អង្គការសិទ្ធិមនុស្ស ជំរុញឲ្យលីបង់បញ្ចប់ការរំលោភបំពានចំពោះអ្នកបម្រើការងារតាមផ្ទះ
នៅលីបង់, អ្នកបម្រើការងារតាមផ្ទះ ដែលភាគច្រើនជានារីភេទ ត្រូវរងការរំលោភបំពានសិទ្ធិយ៉ាងធ្ងន់ធរ។ អ្នកខ្លះត្រូវបង្ខាំងនៅក្នុងផ្ទះ, មិនឲ្យចេញទៅក្រៅឬចេញពីប្រទេសលីបង់ បើគ្មានការអនុញ្ញាតពីម្ចាស់ផ្ទះ, ហើយត្រូវធ្វើការងារយ៉ាងទម្ងន់, គ្មានកំណត់ម៉ោងពេល, និងគ្មានបានសម្រាកទទួលទានបាយទឹកអីស្រួលបួលឡើង រហូតដល់ ស្ត្រីបម្រើការងារតាមផ្ទះ មួយចំនួន ស្ទើរតែទ្រាំនឹងទុក្ខវេទានមិនបាន ហើយនឹកចង់ធ្វើអត្តឃាតទៀតផង។
ចុះផ្សាយនៅថ្ងៃ៖
នេះបើតាមរបាយការណ៍ស៊ើបអង្កេតរបស់អង្គការសិទ្ធិមនុស្ស Amnesty International ចេញផ្សាយនៅថ្ងៃពុធនេះ ពីទីក្រុងឡុង ហើយអង្គការនេះ ទាមទារឲ្យ លីបង់ រកដំណោះស្រាយ បិទបញ្ចប់ការបំពានសិទ្ធរបស់ពលករទាំងនោះ។
របាយការណ៍ គឺផ្អែកលើការសម្ភាសស្ត្រីចំនួន៣២នាក់ នៅតំបន់ Beyrouth ហើយរកឃើញថា ស្ថានភាពការងាររបស់ពួកគេ គឺគួរឲ្យព្រួយបារម្ភជាខ្លាំង ដោយសារតែមានរំលោភសិទ្ធិជាប្រព័ន្ធតែម្តង។ ក្នុងចំណោមអ្នកផ្តល់សម្ភាសនោះ គឺមាន៦នាក់ ឆ្លើយថា នាងត្រូវម្ចាស់ផ្ទះបង្ខាំងមិនឲ្យចេញក្រៅ ហើយ៦នាក់ សារភាពថា ពួកនាងមានគំនិតសម្លាប់ខ្លួនឯង។ នារីម្នាក់ផ្តល់សក្ខីកម្មថា «ពេលខ្លះ ខ្ញុំឃ្លានស្ទើរស្លាប់។ ខ្ញុំលាយទឹកនិងស្ករផឹក។»
គួរបញ្ជាក់ដែរថា លីបង់ បានទទួលពលករបម្រើការតាមផ្ទះ ចំនួនជាង ២៥០ ០០០ នាក់ ភាគច្រើនជាស្ត្រី មកពីអាហ្វ្រិក និងអាស៊ី។
នាប៉ុន្មានឆ្នាំចុងក្រោយនេះ ដោយបានឃើញពីទុក្ខវេទនាបែបនេះ ប្រទេសអេត្យូពី និងហ្វីលីពីន បានសម្រេចហាមឃាត់ពលរដ្ឋខ្លួន មិនឲ្យចេញទៅធ្វើការតាមផ្ទះនៅលីបង់ឡើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ