ប្រទេសជប៉ុនរៀបចំប្រើប្រព័ន្ធប្រឆាំងមីស្ស៊ីល
នៅថ្ងៃសុក្រទី២៣មីនាឆ្នាំ២០១២នេះ រដ្ឋាភិបាលជប៉ុនបានបញ្ជាឲ្យរៀបចំប្រើប្រព័ន្ធប្រឆាំងមីស្ស៊ីល។ ទាំងនេះនៅរយៈកាលបីសប្តាហ៍មុនការបាញ់កាំជ្រួចមីស្ស៊ីលដែលគ្រោងធ្វើដោយប្រទេសកូរ៉េខាងជើងនៅពាក់កណ្តាលខែមេសាខាងមុខ។
ចុះផ្សាយនៅថ្ងៃ៖
ស្តាប់ - ០៥:៤៣
រដ្ឋមន្ត្រីក្រសួងការពារជាតិជប៉ុនលោក Naoki Tanaka បានប្រកាសឲ្យដឹងនៅថ្ងៃសុក្រទី២៣មីនាឆ្នាំ២០១២នេះថា “រដ្ឋាភិបាលជប៉ុនបានចេញបញ្ជាឲ្យរៀបចំប្រើប្រព័ន្ធប្រឆាំងមីស្ស៊ីល (PAC-3) ហើយនិងនាវាចម្បាំងប្រដាប់ដោយកាំជ្រួចប្រឆាំងមីស្ស៊ីល Standard Missile-3 ឬ (SM-3)”។
“កងកម្លាំងការពារខ្លួនជប៉ុន” ដែលជាឈ្មោះផ្លូវការរបស់កងកម្លាំងយោធាជប៉ុននឹងប្រកាសដាក់ក្នុងភាពអាសន្នការប្រើប្រព័ន្ធប្រឆាំងមីស្ស៊ីល sol-air Patriot Advnced Capability (PAC-3) ហើយនិងនាវាចម្បាំងប្រដាប់ដោយប្រព័ន្ធប្រឆាំងមីស្ស៊ីល Standard Missile-3 (SM-3)។
គួរកត់សម្គាល់ថា ការប្រើប្រព័ន្ធប្រឆាំងមីស្ស៊ីលនៃកងកម្លាំងយោធាជប៉ុនមានពីរគន្លាក់៖
-ទី១ ការប្រើប្រព័ន្ធប្រឆាំងមីស្ស៊ីល Standard Missile-3 (SM-3)ដែលមានសមត្ថភាពអាចស្ទាក់ប្រឆាំងនៅក្នុងលំហអាកាសខ្ពស់។ ប្រព័ន្ធប្រឆាំងមីស្ស៊ីល Standard Missile-3 (SM-3)នេះសំដៅស្ទាក់កំទេចមីស្ស៊ីលដែលហោះបានចម្ងាយជិតនិងចម្ងាយមធ្យម។
-ទី២ គឺការប្រើប្រព័ន្ធប្រឆាំងមីស្ស៊ីល sol-air Patriot Advnced Capability (PAC-3)សម្រាប់ស្ទាក់កំទេចកាំជ្រួចមីស្ស៊ីលរបស់បច្ចាមិត្តនៅវគ្គបញ្ចប់។
មូលហេតុដែលនាំឲ្យរដ្ឋាភិបាលជប៉ុនចេញបញ្ជាឲ្យរៀបចំប្រើប្រព័ន្ធប្រឆាំងមីស្ស៊ីលនៅពេលនេះ មកពីរដ្ឋាភិបាលជប៉ុនបារម្ភខ្លាចកាំជ្រួចមីស្ស៊ីលឬបំណែកនៃកាំជ្រួចមីស្ស៊ីលរបស់ប្រទេសកូរ៉េខាងជើងធ្លាក់ទៅលើដែនដីឬដែនសមុទ្រជប៉ុន។ ហើយនៅរវាងសប្តាហ៍ក្រោយ លោកនាយករដ្ឋមន្ត្រីជប៉ុន Yoshihiko Noda នឹងចេញបញ្ជាជាផ្លូវការឲ្យកំទេចកាំជ្រួចមីស្ស៊ីលរបស់ទីក្រុងព្យុងយ៉ាង នៅករណីដែលកាំជ្រួចកូរ៉េខាងជើងអាចគំរាមដល់ដែនដីរបស់ជប៉ុន។
ទីក្រុងព្យុងយ៉ាងឯណោះវិញ បានប្រកាសឲ្យដឹងកាលពីសប្តាហ៍មុនថា កូរ៉េខាងជើងនឹងបាញ់បង្ហោះកាំជ្រួចផ្ទុកផ្កាយរណបមួយនៅរវាងថ្ងៃទី១២និង១៦មេសាខាងមុខ។ ហើយជាន់ទី១នៃកាំជ្រួចបង្ហោះនោះនឹងត្រូវធ្លាក់ទៅក្នុងសមុទ្រលឿងឋិតនៅប៉ែកខាងលិចនៃឧបទ្វីបកូរ៉េ។ ចំណែកឯជាន់ទីពីរវិញនឹងត្រូវធ្លាក់នៅប៉ែកខាងកើតនៃប្រទេសហ្វីលីពីន ឬអាចហោះឆ្លងកាត់ទីប្រជុំកោះអូគីណាវ៉ាដែលឋិតនៅប៉ែកខាងត្បូងបំផុតនៃប្រទេសជប៉ុន។
បើយោងតាមទិនានុប្បវត្តិ Sankei Shimbun ក្រសួងការពារជាតិជប៉ុនអាចនឹងបញ្ជូននាវាចម្បាំងពីរគ្រឿងប្រដាប់ដោយប្រព័ន្ធប្រឆាំងមីស្ស៊ីលទៅជិតកោះអូគីណាវ៉ា ហើយនិងមួយគ្រឿងទៀតទៅកាន់សមុទ្រជប៉ុនដែលឋិតនៅចន្លោះឧបទ្វីបកូរ៉េនិងទីប្រជុំកោះជប៉ុន។ រីឯប្រព័ន្ធប្រឆាំងមីស្ស៊ីល sol-air Patriot Advnced Capability (PAC-3)អាចនឹងត្រូវយកទៅដាក់នៅលើកោះអូគីណាវ៉ា។
នៅចំពោះមុខស្ថានការណ៍បែបនេះ សេតវិមានបានធ្វើការព្រមាននៅថ្ងៃសុក្រនេះថា “សហរដ្ឋអាមេរិកនិងសម្ព័ន្ធមិត្ត នឹងធ្វើការ “ឆ្លើយតបវិញយ៉ាងមុតមាំ” ទៅប្រទេសកូរ៉េខាងជើង បើប្រសិនជាទីក្រុងព្យុងយ៉ាងនៅតែរឹងរូសធ្វើការបាញ់បង្ហោះកាំជ្រួចមីស្ស៊ីលរបស់ខ្លួន ទោះបីជាមានការព្រមានប្រឆាំងពីសំណាក់សហគមន៍អន្តរជាតិយ៉ាងណាក៏ដោយ។
ចំណែកឯអគ្គលេខាធិការនៃអ.ស.ប.លោក បាន គីមូន ដែលកំពុងបំពេញទស្សនកិច្ចនៅអាស៊ីបានថ្លែងព្រមានកូរ៉េខាងជើងថា “ការបាញ់កាំជ្រួចមីស្ស៊ីលដោទីក្រុងព្យុងយ៉ាងគឺជាការរំលោភមួយយ៉ាងជាក់ច្បាស់ទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប.ដែលបានហាមឃាត់កូរ៉េខាងជើងពុំឲ្យធ្វើការសាកល្បងកាំជ្រួចអន្តរទ្វីប។ លោកបាន គីមូនបានព្រមានទៀតថា “ការបាញ់កាំជ្រួចមីស្ស៊ីលដោទីក្រុងព្យុងយ៉ាងនេះអាចធ្វើឲ្យប៉ះពាល់ដល់ការផ្តល់ជំនួយស្បៀងអាហារឲ្យប្រទេសកូរ៉េខាងជើងដែលប្រជាជនកំពុងរងគ្រោះនឹងកង្វះចំណីអាហារ”។
គួររំលឹកថា កាលពីចុងខែកុម្ភៈកន្លងទៅ ទីក្រុងវ៉ាស៊ីនតោនបានប្រកាសឲ្យដឹងថា សហរដ្ឋអាមេរិកនឹងបញ្ជូនជំនួយស្បៀងអាហារប្រមាណ២៤០ ០០០តោនទៅឲ្យកូរ៉េខាងជើង បើប្រសិនជាទីក្រុងព្យុងយ៉ាងសន្យាថានឹងពុំបាញ់សាកល្បងកាំជ្រួចមីស្ស៊ីលអន្តរទ្វីប ផ្អាកកម្មវិធីនុយក្លអ៊ែរ ហើយនិងអនុញ្ញាតឲ្យមានការត្រួតពិនិត្យដោយអធិការនៃទីភ្នាក់ងារអន្តរជាតិខាងថាមពលបរមាណូ AIEA ។
ប្រទេសចិនឯណេះវិញ បានប្រកាសអំពាវនាវឲ្យរាល់ភាគីពាក់ព័ន្ធ “រក្សាភាពស្ងប់ស្ងៀម ចៀសវាងកុំធ្វើឲ្យស្ថានការណ៍ធ្លាក់ចុះដុនដាបបន្ថែមទៀត” នេះជាពាក្យសម្តីរបស់លោក Hong Lei អ្នកនាំពាក្យនៃក្រសួងការបរទេសចិន។ ដោយហេតុថា ទីក្រុងប៉េកាំងពុំចង់ឲ្យកើតមានស្ថានភាពវិកវរនៅក្បែរព្រំដែនខាងជើងរបស់ខ្លួនឡើយ ជាពិសេសនៅខណៈពេលដែលទីក្រុងប៉េកាំងកំពុងត្រូវការ “សន្តិភាព”សម្រាប់អភិវឌ្ឍសេដ្ឋកិច្ចនិងអានុភាពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ