ប្រជាសហគមន៍ ចំនួន ១១ នៅខេត្តព្រះសីហនុ ជួបជុំ លើកបដា ដាក់ញត្តិ ទាមទារដំណោះស្រាយបញ្ហាដីធ្លី
ប្រជាសហគមន៍រាប់រយនាក់ មកពី ១១ សហគមន៍ បានជួបជុំ បិទផ្លូវ លើកបដា ដាក់ញត្តិ ទាមទារដំណោះស្រាយបញ្ហាដីធ្លី នៅមុខសាលាខេត្តព្រះសីហនុ នាព្រឹកថ្ងៃទី១៣តុលានេះ។ ប្រជាសហគមន៍ទាំងនោះ បានអះអាងថា ពួកគេមានបញ្ហាដីធ្លីជាមួយឈ្មួញ មន្ត្រីមានអំណាច និងក្រុមហ៊ុនឯកជន រំលោភយកដីពួកគាត់ តាំងពី២០០។ ពួកគាត់ធ្លាប់បានដាក់ពាក្យបណ្តឹង និងដាក់ញត្តិ ដើម្បីស្វែងរកអន្តរាគមន៍ជាច្រើនដងពីសំណាក់ស្ថាប័នពាក់ព័ន្ធផ្សេងៗ ក្នុងខេត្ត តែមិនមានដំណោះស្រាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ប្រជាសហគមន៍តំណាងឲ្យជាង ១០០០ គ្រួសារ រស់នៅសហគមន៍ចំនួន ១១ នៅខេត្តព្រះសីហនុ ដែលកំពុងមានបញ្ហាដីធ្លី តាំងពីឆ្នាំ២០០៥ មក បានជួបជុំ ដើរដង្ហែក្បួន លើកបដា ស្រែកមេក្រូ ដាក់ញត្តិរួម ទៅកាន់សាលាខេត្តព្រះសីហនុ ដើម្បីសុំអន្តរាគមន៍ ដោះស្រាយបញ្ហាដីធ្លីតាមសហគមន៍ ស្របទៅតាមអនុសាសន៍ដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែសីហា ឆ្នាំ២០១៤។ នោះគឺលោកនាយករដ្ឋមន្ត្រី ដែលប្រជាសហគមន៍ លើកឡើងថា លោកបានជំរុញ និងស្នើឲ្យមន្ត្រីគ្រប់ជាន់ថ្នាក់នៃខេត្តក្រុងរាជធានីទាំងអស់ ដែលជាសហការីរបស់ប្រមុខរាជរដ្ឋាភិបាល ក្នុងប្រទេសកម្ពុជា ធ្វើការដោះស្រាយបញ្ហាដីធ្លីជូនដល់ប្រជាសហគមន៍ ដែលមានបញ្ហា។
ក្រុមប្រជាសហគមន៍ ដែលតវ៉ានៅមុខសាលាខេត្តព្រះសីហនុ បានអះអាងថា កន្លងមក ពួកគាត់ ធ្លាប់បានដាក់ពាក្យបណ្តឹង ដាក់ញត្តិ ដើម្បីស្វែងរកកិច្ចអន្តរាគមន៍ជាច្រើនដងពីសំណាក់ស្ថាប័នពាក់ព័ន្ធផ្សេងៗ ក្នុងខេត្ត ដើម្បីសុំឲ្យមានកិច្ចអន្តរាគមន៍ការជួយដោះស្រាយជូនពួកគេ តែមិនមានដំណោះស្រាយសមរម្យណាមួយជូនដល់ប្រជាពលរដ្ឋ កំពុងរងគ្រោះក្នុងអំពើអយុត្តិធម៌ ដែលត្រូវឈ្មួញ មន្ត្រីមានអំណាច និងក្រុមហ៊ុនឯកជន រំលោភយកដីធ្លីរបស់ពួកគាត់។
ក្នុងញត្តិ ប្រជាសហគមន៍ បានជំរុញដល់លោកអភិបាលខេត្តព្រះសីហនុ មេត្តាអន្តរាគមន៍ដល់ស្ថាប័នពាក់ព័ន្ធគ្រប់ជាន់ថ្នាក់ក្នុងខេត្តព្រះសីហនុ ធ្វើការអន្តរាគមន៍ ដោះស្រាយបញ្ហាដីធ្លីជូនប្រជាពលរដ្ឋ ដែលកំពុងរស់នៅ ទាំង ១១ សហគមន៍។
លោក ស៊ុន សុផាត តំណាងសហគមន៍ សេអ៊ីប្រាំ ដែលចូលរួមតវ៉ា ដាក់ញត្តិ បានឲ្យដឹងថា ក្នុងពេលប្រមូលផ្តុំនៅព្រឹកនេះ ក្រុមប្រជាសហគមន៍ បានបិទក្លោងទ្វារ និងផ្លូវមុខសាលាខេត្ត ដើម្បីឲ្យអាជ្ញាធរ ចេញមកទទួលញត្តិរបស់ប្រជាសហគមន៍។ មួយសន្ទុះក្រោយមក តំណាងប្រជាសហគមន៍ បានចូលជួបដាក់ញត្តិ ជូនលោក ឈិត សុខុន អភិបាលខេត្ត
ព្រះសីហនុ។
ចំពោះមុខប្រជាសហគមន៍ លោកអភិបាលខេត្ត បានទទួលញត្តិ ហើយសន្យាថា នឹងប្រឹងប្រែងដោះស្រាយបញ្ហាដីធ្លីទាំងនោះ តាមដំណាក់កាល និងតាមសហគមន៍និមួយៗ ឲ្យបានឆាប់។
ការសន្យាដូច្នេះ ត្រូវបានតំណាងសហគមន៍ដីធ្លី នៅខេត្តឆ្នេរសមុទ្រទេចរណ៍ ព្រះសីហនុ លោក ស៊ុន សុផាត អះអាងថា ប្រជាសហគមន៍រង់ចាំមើលចំណាត់ការរបស់អាជ្ញាធរខេត្ត ហើយបើនៅតែស្ងាត់ស្ងៀមទៀត នោះប្រជាសហគមន៍ នឹងលើកគ្នាឡើងមកភ្នំពេញ ដាក់ញត្តិ ទៅរដ្ឋសភា ដើម្បីជួយអន្តរាគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ