រដ្ឋាភិបាលភូមាចុះកិច្ចព្រមព្រៀងសន្តិភាពជាមួយក្រុមឧទ្ទាមកាឈីន
កាលពីថ្ងៃព្រហស្បតិ៍ម្សិលមិញនេះ ការចរចា រវាងរដ្ឋាភិបាលភូមា និងក្រុមឧទ្ទាមកាឈីន បានឈានដល់ការចុះកិច្ចព្រមព្រៀងសន្តិភាពជាមួយគ្នា ក្នុងគោលដៅបិទបញ្ចប់សង្រ្គាមស៊ីវិល ដែលបានតាមញាំញីភូមាតាំងពីឆ្នាំ១៩៤៨មក។ ការចរចាក្នុងដំណាក់កាលចុងក្រោយ រវាងរដ្ឋាភិបាលភូមា និងក្រុមឧទ្ទាមកាឈីននេះ ក៏មានការចូលរួមពីសំណាក់តំណាងអ.ស.ប.ផងដែរ។
ចុះផ្សាយនៅថ្ងៃ៖
ស្តាប់ - ០១:៥១
កិច្ចព្រមព្រៀងសន្តិភាព ៧ចំណុច ដែលរដ្ឋាភិបាលភូមា និងក្រុមឧទ្ទាមកាឈីន បានចុះជាមួយគ្នា កាលពីថ្ងៃព្រហស្បតិ៍ម្សិលមិញនេះ ចែងកំណត់ជាអាទិ៍ថា ចាប់ពីពេលនេះទៅ រាល់ការវាយប្រយុទ្ធគ្នាទាំងអស់ត្រូវតែបញ្ឈប់ បន្ទាប់មកទៀត ភាគីទាំងពីរនឹងត្រូវជជែកគ្នាលម្អិត អំពីការកែសម្រួលទីតាំងកងកម្លាំងរបស់ខ្លួនចេញពីការប្រឈមមុខដាក់គ្នា។
ក្រៅពីការព្រមព្រៀងឈប់បាញ់ រដ្ឋាភិបាលភូមាក៏បានព្រមព្រៀងផងដែរថា នឹងធ្វើការជជែកពិភាក្សាស្តីពីបញ្ហានយោបាយ ជាមួយតំណាងក្រុមឧទ្ទាមកាឈីន ដែលនេះ គឺធ្វើឡើង ទៅតាមការទាមទាររបស់ក្រុមឧទ្ទាម ដែលចង់បានសិទ្ធិ និងស្វ័យ័តភាពបន្ថែមទៀត នៅក្នុងតំបន់របស់ពួកគេ គឺរដ្ឋកាឈីន ដែលស្ថិតនៅជាប់នឹងព្រំដែនចិន។
មន្រ្តីអ្នកនាំពាក្យប្រធានាធិបតីភូមាបានថ្លែងអបអរការចុះកិច្ចព្រមព្រៀងនេះថា ជាដំណឹងដ៏ល្អមួយ។
គួរបញ្ជាក់ថា សង្រ្គាមរវាងកងកម្លាំងរដ្ឋាភិបាលភូមា និងក្រុមឧទ្ទាមកាឈីន គឺជាផ្នែកមួយ នៃសង្រ្គាមស៊ីវិល ដែលបានញាំញីប្រទេសភូមា តាំងពីប្រទេសនេះទទួលបានឯករាជ្យពីអង់គ្លេស កាលពីឆ្នាំ១៩៤៨មក។ សង្រ្គាមជាមួយក្រុមឧទ្ទាមកាឈីន ដែលបានចាប់ផ្ទុះឡើងខ្លាំង តាំងពីឆ្នាំ២០១១មកនោះ ក៏ជាបញ្ហាប្រឈមដ៏ធំមួយដែរ នៅក្នុងការព្យាយាមធ្វើកំណែទម្រង់របស់លោកប្រធានាធិបតីថេន សេន។
មុននឹងឈានដល់ការចុះកិច្ចព្រមព្រៀង ម្សិលមិញនេះ រដ្ឋាភិបាលភូមា និងក្រុមឧទ្ទាមកាឈីនបានជួបចរចាគ្នាជាច្រើនលើករួចមកហើយ ដោយការចរចាលើកមុនៗ ត្រូវបានធ្វើឡើង នៅក្នុងទឹកដីចិន។ ការចរចាជុំចុងក្រោយត្រូវបានរៀបចំធ្វើនៅក្នុងទឹកដីភូមាផ្ទាល់ ដោយមានការចូលរួមពីតំណាងកងទ័ពឯករាជ្យកាឈីន តំណាងលោកប្រធានាធិបតីថេន សេន តំណាងអគ្គលេខាធិការអ.ស.ប. តំណាងរដ្ឋាភិបាលចិន ព្រមទាំងតំណាងជនជាតិភាគតិចមួយចំនួនផ្សេងទៀត។
តំណាងអង្គការសង្គមស៊ីវិលមួយរូប ដែលបានចូលរួមក្នុងកិច្ចចរចានេះដែរ បានលើកឡើងថា ការចុះកិច្ចព្រមព្រៀង រវាងរដ្ឋាភិបាលភូមា និងក្រុមឧទ្ទាមកាឈីន នៅពេលនេះ គឺជាជំហានដ៏សំខាន់មួយ ក្នុងការឈានទៅបញ្ចប់សង្រ្គាមស៊ីវិលរ៉ាំរ៉ៃនៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ