ខ្មែរ១៣ម៉ឺននាក់ធ្វើចំណាកស្រុកក្នុងឆ្នាំ២០១២
មានពលរដ្ឋចំណាកស្រុកចំនួន១៣ម៉ឺននាក់ដែលបានចាកចេញទៅប្រទេសជិតខាងរបស់កម្ពុជានៅក្នុងឆ្នាំ២០១២ កន្លងទៅ។ នេះបើតាមការអះអាងរបស់រដ្ឋមន្ត្រីក្រសួងការងារ លោកវង្ស សូត្រ។ ចំណាកស្រុកនៅតែជាបញ្ហាធ្ងន់ធ្ងររបស់កម្ពុជា។ ហេតុដូច្នេះហើយ ក្នុងរយៈពេល៣ថ្ងៃនេះ សិក្ខាសាលាថ្នាក់ជាតិមួយស្តីពីការគ្រប់គ្រងទេសចន្តប្រវេសន៍ការងារត្រូវបានរៀបចំនៅក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០១:៥៣
មានពលរដ្ឋខ្មែរចំនួន១៣០ ០០០នាក់កាលពីឆ្នាំ២០១២កន្លងទៅនេះ ដែលបានធ្វើចំណាកស្រុក។ តួលេខនេះត្រូវបានប្រកាសអោយដឹងដោយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកវង្ស សូត្រ។ លោកវង្ស សូត្រដែលបានបញ្ជាក់ថា ពលរដ្ឋខ្មែរបានចាកចេញទៅប្រទេសថៃច្រើនជាងគេ។ លោករដ្ឋមន្ត្រីបាននិយាយអំពីពលករខ្មែរចំណាកស្រុកនេះ នៅក្នុងសិក្ខាសាលាថ្នាក់ជាតិរយៈ ៣ថ្ងៃស្តីអំពីការគ្រប់គ្រងទេសន្តប្រវេសន៍ការងារដែលកំពុងប្រព្រឹត្តិទៅក្នុងក្រសួងមហាផ្ទៃ។
កម្ពុជាកំពុងតែរកវិធានការទប់ស្កាត់ចំណាកស្រុកនៃពលរដ្ឋរបស់ខ្លួន ដោយសារតែទីមួយ ចំណាកស្រុកនេះបានធ្វើអោយពលរដ្ឋមួយចំនួនរងទុក្ខទោស និងពើបប្រទះការជួញដូរ។ ទី២ កម្ពុជាកំពុងខ្វះខាតកំលាំងពលកម្មក្នុងស្រុក។ លោករដ្ឋមន្ត្រីក្រសួងការងារបានបន្តថា ស្ត្រី និងកុមារគឺជាអ្នកងាយរងគ្រោះជាងគេ ប្រឈមនឹងការកេងប្រវ័ញ្ចកំលាំងពលកម្ម ការជួញដូរផ្លូវភេទ និងការជួញដូរថ្នាំញៀនផង។
លោករដ្ឋមន្ត្រីបញ្ជាក់ថា ការកាត់បន្ថយចំណាកស្រុកអោយនៅទាប នឹងអាចជួយពលរដ្ឋអោយឃ្លាតឆ្ងាយពីការជួញដូរ និងការកេងប្រវ័ញ្ចទាំងនោះ។ របាយការណ៍ដែលផ្សាយដោយគេហទំព័រប៉ូលីសជាតិបានបង្ហាញថា នៅក្នុងឆ្នាំ២០១២កន្លងទៅនេះ ចំនួនពលករខ្មែរដែលកម្ពុជាបានទទួលពីអាជ្ញាធរបរទេសបានកើនឡើង ៤ ៨២៥នាក់ បើធៀបជាមួយឆ្នាំ២០១១។ ពោលគឺកម្ពុជាទទួលពលករចំណាកស្រុកពីប្រទេសថៃចំនួន ១២៣ ២៦១នាក់ ពីប្រទេសវៀតណាម ២៥៩នាក់ និងពីប្រទេសឡាវ ៨៦នាក់។
មន្ត្រីរដ្ឋាភិបាលកម្ពុជា និងលោកនាយករដ្ឋមន្ត្រីផងបានអំពាវនាវញឹកញាប់មិនអោយពលរដ្ឋខ្មែរឆ្លងដែនខុសច្បាប់ និងធ្វើចំណាកស្រុកទៅបរទេសឡើយ ហើយអោយពួកគេស្វែងរកការងារនៅក្នុងប្រទេសវិញ។ ចុងក្រោយនេះ លោកប្រមុខរដ្ឋាភិបាលកម្ពុជាបានចេញសារាចរប្រកាសដាក់ទណ្ឌកម្មមន្ត្រីមានសមត្ថកិច្ចនៅតាមច្រកព្រំដែនតែម្តង ប្រសិនមានករណីឆ្លងដែនខុសច្បាប់នៅតាមអង្គភាពប្រចាំការណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ