ប្រទេសជាង៨០រួមគ្នាប្រយុទ្ធនឹងការលួចមិនបង់ពន្ធរដ្ឋ
ប្រទេសជាង ៨០បានចុះហត្ថលេខាលើកិច្ចព្រមព្រៀងពហុភាគីមួយ កាលពីថ្ងៃពុធទី ២៩ តុលា ដើម្បីរួមគ្នាប្រយុទ្ធប្រឆាំងនឹងការលួចគេចពន្ធ។ នៅក្នុងវេទិកាពិភពលោកស្តីពីតម្លាភាព និងការផ្លាស់ប្តូរព័ត៌មាន ដែលត្រូវបិទបញ្ចប់ កាលពីថ្ងៃពុធ នៅទីក្រុងប៊ែរឡាំង ប្រទេសអាល្លឺម៉ង់ ប្រទេសហត្ថលេខីបានយល់ព្រមឲ្យប្រព័ន្ធផ្លាស់ប្តូរជាស្វ័យប្រវត្តិរាល់ព័ត៌មានហិរញ្ញវត្ថុរវាងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អឺរ៉ុប អាស៊ី មិនថា ប្រទេសអ្នកមាន ឬអ្នកក្រ បានរួមគ្នាជាធ្លុងមួយ ដើម្បីចាត់វិធានការស្វែងរកមុខមនុស្សដែលគេច មិនបង់ពន្ធចូលកេសរដ្ឋ។ វិធានការដែលក្រុមប្រទេសជាង៨០បានចុះហត្ថលេខា កាលពីថ្ងៃម្សិលមិញ នឹងចាប់ដំណើរការជាស្វ័យប្រវត្តិ ចាប់ពីឆ្នាំ ២០១៧ និងឆ្នាំ ២០១៨។ មានន័យថា ប្រទេសចំនួន ៥១បានចុះហត្ថលេខាយល់ព្រមឲ្យបង្កើតអាជ្ញាធរជាតិមួយសម្រាប់ប្រយុទ្ធប្រឆាំងនឹងការលួចគេចពន្ធ។ អាជ្ញាធរជាតិរបស់ប្រទេសនីមួយ មានតួនាទី ប្រមូលព័ត៌មាន ទាក់ទងនឹងគណនេយ្យធនាគាររបស់ជនបរទេស ដែលរស់នៅក្នុងទឹកដី របស់ខ្លួន និងបន្ទាប់មក ត្រូវបញ្ជូន ចែករំលែកជាមួយប្រទេសដទៃទៀត។ ទិសដៅគឺដើម្បីឲ្យរដ្ឋបាលពន្ធរបស់ប្រទេសនីមួយៗ ដឹងពីចំនួនទឹកប្រាក់ ដែលប្រជាជនរបស់ខ្លួន បានតម្កល់ទុក នៅបរទេស ដើម្បីគេច មិនបង់ពន្ធក្នុងស្រុក។
ប្រជុំកោះ កាអ៊ីម៉ង់ ឬកោះរបស់អង់គ្លេស ជាច្រើន ដែលគេស្គាល់ជាជម្រកគេចពន្ធរបស់ក្រុមមហាសេដ្ឋីធំៗក្នុងលោក បានសន្យាថា នឹងបង្ហាញខ្ទង់សម្ងាត់របស់ធនាគាររបស់ខ្លួន ចាប់ពីឆ្នាំ ២០១៧។ ចំណែក ប្រទេសជាង៣០ទៀត ដូចជាអូទ្រីស ស្វីស ដែលគេចាត់ទុកជាឋានសួគ៍លោកិយធំបំផុត ក្នុងពិភពលោកសម្រាប់ក្រុមអ្នកមាន គេចមិនបង់ពន្ធជូនរដ្ឋនោះ បានសន្យាសហការ ចាប់ពីឆ្នាំ២០១៨តទៅ។
លោករដ្ឋមន្រ្តីហិរញ្ញវត្ថុអាល្លឺម៉ង់ ដែលបានដឹកនាំវេទិកាអន្តរជាតិ បានប្រកាសថា រឿងសម្ងាត់ផ្នែកធនាគារលែងមានតទៅទៀតហើយ។ អំណើះតទៅ អ្នកដែលលួច គេចមិនបង់ពន្ធនឹងត្រូវប្រឈមនឹងការអាក្រាត និងទទួលទោសពិន័យយ៉ាងធ្ងន់ធ្ងរ។
ដើមឡើយ គំនិតសហការដើម្បីផ្លាស់ប្តូរព័ត៌មានពីភាពសម្ងាត់របស់ធនាគារ កើតចេញពីគំនិតផ្តួចផ្តើមរបស់អាមេរិក ដែលបានប្រើច្បាប់របស់ខ្លួន ឈ្មោះ Facta កាលពីឆ្នាំ ២០១០។ នៅក្នុងយុទ្ធសាស្រ្តប្រយុទ្ធប្រឆាំងនឹងចរន្ធលួចគេចពន្ធ ច្បាប់អាមេរិក បានតម្រូវឲ្យគ្រប់ធនាគារបរទេសដែលមាននៅលើទឹកដីអាមេរិក ផ្តល់គ្រប់ព័ត៌មាន និងទឹកប្រាក់ដែលប្រជាជនអាមេរិកាំងបានតម្កល់។ ចាប់តាំងពីឆ្នាំនោះ ប្រទេសនៅអឺរ៉ុបចំនួន ៥ នាំមុខដោយបារាំង និងអាល្លឺម៉ង់ បានទាមទារឲ្យមានការផ្លាស់ប្តូរព័ត៌មានជាស្វ័យប្រវត្តិរវាងប្រទេសសមាជិករបស់អង្គការOCDE។
តាមអ្នកជំនាញខាងពន្ធដារ ក្នុងមួយឆ្នាំៗ ទឹកប្រាក់ប្រមាណ ៥៨០០ពាន់លានដុល្លារត្រូវគេបន្លំ ផ្លាស់ទីយកទៅដាក់នៅក្នុងធនាគារនៅបរទេស ដើម្បីគេចពីគំនាបពន្ធនៅក្នុងស្រុក។ គេបានប៉ាន់ប្រមាណថា ដោយសារតែគេចពន្ធរបស់ក្រុមអ្នកមាន ប្រទេសនៅក្នុងពិភពលោកបានខាតបង់ជាសរុប ទឹកប្រាក់ ប្រមាណ ១៣០ពាន់លានដុល្លារ ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ