យន្តហោះម៉ាឡេស៊ីបាត់ ៖ អ្នកបើកបរមានឧបករណ៍ហោះហើរគំរូនៅផ្ទះ
មហាសមុទ្ទឥណ្ឌាទាំងមូល បានក្លាយជាតំបន់ស្វែងរកយន្តហោះប៊ូអ៊ីនម៉ាឡេស៊ីបាត់ខ្លួនកាលពី៨ថ្ងៃមុន កញ្ចក់ពីរ៉ាដា។ ជាអ្នកដំណើរ ជាអ្នកបំរើការងារតាមយន្តហោះ និង ជាអ្នកបើកបរ មនុស្ស ២៣៩នាក់ កំពុងទទួលបានការចាប់អារម្មណ៍ដូចគ្នាពីអ្នកអង្កេត ... ព្រោះសេចក្តីសន្និដ្ឋានផ្លូវការចុងក្រោយ យល់ថា យន្តហោះបាត់ ជាស្នាដៃ និងចេតនារបស់មនុស្ស... ជនសង្ស័យដំបូងគេ គឺអ្នកបើកបរ ! ក្នុងពេលឆែកឆេរ ប៉ូលិសបានរកឃើញឧបករណ៍បញ្ជាហោះហើរគំរូ ជាល្បែងហោះលេងក្នុងផ្ទះអ្នកបើកបរយន្តហោះវ័យចំណាស់ ជាមេបញ្ជាការបើកបរ។
ចុះផ្សាយនៅថ្ងៃ៖
ស្តាប់ - ០២:០៥
ការអង្កេតបានផ្តោតយ៉ាងខ្លាំងទៅលើបុគ្គលិកលក្ខណៈនិងប្រវត្តិរបស់អ្នកដំណើរ និងបុគ្គលិកបំរើការយន្តហោះ និងជាពិសេសទៅលើអ្នកបើកបរទាំងពីរ។ សេណារីយោ ធ្លាក់យន្តហោះដោយហេតុបញ្ហាបច្ចេកទេស មិនអាចយកជាបានការទៀតទេ ព្រោះប្រព័ន្ធទាក់ទង ត្រូវបានកាន់គេកាច់បិទដោយចេតនា ១២នាទី មុនយន្តហោះបាត់ពីកញ្ចក់រ៉ាដា។
សម្រាប់អ្នកអង្កេត មានលទ្ធភាពពីរ ៖ ទីមួយគឺជាការបង្វែរដាន ? ដែលយើងមិនអាចដឹងបុព្វហេតុបានឡើយប្រសិនបើរកដានយន្តហោះមិនឃើញ ឬគ្មាននរណាប្រកាសទទួលស្គាល់ជាអ្នកបញ្ជាពីក្រោយ។ មួយទៀត អាចជាប្រតិបត្តិការសម្លាប់ខ្លួន របស់អ្នកបើកបរ?
ហេតុផលនយោបាយ សាសនា ជំនឿ គ្រួសារចិត្តសាស្ត្រ ត្រូវបានលើកយកវិភាគលម្អិតទាំងអស់។ ក្រុមអ្នកអង្កេតបានទៅឆែកឆេរផ្ទះអ្នកបើកបរទាំងពីរ រកឃើញឧបករណ៍បញ្ជាហោះហើរគំរូ សម្រាប់ជាល្បែងជិះលេងកំសាន្ត នៅក្នុងផ្ទះអ្នកបើកបរធំ វ័យចំណាស់ ប្រកបដោយបទពិសោធន៍។ វាមិនមែនជាការកម្រទេ ដែលអ្នកបើកយន្តហោះមានជំនក់ចិត្តផលិតល្បែងកំសាន្តដោយខ្លួនបែបនេះទុកនៅក្នុងផ្ទះ។ ពេលនេះប៉ូលិសដែលមិនបានបញ្ជាក់ថារឹបអូសឬអត់ទេ កំពុងវិភាគឧបករណ៍យ៉ាងហ្មត់ចត់បំផុត។
បើតាមសារព័ត៌មានអង់គ្លេស Daily Mail ចាប់អារម្មណ៍ខ្លាំងនឹងជីវិតនយោបាយរបស់អ្នកបើកបរធំ ព្រោះជាសកម្មជនគាំទ្របក្សប្រឆាំងរបស់លោក អាន់វ៉ា អ៊ីប្រាហ៊ីម ដ៏មុះមុត ... មេបញ្ជការយន្តហោះ MH៣៧០ បានចេញទៅបើកយន្តហោះទាំងទឹកចិត្តមួរហ្មង ព្រោះលោកអាន់វ៉ា អ៊ីប្រាហ៊ីម ត្រូវតុលាការកាត់ទោសឱ្យជាប់ពន្ធនាគារ៥ឆ្នាំ។ ប៉ុន្តែការវិភាគនេះ ត្រូវបានបដិសេធដោយបក្សប្រឆាំង និងអះអាងថាគ្មានហេតុផលនយោបាយលាយលំទេអ្នកបើកបរយើងទេ ព្រោះជាមនុស្សប្រកបដោយការទទួលខុសត្រូវបំផុត។
នៅសល់ចំណុចចុងក្រោយ ដែលមិនគួរបំភ្លច គឺអ្នកដំណើរពីរនាក់ លួចលិខិតឆ្លងដែនគេ ដែលពេលនេះអ្នកអង្កេតមិនបានបង្ហើបអ្វីឱ្យដឹងសោះ ទាក់ទងនឹងជនសង្ស័យនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ