ច្បាប់ស្តីពីការគ្រប់គ្រងគ្រឿងស្រវឹងនឹងទៅដល់រដ្ឋសភាក្នុងពេលឆាប់ៗនេះ
ចំណុចសំខាន់ៗនៃសេចក្តីព្រាងច្បាប់ស្តីពីការគ្រប់គ្រងគ្រឿងស្រវឹង ត្រូវបានដាក់ឲ្យជជែកគ្នានៅមន្ទីព្រឹទ្ធសភានៅព្រឹកថ្ងៃពុធនេះ ដើម្បីស្វែងរកមត្តិយោបល់គាំទ្របន្ថែមទៀត មុននឹងសេចក្តីព្រាងដែលចេញដោយក្រសួងសុខាភិបាលនេះធ្វើដំណើរទៅដល់អង្គនីតិបញ្ញតិនៅពេលខាងមុខនេះ។ ការតម្លើងពន្ធលើគ្រឿងស្រវឹង ការកំណត់ផ្សាយពាណិជ្ជកម្មគ្រឿងស្រវឹង ឬការកំណត់អាយុដែលត្រូវអនុញ្ញាតឲ្យមានការក្រេបគ្រឿងស្រវឹងសុទ្ធសឹងជាប្រធានបទសំខាន់ៗដែលត្រូវលើកយកទៅជជែកដោយផុតផុសផងដែរ។
ចុះផ្សាយនៅថ្ងៃ៖
ស្តាប់ - ០២:២១
ទន្ទឹមគ្នានឹងការជជែកពីបញ្ហាចរាចរណ៍ ដែលមើលទៅហាក់ដូចជាក្តៅគគុកនៅក្នុងសង្គមខ្មែរជារៀងរាល់ ការលើកយកបញ្ហាគ្រឿងស្រវឹងមកដាក់ជាប្រធានបទនៅព្រឹទ្ធសភានៅព្រឹកថ្ងៃពុធទី២២ខែតុលានេះ ត្រូវបានចាត់ទុកថាមានសារសំខាន់ផ្សារភ្ជាប់គ្នាទៅនឹងគ្រោះថ្នាក់ចរាចរណ៍ដ៏ព្រួយបារម្ភផងដែរ។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីសន្តិភាពនិងអភិវឌ្ឍន៍ ដែលបានចូលរួមក្នុងកិច្ចពិភាក្សានេះដែរ បានឲ្យដឹងថា ការលើកពីបញ្ហាគ្រឿងស្រវឹងមកជជែក ដែលមានការចូលរួមពីតំណាងរដ្ឋសភា ព្រឹទ្ធសភា ក្រសួងសុខាភិបាល និងអង្គការក្រៅរដ្ឋាភិបាលនាពេលនេះ គឺចង់ឲ្យមានការចូលរួមមតិបន្ថែម និងបង្ហាញប្រជាពលរដ្ឋឲ្យបានយល់ដឹងពីគ្រោះថ្នាក់ និងការវិវត្តទាក់ទងទៅនឹងបញ្ញតិច្បាប់ផ្សេងៗស្តីពីគ្រឿងស្រវឹង។
ចំណុចសំខាន់ចំនួន៤ ត្រូវបានលើកយកមកពិភាក្សាលម្អិត និងផ្តល់មតិបន្ថែម រួមមានទីមួយការតម្លើងពន្ធលើគ្រឿងស្រវឹង ទីពីរ កម្រិតដល់កន្លែងលក់គ្រឿងស្រវឹងត្រូវមានអាជ្ញាប័ណ្ឌត្រឹមត្រូវ ហើយចៀសវាងលក់ដូរនៅទីកន្លែងមួយចំនួន ដូចជាក្បែរសាលារៀន វត្តអារ៉ាម មន្ទីរពេទ្យ ឬកន្លែងធ្វើការរបស់រដ្ឋជាដើម។
រីឯចំណុចទីបីនោះគឺទាក់ទងទៅនឹងការផ្សាយពាណិជ្ជកម្ម គឺគេពុំគួរផ្សាយពីសកម្មភាពផឹកស៊ី ការបង្កើតភាពសប្បាយរីករាយ និងផ្សាយពីអត្ថប្រយោជន៍របស់គ្រឿងស្រវឹងនោះទេ។ ផ្ទុយទៅវិញគឺស្នើឲ្យផ្សាយតែម៉ាក ឬឡូហ្គូ តែប៉ុណ្ណោះ។ ដោយឡែកចំណុចចុងក្រោយ គឺការការកំណត់អាយុបុគ្គលដែលត្រូវប្រើប្រាស់គ្រឿងស្រវឹង ដែលមានអាយុចាប់ពី២១ឆ្នាំឡើងទៅ។
ទាក់ទងទៅនឹងគ្រោះថ្នាក់ចរាចរណ៍វិញ គ្រឿងស្រវឹងបានធ្វើឲ្យមានការខាតបង់ថវិការក្នុងមួយឆ្នាំៗប្រមាណជា៤៤លានដុល្លារ។ លោក ត្រាំ អ៊ីវតឹក រដ្ឋមន្ត្រីក្រសួងដឹកជញ្ជូនបានថ្លែងនៅរដ្ឋសភាកាលពីថ្ងៃអង្គារថាគ្រោះថ្នាក់ចរាចរកាលពីឆ្នាំ ២០១៣ មានចំនួនជិត២ពាន់នាក់ ក្នុងនោះមាន១៥ភាគរយ ពាក់ព័ន្ធនឹងគ្រឿងស្រវឹង។
តាមការឲ្យដឹងពីអ្នកធ្វើពង្រាងច្បាប់និងគោលនយោបាយស្តីពីគ្រឿងស្រវឹង មិនត្រឹមតែគ្រោះថ្នាក់ថរាចរណ៍ប៉ុណ្ណោះទេ គ្រឿងស្រវឹងបានបង្កើតឲ្យមានអំពើហឹង្សារ និងអំពើពាលា បាត់សណ្តាប់ធ្នាប់ក្នុងសង្គមជាច្រើនទៀត។ទោះជាយ៉ាងនេះក្តីពង្រាងច្បាប់ស្តីពីគ្រឿងស្រវឹងនឹងត្រូវធ្វើដំណើរទៅដល់រដ្ឋសភាក្នុងពេលឆាប់ៗនេះ ខណៈដែលច្បាប់នេះបានផ្ញើរទៅទីស្តីការគណៈរដ្ឋមន្ត្រីរួមទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ