លិចសាឡាងនៅកូរ៉េខាងត្បូង៖ក្រុមគ្រួសារជនរងគ្រោះបរិហារពីភាពយឺតយ៉ាវរបស់រដ្ឋាភិបាល
២ថ្ងៃក្រោយគ្រោះថ្នាក់លិចសាឡាងមួយនៅកូរ៉េខាងត្បូងមក ក្រុមអ្នកជួយសង្រ្គោះបាន និងកំពុងបន្តការងាររបស់ខ្លួនយ៉ាងសកម្មដើម្បីស្វែងរកអ្នករស់រានមានជីវិតដែលភាគច្រើនជាសិស្សសាលា។ តុល្យការបណ្តោះអាសន្នចុងក្រោយឲ្យដឹងថា មានសាកសពចំនួន ២៨នាក់ត្រូវបានស្រង់ចេញពីសមុទ្រ និងបាត់ខ្លួនចំនួន ២៦៨នាក់ផ្សេងទៀត។ គួររម្លឹកជូនថា នៅពេលមានគ្រោះថ្នាក់ សាឡងនោះមានដឹកអ្នកដំណើរចំនួន ៤៧៥នាក់ ក្នុងនោះមានសិស្សសាលា ៣៥២នាក់។ នៅថ្ងៃសុក្រ ទី១៨ មេសានេះ ក្រុមគ្រួសារជនរងគ្រោះបានចោទរដ្ឋាភិបាលពីរឿងភូតភរ និងភាពយឺតយ៉ាវក្នុងការជួយសង្រ្គោះ។ ដោយឡែក រដ្ឋអាជ្ញាបានប្រកាសឲ្យដឹងថា នៅពេលមានគ្រោះថ្នាក់ កាពីទែនមិនមានវត្តមាននៅនឹងចង្កូតសាឡាងទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ពេលវេលាកាន់តែខិតទៅមុខ ក្តីសង្ឃឹមថានឹងរកឃើញអ្នកនៅរស់រានមានជីវិតក៏កាន់តែស្តួចស្តើងទៅៗដែរ។ តែទន្ទឹមគ្នានេះ ក្រុមអ្នកជួយសង្រ្គោះក៏មិនបានបន្ធូរដៃរបស់ខ្លួនដែរ។ រហូតដល់ពេលនេះ ក្រុមអ្នកសង្រ្គោះមុជទឹកប្រមាណជា ១០០នាក់ នៅតែមិនទាន់អាចចូលទៅខាងក្នុងបន្ទប់សាឡាងនោះបាននៅឡើយទេ តែពួកគេបានបាញ់បញ្ចូលខ្យល់អុកស៊ីសែនពីខាងក្រៅចូលទៅខាងក្នុងសាឡងដោយយល់ឃើញថា ប្រហែលជាមានអ្នកដំណើរខ្លះកំពុងមានជីវិតនៅឡើយ។ និយាយពីកាពីទែនបើកសាឡាងវិញ រដ្ឋអាជ្ញាបានបញ្ជាក់ឲ្យដឹងនៅថ្ងៃសុក្រនេះថា នៅពេលសាឡាងកំពុងជួបគ្រោះថ្នាក់ កាពីទែនរូបនោះមិនបានស្ថិតនៅនឹងចង្កូតសាឡាងទេ តែទុកបណ្តោយឲ្យមន្រ្តីក្រោមបង្គាប់ខ្លួនជាអ្នកបើកបរទៅវិញ។
រហូតមកដល់ពេលនេះ គេនៅតែមិនទាន់អាចដឹងពីមូលហេតុពិតនៃគ្រោះថា្នក់លិចសាឡាងនោះទេ។ តែអ្នកដំណើរដែលបានរួចជីវិតបានអះអាងថា ពួកគេបានឮសូរសម្លេងបុកទង្គិចយ៉ាងខ្លំាង រួចសាឡាងនោះក៏បានឈប់មួយកន្លែងតែម្តង។ តាមរយៈសាក្សីនេះនំាឲ្យគេសន្និដ្ឋានថា ប្រហែលជាសាឡាងនោះបានបើកប៉ះនឹងថ្ម ឬមួយក៏វត្ថុអ្វីមួយដែលលិចក្នុងទឹក។ នៅមានសម្មតិកម្មមួយទៀតដែលលើកឡើងដោយក្រុមអ្នកឯកទេស គឺសាឡាងនោះបានផ្អៀងលិចនៅពេលដែលមានរថយន្តប្រមាណជា ១៥០គ្រឿងនៅក្នុងសាឡាងនោះបានរំកិលទៅតែម្ខាងនំាឲ្យសាឡាងនោះបាត់ភាពលំនឹងរបស់វា។
យ៉ាងណាក៏ដោយ ក្រុមគ្រួសារជនគ្រោះកំពុងបានបញ្ចេញកំហឹងប្រឆំាងនឹងរដ្ឋាភិបាលជារៀងរាល់ថ្ងៃ។ ពួកគេបានចោទរដ្ឋាភិបាលពីភាពយឺតយ៉ាវក្នុងការជួយសង្រ្គោះ និងរឿងភូតភរ។ បុរសម្នាក់ដែលតំណាងឲ្យក្រុមគ្រួសារជនរងគ្រោះបានថ្លែងថា គាត់បានឃើញកាណូតតែប៉ុន្មានគ្រឿង និងអ្នកសង្រ្គោះមុជទឹកតែប៉ុន្មាននាក់ប៉ុណ្ណោះ ពោលគឺតិចជាងការប្រកាសរបស់រដ្ឋាភិបាលដែលថា បានបញ្ជូនអ្នកសង្រ្គោះមុជទឹកចំនួន ៥០០នាក់ និងកាប៉ាល់ កាណូតចំនួន ១៦៩គ្រឿងទៅកន្លែងកើតហេតុ។ ដោយឡែក កាសែតកូរ៉េខាងត្បូងទើបបានប្រាប់ឲ្យដឹងថា នាយករងសាលាម្នាក់អាយុ ៥២ឆ្នំាត្រូវបានគេរកឃើញស្លាប់ដោយប្រហែលជាបានព្យួរ ក សម្លាប់ខ្លួនឯងនៅក្បែរទីកន្លែងនៃការជួបជុំក្រុមគ្រួសារជនរងគ្រោះលិចសាឡាង។ មូលហេតុមកពីនាយករងសាលារូបនោះពិបាកទ្រំាមើលពីការសោកសៅនៃក្រុមគ្រួសារសិស្សសាលារបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ