សាក្សីកូរ៉េខាងជើង៖អ្នកទន់ខ្សោយបានស្លាប់មុនគេ នៅក្នុងពេលកើតគ្រោះទុរ្ភិក្ស
សាក្សីជនជាតិកូរ៉េខាងជើងដែលបានរត់រួចពីប្រទេសកំណើតបាននិយាយប្រាប់ពីស្ថានភាពជាក់ស្តែងនៅកូរ៉េខាងជើងក្នុងពេលកើតមានគ្រោះទុរ្ភិក្ស។ នៅចំពោះមុខគណៈកម្មការស៊ើបអង្កេតរបស់អង្គការសហប្រជាជាតិ សាក្សីកូរ៉េខាងជើងចំនួនពីរនាក់បានបញ្ជាក់ថា នៅក្នុងពេលកើតមានគ្រោះទុរ្ភិក្សចន្លោះឆ្នំា ១៩៩៤-១៩៩៨ អ្នកដែលទទួលរងគ្រោះស្លាប់មុនគេ គឺកូនក្មេង មនុស្ស និងជនពិការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ប្រជាជនកូរ៉េខាងជើងមិនបានរស់នៅក្នុងភាពថ្លៃថ្នូរ និងពេលខ្លះត្រូវបានគេចាត់ទុកដូចជាសត្វធាតុអ៊ីចឹង នេះជាការថ្លែងរបស់លោក Ji Seong-Ho នៅចំពោះមុខគណៈកម្មការស៊ើបអង្កេតរបស់អង្គការសហប្រជាជាតិ។ លោក Ho ដែលបានកំបុតដៃម្ខាង និងជើងម្ខាងដោយការលួចធ្យូងនៅពេលលោកមានអាយុ ១៤ឆ្នំា។ បច្ចុប្បន្នមានអាយុ ៣១ឆ្នំា លោក Ho បានបញ្ជាក់ថា នៅកូរ៉េខាងជើង មនុស្សពិការផ្នែកកាយសម្បទា ឬមួយផ្នែកបញ្ញាស្មារតីត្រូវបានរបបចាត់ទុកជាមនុស្សគ្មានប្រយោជន៍នៅក្នុងសង្គម។
គួររម្លឹកជូនថា គ្រោះទុរ្ភិក្សនៅកូរ៉េខាងជើងចន្លោះឆ្នំា ១៩៩៤-១៩៩៨ បានសម្លាប់ប្រជាជនកូរ៉េខាងជើងរហូតដល់ទៅ ១លាននាក់ក្នុងចំនួនប្រជាជនសរុប ២០លាននាក់។ ក្នុងពេលនោះ ប្រជាជនកូរ៉េខាងជើងម្នាក់ៗបានប្រឹងប្រែងរស់តែរៀងៗខ្លួន ទៅតាមមធ្យាបាយដែលអាចធ្វើទៅបាន។ តែអ្វីដែលគួរឲ្យរន្ធត់ និងខ្លោចផ្សារ អ្នកផុយស្រួយដូចយ៉ាងកូនក្មេង មនុស្សចាស់ និងជនពិការបានទទួលរងគ្រោះស្លាប់មុនគេ។ តាមការរៀបរាប់របស់លោក Ho ដែលបានរត់រួចពីប្រទេសកំណើតក្នុងឆ្នំា ២០០៦ ឲ្យដឹងថា មនុស្សពិការដែលគេធ្លាប់ឃើញមានច្រើននៅមុនកើតមានគ្រោះទុរ្ភិក្ស បានស្លាប់គ្មានសល់នៅពេលដែលស្ថានការណ៍បានប្រសើរបន្តិចនាដំណាច់ទសវត្សឆ្នំា ៩០។
សាក្សីម្នាក់ទៀត គឺលោក Kim Hyuk ដែលបច្ចុប្បន្នមានអាយុ ៣២ឆ្នំា និងដែលបានរត់ចេញពីប្រទេសកំណើតឆ្លងចូលប្រទេសចិនក្នុងឆ្នំា ២០០០ មុននឹងបន្តឆ្លងចូលក្នុងទឹកដីកូរ៉េខាងត្បូង។ លោក Kim Hyuk ដែលបានក្លាយជាក្មេងរស់តាមចិញ្ចើមថ្មល់ក្នុងអាយុ ៧ឆ្នំា ពោលនៅក្រោយម្តាយស្លាប់ចោល។ លោក Kim បានរៀបរាប់ថា នៅមុនកើតមានគ្រោះទុរ្ភិក្ស ក្មេងរស់តាមចិញ្ចើមថ្នល់បានទទួលនំ ចំណីពីអ្នកដំណើរតាមផ្លូវ។ តែក្នុងពេលគ្រោះទុរ្ភិក្ស គ្មាននរណាឲ្យអ្វីទៀតទេ ហើយក្មេងទំាងនោះបានផ្តើមដេកស្លាប់ម្តងមួយៗ។ អ្នកដែលនៅរស់ត្រូវបានក្រុមប៉ូលិសប្រមូលយកទៅដាក់ក្នុងមជ្ឈមណ្ឌលកុមារកំព្រា តែនៅទីបំផុតបានធ្លាក់ខ្លួនស្លាប់ដូចគ្នាដោយកំបំាងពីមុខសាធារណជនទូទៅ។ លោក Kim ដែលបានរស់ក្នុងជំរំកុមារកំព្រារយៈពេល ៣ឆ្នំាបានរៀបរាប់ថា ក្មេងកំព្រារស់ដោយបរិភោគស្លឹកពោតដែលគេកិនជាម្សៅ ហើយរូបលោកផ្ទាល់បានបរិភាគសត្វជីងចក់ ពស់ កណ្តុរ និងស្មៅ។
គួរបញ្ជាក់ជូនថា សាក្សីជនជាតិកូរ៉េខាងជើងទំាងពីរនាក់បានរៀបរាប់រឿងរ៉ាវទំាងនេះនៅចំពោះមុខគណៈកម្មការស៊ើបអង្កេតរបស់អង្គការសហប្រជាជាតិដែលបានផ្តើមបើកការអង្កេតជាផ្លូវការលើកទីមួយស្តីពីសិទ្ធិរបស់ពលរដ្ឋកូរ៉េខាងជើងក្រោមការដឹកនំារបស់ត្រកូលគីម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ