គ.ជ.ប ធ្វើពិធីកម្ទេចសន្លឹកឆ្នោតដែលប្រើរួចជាង ២០លានសន្លឹក
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នៅព្រឹកថ្ងៃទី២៤តុលានេះ បានធ្វើពិធីកម្ទេចសន្លឹកឆ្នោតជាង២០លានសន្លឹក។ សន្លឹកឆ្នោតទាំងនេះ គឺជាសន្លឹកឆ្នោតដែលប្រើប្រាស់ នៅក្នុងការបោះឆ្នោតជ្រើសរើសក្រុមប្រឹក្សា ឃុំ-សង្កាត់ ឆ្នាំ២០០៨ និងឆ្នាំ ២០១២កន្លងទៅ។ក្នុងការកម្ទេចសន្លឹកឆ្នោតនេះ គជប បានប្រើថវិកាជាង១ម៉ឺនដុល្លាអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ដោយអនុវត្តតាមច្បាប់ ស្តីពីការបោះឆ្នោតជ្រើសតាំង តំណាងរាស្ត្រ និងច្បាប់ ស្តីពីការបោះឆ្នោត ជ្រើសរើសក្រុមប្រឹក្សា ឃុំ-សង្កាត់ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នៅព្រឹកថ្ងៃទី២៤តុលានេះ បានធ្វើពិធីបំផ្លាញសន្លឹកឆ្នោតជាង២០លានសន្លឹក ( ២០.៩៩២.៥០៤)ស្មើនឹង៣៤.៩៨២កញ្ចប់។
សន្លឹកឆ្នោតទាំងនេះ គឺជាសន្លឹកឆ្នោតដែលបានប្រើប្រាស់រួច នៅក្នុងការបោះឆ្នោតជ្រើសរើសតំណាងរាស្ត្រ ឆ្នាំ២០០៨ និងការបោះឆ្នោតជ្រើសរើសក្រុមប្រឹក្សា ឃុំ-សង្កាត់ឆ្នាំ២០១២កន្លងទៅ។ សន្លឹកឆ្នោតដែលត្រូវកម្ទេច ត្រូវបានរុញបញ្ចូលទៅក្នុងម៉ាស៊ីនដើម្បីកាត់ចិញ្ច្រាំ នៅក្នុងរោងពុម្ព លីវ៉ាន់ហុង ស្ថិតនៅសង្កាត់បឹងកក់១ ខណ្ឌទួលគោក រាជធានីភ្នំពេញ។
រោងពុម្ពលីវ៉ាន់ហុង ដែលគេដឹងជាទូទៅថា ជារោងពុម្ពតែមួយគត់ ដែល គ.ជ.ប បានជ្រើសរើសជាដៃគូអោយបោះពុម្ពសន្លឹកឆ្នោត និងកម្ទេចសន្លឹកឆ្នោត ដែលប្រើប្រាស់នៅក្នុងការបោះឆ្នោតនៅក្នុងប្រទេសកម្ពុជា។ ហើយនេះគឺជាលើកទី៣ហើយ ដែល គជប បានរៀបចំពិធី កម្ទេចសន្លឹកឆ្នោតនេះ ដោយ ផ្លាស់ប្តូរនីតិវិធី ពីការដុតកម្ទេច មកជាការកាត់ចិញ្ច្រាំជំនួសវិញ។
យោងតាមច្បាប់ ស្តីពីការបោះឆ្នោតជ្រើសតាំង តំណាងរាស្ត្រ និងច្បាប់ស្តីពីវិសោធនកម្ម នៃច្បាប់នេះ មាត្រា១៦ ថ្មី ចំណុច ២៧ ចែងថា "គ.ជ.ប. មានសិទ្ធិពេញលេញ ក្នុងការអនុវត្តសមត្ថកិច្ច រៀបចំគណៈកម្មការ ដើម្បីបំផ្លាញសន្លឹកឆ្នោត ដែលបានប្រើប្រាស់ ក្នុងការបោះឆ្នោតជ្រើសតាំង តំណាងរាស្ត្រ តាមអាណត្តិនីមួយៗ បន្ទាប់ពីបានរក្សាទុក ប្រកបដោយសុវត្ថិភាព នូវសន្លឹកឆ្នោតទាំងនោះរយៈពេល៤ឆ្នាំ ចាប់ពីថ្ងៃបោះឆ្នោត តាមអាណត្តិនីមួយៗ ដោយមានការចូលរួម ពីតំណាងគណបក្សនយោបាយ ដែលមានអាសនៈ ក្នុងរដ្ឋសភា"។
បើតាមលោក ទេព នីថា អគ្គលេខាធិការ គណៈកម្មាធិការជាតិរៀបចំការបោះឆ្នោត ការបំផ្លាញសន្លឹកឆ្នោតទាំងជាង២០លានសន្លឹកនេះ គ.ជ.ប បានចំណាយថវិកាប្រមាណជាង ១ម៉ឺនដុល្លារអាមេរិក រឺស្មើនឹងជាង៤០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ