ក្រសួងមហាផ្ទៃ៖ ការចល័តកងកម្លាំងប្រដាប់អាវុធធ្វើឡើងដើម្បីការពារសន្តិសុខ ស្ថិរភាពស្រុកទេស
លោកឧបនាយករដ្ឋមន្ដ្រី ស ខេង រដ្ឋមន្ដ្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោត ទទួលស្គាល់ថា ពិតជាមានការចល័តកងកម្លាំងប្រដាប់អាវុធមែន។ លោកបញ្ជាក់ថា នេះគ្រាន់តែជាការត្រៀមកម្លាំងការពារសន្តិសុខ សុវត្ថិភាពជូនប្រជាពលរដ្ឋ។ ការពារសន្តិសុខ ខណៈមានការលើកឡើងពីគម្រោងធ្វើមហាបាតុកម្មជាច្រើនលើកច្រើនសា ពីសំណាក់លោក សម រង្ស៊ី ប្រធានគណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០១:៤៥
លោកឧបនាយករដ្ឋមន្ដ្រី ស ខេង រដ្ឋមន្ដ្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោត ទទួលស្គាល់ថា ពិតជាមានការចល័តកងកម្លាំងប្រដាប់អាវុធមែន ក៏ប៉ុន្តែ វាគ្រាន់តែជាការត្រៀមកម្លាំងការពារសន្តិសុខ សុវត្ថិភាពជូនប្រជាពលរដ្ឋតែប៉ុណ្ណោះ។ លោកឧបនាយករដ្ឋមន្ដ្រី ស ខេង ថ្លែងដូច្នេះ នៅចំពោះមុខអ្នកសារព័ត៌មាន នៅក្រោយជំនួបជាមួយតំណាងអង្គការក្រៅរដ្ឋាភិបាលមួយចំនួន កាលពីព្រឹកថ្ងៃសុក្រ ទី៩ ខែសីហា នៅទីស្ដីការក្រសួងមហាផ្ទៃ។
ការចល័តទ័ពនេះ ត្រូវបានលោក ស ខេង អះអាងថា ត្រូវបានធ្វើឡើងក្រោយពេលលោក សម រង្ស៊ី ប្រធានគណបក្សសង្គ្រោះជាតិ បានប្រកាសពីគម្រោងធ្វើមហាបាតុកម្មជាច្រើនលើកច្រើនសា។ លោកឲ្យដឹងថា ការធ្វើបាតុកម្ម ជាការពិត គឺជាសិទ្ធិរបស់គណបក្សនយោបាយ ប៉ុន្តែត្រូវធ្វើនៅក្នុងក្របខណ្ឌច្បាប់ ប្រកបដោយសន្តិវិធី។ យ៉ាងណាក៏ដោយ លោក ស ខេង បានឲ្យដឹងថា លោកព្រួយបារម្ភ ដោយមិនដឹងថា គណបក្សសង្គ្រោះជាតិ អាចគ្រប់គ្រងអ្នកចូលរួមធ្វើបាតុកម្មបាន ឬមិនបាន ហើយនេះគឺជាមូលហេតុនៃការចល័តកងកម្លាំងប្រដាប់អាវុធ។ លោកបន្តថា វាគឺជាភារកិច្ចរបស់រដ្ឋាភិបាល ដើម្បីរក្សាសន្តិសុខ និងស្ថិរភាពស្រុកទេស។
ពាក់ព័ន្ធនឹងការចល័តកងកម្លាំងប្រដាប់អាវុធនេះ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានប្រាប់វិទ្យុបារាំងអន្តរជាតិថា នេះមិនមែនជាការគម្រាមកំហែង ឬក៏បំភ័យដល់អ្នកធ្វើបាតុកម្មដូចដែលព័ត៌មានមួយចំនួនបានអះអាងនោះទេ ពីព្រោះបាតុកម្មគឺជាសិទ្ធិរបស់ប្រជាពលរដ្ឋ។
បើតាមលោក ខេង ទីតូ កងកម្លាំងប្រដាប់អាវុធគ្រាន់តែត្រៀមលក្ខណៈដើម្បីអន្តរាគមឲ្យទាន់ពេលវេលា ក្នុងករណីដែលមានបញ្ហាកើតឡើង ជាពិសេសក្នុងករណីដែលមានជនខិលខូច លួចបន្លំ ក្នុងពេលបាតុកម្ម ដើម្បីបង្កចលាចលផ្សេងៗ។ អ្នកនាំពាក្យកងរាជអាវុធហត្ថបញ្ជាក់ទៀតថា សមត្ថកិច្ចសុខចិត្តឲ្យប្រជាពលរដ្ឋឃើញការត្រៀមលក្ខណៈរបស់កងកម្លាំង ប្រសើរជាងបណ្តោយឲ្យពួកគាត់ជួបគ្រោះអាសន្ន ជាយថាហេតុណាមួយ ដោយមិនបានត្រៀមជាមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ