ក្រសួងការងារសម្រេចដំឡើងប្រាក់ខែកម្មកររោងចក្រដល់ ១០០ដុល្លារ
បន្ទាប់ពីកម្មកររោងចក្រ ធ្វើបាតុកម្មតវ៉ាអស់រយៈពេលជាច្រើនថ្ងៃ ក្រសួងការងារបានសម្រេចដំឡើងប្រាក់ខែគោលដល់កម្មករកាត់ដេរដល់ ១០០ដុល្លារ គឺបន្ថែម៥ដុល្លារទៀត ពីលើការសម្រេចលើកមុន។ សេចក្តីសម្រេចនេះ ចាប់អនុវត្តពីថ្ងៃទី១ ខែកុម្ភៈឆ្នាំ ២០១៤នេះតទៅ។ ប៉ុន្តែ ការសម្រេចនេះមិនបានធ្វើឲ្យក្រុមបាតុករស្ងប់ចិត្តទេ។ តំណាងសហជីពកម្មករនៅតែបន្តខ្វែងគំនិតគ្នាដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
នៅថ្ងៃអង្គារទី ៣១ធ្នូនេះ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសសម្រេចដំឡើងប្រាក់ខែដល់កម្មកររោងចក្រកាត់ដេរ ពី ៨០ដុល្លារ ទៅ ១០០ដុល្លារ ដែលនឹងត្រូវបាប់ផ្តើមអនុវត្ត នៅថ្ងៃទី ១កុម្ភៈឆ្នាំ ២០១៤ខាងមុខនេះ។ ប៉ុន្តែ ការសម្រេចនេះ នៅតែធ្វើឲ្យសហជីពខ្វែងគំនិតគ្នាដដែល។
ក្រុមសហជីពកម្មករកាត់ដេរ ដែលដឹកនាំបាតុកម្ម ប្រកាសមិនទទួលយក ហើយពួកគេទាមទារឲ្យមានការចរចាថ្មីមួយ ដើម្បីពិភាក្សាគ្នាឲ្យបានច្បាស់លាស់ ហើយភាគីទាំងសងខាងត្រូវតែឯកភាពគ្នា ចំពោះការសម្រេចដំឡើងប្រាក់ខែកម្មករនៅពេលនេះ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីកាឌូ លោក គង់ អាទិត្យបានប្រាប់វិទ្យុបារាំងនៅរសៀលនេះថា សហជីពរបស់លោកមិនអាចទទួលយកការសម្រេចរបស់ក្រសួងការងារបានទេ។ លោក បានបញ្ជាក់ថា ការសម្រេចនេះ ពុំមានការពិភាក្សាគ្នា ហើយធ្វើឡើង តែភាគីរដ្ឋាភិបាលម្នាក់ឯង។
លោក គង់ អាទិត្យនៅតែអះអាង ថា ក្រុមសហជីពកាត់ដេរ នឹងនៅតែរក្សាជំហររបស់ខ្លួនក្នុងការទាមទារដំឡើងប្រាក់ខែអប្បមា ១៦០ដុល្លារ ដល់កម្មកររោងចក្រកាត់ដេរដដែល។ ផ្ទុយពីនេះ ប្រធានក្រុមប្រឹក្សាសហជីពជាតិកម្ពុជា លោក សោម អូន បានយល់ស្រប ហើយអះអាងថា ការសម្រេចនៅពេលនេះ មានលក្ខណៈល្អប្រសើរជាងការសម្រេចលើកមុន។
គួរបញ្ជាក់ដែរថា នៅថ្ងៃអង្គារទី ៣១ធ្នូនេះដែរ ប្រធានសមាគមរោងចក្រកាត់ដេរកម្ពុជា ជីម៉ាក់ បានចេញសេចក្តីប្រកាសព័ត៌មានមួយ ដោយបង្ហាញពីការយាយីមកលើសហជីពទាំង៦ របស់លោក រ៉ុង ឈុន, លោកអាត់ ធន់, លោក ប៉ាវ ស៊ីណា, លោកជា មុនី, លោកស្រីម៉ម ញឹម និងលោកស្រី យ៉ាង សោភ័ណ្ឌ។ ក្រុមនិយោជកចោទសហជីពទាំងនោះថា បានបង្កការរំខានដល់ក្រុមកម្មករកាត់ដេរចំនួន ៩០% ដែលជារួមមកពីប្រមាណជា ៥៥៩ រោងចក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ