមដ៏ធំមួយនេះហូរចេញបន្តិចម្តងៗ រហូតស្ទើរតែសោះខ្លួន។
ទីបំផុត នៅពេលដែលគណបក្សនយោបាយដែលបង្កើតឡើយដោយសម្តេចឪមួយនេះហៀបនឹងបាត់ឈ្មោះពីភូមិសាស្ត្រនយោបាយប្រទេសកម្ពុជាទៅហើយនោះ គណបក្សអតីតបងប្អូនគូសត្រូវពីរដែលជាបំណែកសេសសល់ចុងក្រោយនៃចលនារាជានិយម ក៏បានយល់ព្រមរួបរួមគ្នាឡើងវិញ។ ការយល់ព្រមរួបរួមគ្នានេះទៀតសោត ក៏មិនមែនកើតឡើងដោយចិត្តឯងនោះដែរ តែវាគឺជាលទ្ធផលនៃកិច្ចអន្តរាគមន៍របស់លោកនាយករដ្ឋមន្ត្រី ហ៊ុន សែន នៃគណបក្សប្រជាជនដ៏មានឥទ្ធិពល។
ក្រុមអ្នកវិភាគស្ថានការណ៍នយោបាយប្រទេសកម្ពុជាបានមើលឃើញថា ព្រឹត្តិការណ៍នេះមានអត្ថន័យសំខាន់ពីរយ៉ាង៖
អត្ថន័យទី១៖ ការរួបរួមគណបក្សរាជានិយមមិនត្រឹមតែមានផលប្រយោជន៍សម្រាប់គណបក្សរាជានិយមខ្លួនឯងតែប៉ុណ្ណោះទេ ប៉ុន្តែ វាក៏ផ្តល់ប្រយោជន៍សម្រាប់គណបក្សកាន់អំណាចផងដែរ។ ប្រយោជន៍នៅត្រង់ថា ការបែកបាក់នៃគណបក្សរាជានិយមជាច្រើនឆ្នាំទៅនេះ បានធ្វើឲ្យភូមិសាស្ត្រនយោបាយកម្ពុជាមានការប្រែប្រួល។ បម្រែបម្រួលដ៏សំខាន់ជាងគេ គឺនៅពេលដែលគណបក្សហ្វ៊ុនស៊ិនប៉ិចបែកបាក់ ទាំងអ្នកនយោបាយរាជានិយម និងទាំងអ្នកគាំទ្រគណបក្សនេះបានបែកខ្ញែកគ្នាទៅគ្រប់ទិសទី។ អ្នកខ្លះបែរទៅគាំទ្រគណបក្សកាន់អំណាច និងអ្នកខ្លះទៀតបែរទៅគាំទ្រគណបក្សប្រឆាំង។
ជាក់ស្តែង គណបក្សប្រឆាំងដែលដឹកនាំដោយលោក សម រង្ស៊ីបានលេចធ្លោឡើងនៅខណៈដែលគណបក្សហ្វ៊ុនស៊ិនប៉ិចបានស្រុតចុះ។ នេះជារបត់នយោបាយដ៏គួរឲ្យកត់សម្គាល់មួយដែលកើតចេញពីផលវិបាកនៃការបែកបាក់នៃចលនារាជានិយម។ បច្ចុប្បន្ននេះ ផលវិបាកនេះទំនងជាមិនទាន់ចប់នៅឡើយទេ។ អតីតអ្នកបោះឆ្នោតឲ្យគណបក្សរាជានិយមមួយចំនួនកំពុងស្ថិតក្នុងសភាពមិនច្បាស់លាស់នៅឡើយទេថា តើខ្លួននឹងបោះឆ្នោតឲ្យគណបក្សណា ? នៅក្នុងបរិបទបែបនេះហើយដែលការរួបរួមគ្នារបស់ «អ្នករាជានិយម» នៅក្រោមដំបូលគណបក្សហ្វ៊ុនស៊ិនប៉ិចឡើងវិញ គឺជាការចាំបាច់ដើម្បីផ្តល់កម្លាំងចិត្តជាថ្មីដល់អ្នកទាំងនោះ។ ម្យ៉ាងទៀត ការរួបរួមរបស់គណបក្សរាជានិយមក៏ត្រូវគេសង្ឃឹមថា អាចនឹងទាក់ទាញអ្នកបោះឆ្នោតរបស់ខ្លួនខ្លះដែលបានបែកចេញទៅគាំទ្របក្សប្រឆាំងផ្សេងៗនោះ ឲ្យត្រឡប់មកវិញផងដែរ?
អត្ថន័យទី២៖ ទោះបីជាគណបក្សរាជានិយមចុះខ្សោយប្រជាប្រិយភាពយ៉ាងខ្លាំងក៏ដោយ ប៉ុន្តែ រូបភាពរាជានិយមនៅតែជាតំណាងនៃការគោរពដែលដិតដាមជាប់យ៉ាងជ្រៅក្នុងអារម្មណ៍របស់ពលរដ្ឋខ្មែរនៅឡើយ។ ជារឿយៗ គណបក្សកាន់អំណាចតែងតែចេញមុខការពាររាជានិយមដោយអះអាងថា ខ្លួនជាអ្នកនាំរាជានិយមត្រឡប់មកក្នុងប្រទេសវិញ និងបានប្តេជ្ញាយ៉ាងម៉ឺងម៉ាត់ការពាររបបរាជានិយមអាស្រ័យធម្មនុញ្ញមិនឲ្យបាត់បង់ឡើយ។ ក្នុងន័យនេះ ការចេញមុខបង្រួបបង្រួមគណបក្សរាជានិយមមិនឲ្យរលាយសាបសូន្យ គឺជារូបភាពដ៏សំខាន់មួយសម្រាប់គណបក្សកាន់អំណាច។ តើនេះមិនមែនជានយោបាយព្រួញមួយ បាញ់បានសត្វពីរទេឬ ?
ក៏ប៉ុន្តែ ការស្តារប្រជាប្រិយភាពគណបក្សរាជានិយមឡើងវិញក្នុងកាលៈទេសៈនេះនៅតែជាសញ្ញាសួរដ៏ធំមួយក្នុងក្រសែភ្នែកក្រុមអ្នកវិភាគ។ ម្យ៉ាង វាទំនងជាយឺតពេលបន្តិចទៅហើយសម្រាប់ការប្រមូលអ្នកបោះឆ្នោតឲ្យរាជានិយមមកវិញ និងម្យ៉ាងទៀត ការរួបរួមក្រោមការសម្របសម្រួលពីគណបក្សកាន់អំណាចអាចជារូបភាពមួយផ្សេងទៅវិញក៏ថាបាន។ យ៉ាងណាក៏ដោយចុះ «សាមគ្គីជាកម្លាំង» គឺជាទស្សនវិជ្ជាដែលនៅតែមានតម្លៃគ្រប់កាលៈទេសៈដែលអ្នកនយោបាយមិនគួរមើលរំលង។ ការរួបរួមគ្នានឹងផ្តល់ប្រយោជន៍ បើទោះជាច្រើន ក៏តិចក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ