ក្រសួងព័ត៌មានផ្តួចផ្តើមបង្កើតសហព័ន្ធអ្នកសារព័ត៌មានជាតិកម្ពុជា
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានផ្តួចផ្តើមគំនិតបង្កើតសហព័ន្ធអ្នកសារព័ត៌មានជាតិកម្ពុជា ដើម្បីប្រមូលផ្តុំសមាគមអ្នកសារព័ត៌មាននានានៅកម្ពុជា និងដើម្បីជ្រើសរើសតំណាងសម្រាប់ចូលរួមនៅក្នុងការប្រជុំអន្តរជាតិ អំពីវិស័យសារព័ត៌មាន។ ប្រមាណជា២០សមាគមអ្នកសារព័ត៌មាននៅកម្ពុជា ក្នុងចំណោមសមាគមទាំងអស់ចំនួន៣៤ បានចូលរួមប្រជុំ នាព្រឹកថ្ងៃអាទិត្យនេះ នៅសណ្ឋាគារសាន់វ៉េ ដើម្បីពិនិត្យមើលលទ្ធភាពបង្កើតអង្គការថ្មីនេះ។ បើតាមអ្នកចូលរួម ក្នុងជំហានដំបូង ក្រសួងនឹងផ្តល់ទីតាំងសម្រាប់សហព័ន្ធនេះ ប៉ុន្តែអ្នកនិយមឯករាជ្យភាពនៃសារព័ត៌មានបារម្ភថា នេះជាការប៉ុនប៉ងគ្រប់គ្រងអ្នកសារព័ត៌មាននៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
សហព័ន្ធអ្នកសារព័ត៌មានកម្ពុជានឹងក្លាយជាអង្គការសារព័ត៌មានថ្មីមួយ ដែលនឹងបង្រួបបង្រួមសមាគមអ្នកសារព័ត៌មាននៅកម្ពុជាឱ្យស្ថិតក្រោមដំបូលតែមួយ ប្រសិនបើមិនមានឧបសគ្គក្នុងការបង្កើត។ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលបានផ្តួចផ្តើមឱ្យបង្កើតស្ថាប័នថ្មីនេះ បានពន្យល់ នាព្រឹកថ្ងៃអាទិត្យនេះថា កន្លងទៅ សមាគមអ្នកសារព័ត៌មាននៅកម្ពុជាមានច្រើនពេក ហើយសហគមន៍អ្នកសារព័ត៌មានមិនទាន់មានតំណាងច្បាស់លាស់សម្រាប់ចូលរួមនៅក្នុងវេទិកាអន្តរជាតិនៅក្នុងក្របខ័ណ្ឌអាស៊ាន ឬក្របខណ្ឌពិភពលោកឡើយ។
គោលបំណងនៃសហព័ន្ធអ្នកសារព័ត៌មានកម្ពុជា គឺសម្រួលការចែករំលែកចំណេះដឹងអំពីវិស័យសារព័ត៌មាននៅក្នុងពិភពលោក ក្នុងចំណោមអ្នកសារព័ត៌មានកម្ពុជា។ ប្រធានក្រុមប្រឹក្សាសារព័ត៌មានកម្ពុជា ដែលបានចូលរួមក្នុងការប្រជុំនៅសណ្ឋាគារសាន់វ៉េនោះ បានប្រាប់ថា ក្រុមប្រឹក្សានេះ គាំទ្រគំនិតផ្តួចផ្តើមរបស់រដ្ឋមន្ត្រី។ លោក សុខ សុវណ្ណ បានបញ្ជាក់ថា ក្នុងជំហានដំបូង ក្រសួងព័ត៌មានផ្តល់ទីតាំងធ្វើការដល់សហព័ន្ធ និងចាត់ឱ្យអគ្គនាយកដ្ឋានពត៌មាន និងសោតទស្សន៍ជាអ្នកសម្របសម្រួល ប៉ុន្តែក្រសួងដែលមិនមានថវិកាសម្រាប់ការបង្កើតអង្គភាពថ្មីនេះ នឹង«មិនលូកដៃចូលក្នុងការងារគ្រប់គ្រងស្ថាប័ននេះទេ»។
លោក សុខ សុវណ្ណ បានបន្តថា អ្វីដែលត្រូវធ្វើចំពោះមុខ គឺការចងក្រងលក្ខន្តិកៈ និងបទបញ្ជាផ្ទៃក្នុងសម្រាប់សហព័ន្ធថ្មី ហើយបន្ទាប់មក គឺស្វែងរកមូលនិធិដើម្បីទ្រទ្រង់ប្រតិបត្តិការរបស់វា ដើម្បីឱ្យស្ថាប័ននេះ«ឯករាជ្យ»។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ មិនបានចូលរួមនៅក្នុងកិច្ចប្រជុំនោះទេ ប៉ុន្តែបានកត់សម្គាល់ឃើញថា កន្លងទៅ ក្រសួងព័ត៌មានតែងតែតាំងខ្លួនជាអ្នកគ្រប់គ្រង ឃ្លាំមើល និងដាក់សម្ពាធដល់អ្នកសារព័ត៌មាន។ លោក ប៉ាង ងួនទៀង បានចាត់ទុកទង្វើបែបនេះ ថាជា«កំហុសធ្ងន់»របស់ក្រសួងព័ត៌មាន។ បើតាមយោបល់របស់លោក សមាគមសារព័ត៌មានជាច្រើន ដែលបានទទួលអាជ្ញាប័ណ្ណពីក្រសួងនេះ អត់ដំណើរការ ដោយសារកង្វះគោលនយោបាយ ឬផែនការយុទ្ធសាស្ត្រ សម្រាប់ឧបត្ថម្ភគាំទ្រអង្គការអ្នកសារព័ត៌មានទាំងនោះ។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យបានទទួចឱ្យក្រសួងព័ត៌មានជួយអង្គភាពសារព័ត៌មានឱ្យបានច្រើន ក្នុងផ្នែកបច្ចេកទេស ហិរញ្ញវត្ថុ វិសាលភាពនៃការផ្សព្វផ្សាយ និងសមត្ថភាពរបស់អ្នកសារព័ត៌មាន។
បច្ចុប្បន្ន កម្ពុជាមានសមាគមសារព័ត៌មាន៣៤ ហើយក្រុមប្រឹក្សាសារព័ត៌មានកម្ពុជាមានសមាជិកសកម្ម១០សមាគម និងអសកម្ម៧សមាគមផ្សេងទៀត។ ប៉ុន្តែ លោក ប៉ាង ងួនទៀង បានទទូចថា ដរាបណាក្រសួងព័ត៌មានមិនមានគោលការណ៍ឧបត្ថម្ភច្បាស់លាស់ទេ ការបង្កើតសមាគម ឬសហព័ន្ធប៉ុន្មានទៀត«ក៏គ្មានអ្វីប្លែកដែរ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ