សាលក្រមលើកដំបូងនៅភូមាក្រោយពីផ្ទុះអំពើហិង្សានៅក្រុងMeiktila
តុលាការភូមាទើបបានកាត់ទោស ជន៣នាក់កាន់សាសនាអ៊ីស្លាម ឲ្យជាប់ពន្ធនាគារ១៤ឆ្នាំពីបទបានបង្កជម្លោះដែលជាប្រភពនៃអំពើហិង្សាផ្ទុះឡើងរវាងសហគមន៍សាសនានៅក្រុងMeiktila។ អំពើហិង្សាដែលបានបណ្តាលឲ្យស្លាប់មនុស្ស៤៣នាក់កាលពីខែមីនាមុន-នេះជាការបញ្ជាក់របស់កាសែតផ្លូវការភូមាមួយឈ្មោះThe Mirror នៅថ្ងៃសុក្រ១២មេសានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ជន៣នាក់កាន់សាសនាអ៊ីស្លាមដែលក្នុងនោះ មានម្ចាស់ហាងនិងភរិយារបស់ខ្លួន ក៏ព្រមទាំងអ្នកធ្វើការម្នាក់អាយុ ២៣ ២៤ និង២១ឆ្នាំ ត្រូវបានអាជ្ញាធរភូមា ចាប់ខ្លួន ក្រោយពីមានការផ្ទុះអំពើហិង្សាបះបោរជាច្រើននៅក្រុង Meiktila ចំកណ្តាលប្រទេសភូមាមក។
អ្នកកាន់សាសនាអ៊ីស្លាមទាំងបីនាក់នេះ ត្រូវជាប់ចោទពីបទបានប្រើអំពើហិង្សាដោយវាយដុំជាទម្ងន់ទៅលើអតិថិជនរបស់ខ្លួនម្នាក់ដែលជាអ្នកកាន់សាសនាព្រះពុទ្ធក្រោយពី ការឈ្លោះទាស់ទែងគ្នាមួយ។ ប៉ុន្មានម៉ោងក្រោយពីការទាស់ទែងគ្នានេះ ក្រុង Meiktila ត្រូវទទួលរងអន្តរាយ ដោយការបំផ្លិចបំផ្លាញពីសំណាក់ពួកបះបោរកាន់ព្រះពុទ្ធសាសនាហើយសង្កាត់នានានៃសហគមន៍អ៊ីស្លាមក៏ត្រូវរងអន្តរាយគ្មានសេសសល់ ជាពិសេស វិហារអ៊ីស្លាមជាច្រើននៅតាមក្រុងនានា ក្នុងភាគកណ្តាលប្រទេសភូមា ។
កាសែត The Mirror ផ្លូវការភូមាបានបញ្ជាក់បន្ថែមថា ជនអ៊ីស្លាមទាំងបីនាក់ ត្រូវបានតុលាការភូមា ប្រកាសកាត់ទោសដាក់ឃុំឃាំងក្នុងពន្ធនាគារ១៤ឆ្នាំពីបទបង្កហិង្សាដោយចេតនា។
វិបត្តិហិង្សារវាងសហគមន៍សាសនាទាំងពីរនេះ បានចោទជាបញ្ហាដ៏ចំបងមួយ សំរាប់រដ្ឋាភិបាលរបស់លោកប្រធានាធិបតី ថេនសេន។ តាំងពីអំពើហិង្សានោះមកលោកថេនសេន បានបរិហារថាគឺពួកអ្នកសាសនាជ្រុលនិយម ជាអ្នកបង្កអំពើហិង្សាទាំងនេះ ។ ក៏ប៉ុន្តែក្រុមព្រះសង្ឃពុទ្ធសាសនាភូមាដែលជាអ្នកបានប្រើពាក្យពេជន៍ស្អប់ខ្ពើមសាសនាអ៊ីស្លាម ពុំដែលត្រូវបានអាជ្ញាធរភូមាចាប់ខ្លួនណាម្នាក់ឡើយ។
សូមបញ្ជាក់ថាហិង្សារវាងសហគមន៍សាសនាទាំងពីរនេះ ជះឥទ្ធិពលទៅដល់ឥណ្ឌូនេស៊ីដែរកន្លងមកនេះ ដោយកាលពីថ្ងៃ៥មេសាមុន ជនអ៊ីស្លាមភូមា៦០នាក់ដែលជាប់ក្នុងមណ្ឌលឃុំឃាំងមួយនៅលើកោះស៊ូម៉ាត្រា បានសងសឹកសហគមន៍ពុទ្ធសាសនាវិញនិងបានចាក់សម្លាប់ជនរួមជាតិខ្លួនកាន់សាសនាព្រះពុទ្ធអស់៨នាក់ក្នុងចំណោម ១១ នាក់ដែលជាប់ឃុំឃាំងនៅឥណ្ឌូនេស៊ី។ ក្រោយពីអំពើហិង្សានេះមក ក្រុមអ្នកនេសាទភូមានៅសេសសល់ដែលជាអ្នកកាន់សាសនាព្រះពុទ្ធ មានការភ័យតក់ស្លុតជាអតិបរមាចំពោះអាយុជីវិតរបស់ពួកគេ និងបានអំពាវនាវសុំឲ្យអាជ្ញាធរឥណ្ឌូនេស៊ី បញ្ជូនពួកគេទៅកាន់ភូមាវិញជាបន្ទាន់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ