ចរចាឡើងប្រាក់ខែកម្មករកាត់ដេរ៖ថៅកែព្រមតម្លើង៧២ដុល្លារតែសហជីពមិនព្រម
ក្នុងកិច្ចប្រជុំចរចាត្រីភាគី ដើម្បីតម្លើងប្រាក់ខែកម្មករកាត់ដេរ កាលពីរសៀលថ្ងៃទី២៦កុម្ភៈនេះ ថៅកែរោងចក្រកាត់ដេរ បានព្រមព្រៀង តម្លើងប្រាក់ខែកម្មករកាត់ដេរត្រឹមតែ ៧២ ដុល្លារប៉ុណ្ណោះ។ ក៏ប៉ុន្តែសហជីពកម្មករ មិនយល់ស្រប ហើយទាមទារឲ្យមានការតម្លើងប្រាក់ខែគោលដល់កម្មករពី ៦១ ដុល្លារនៅពេលសព្វថ្ងៃ រហូតដល់ ១២០ ដុល្លារ។ ការមិនត្រូវរ៉ូវគ្នានេះ នាំឲ្យលោក អ៊ិត សំហេង រដ្ឋមន្ត្រីក្រសួងសង្គមកិច្ចដែលជាប្រធាននៃកិច្ចប្រជុំ បានសម្រេចបង្កើតក្រុមការងារចម្រុះមួយ មានសមាសភាពត្រីភាគី មកពីថៅកែរោងចក្រកាត់ដេរ សហជីព និងរដ្ឋាភិបាល ជួបប្រជុំចរចាបន្តនៅថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
កិច្ចប្រជុំត្រីភាគីចរចាតម្លើងប្រាក់ខែកម្មករ បានចាប់ផ្តើមប្រហែល ៣ ម៉ោង ចាប់ពីម៉ោង ២ និង ៣០ នាទីរសៀលថ្ងៃអង្គារ ទី២៦កុម្ភៈនេះ នៅក្រសួងសង្គមកិច្ច។ ក្នុងកិច្ចប្រជុំ ភាគីថៅកែរោងចក្រកាត់ដេរ បានប្រកាសជំហរ ព្រមព្រៀងតម្លើងប្រាក់ខែកម្មករកាត់ដេរ ពី ៦១ ដុល្លារ ដល់ ៧២ ដុល្លារ។
លោក អាត់ ធន់ ប្រធានសហភាពការងារកម្ពុជា ដែលបានចូលរួមកិច្ចប្រជុំដោយបិទទ្វារនោះ បានលើកឡើងថា ភាគីនិយោជក ថៅកែរោងចក្រកាត់ដេរ បានប្រកាសតម្លើងប្រាក់ខែកម្មករ ១១ ដុល្លារ បន្ថែមលើប្រាក់ខែគោល ៦១ ដុល្លារនោះ គឺបានមកពីការផ្តល់ប្រាក់ខែបន្ថែម ៦ ដុល្លារ បូកនឹងលុយទ្រទ្រង់
លោក អាត់ ធន់ បានបន្តថា ភាគីថៅកែរោងចក្របានលើកហេតុផលថា កម្មករកាត់ដេរសព្វថ្ងៃ មានដល់ ៧៥ ម៉ឺននាក់ ដូច្នេះថៅកែត្រូវចំណាយច្រើនលើការតម្លើងប្រាក់ខែពេលនេះ។ ម្យ៉ាងទៀត អតិផរណា ទំនិញឡើងថ្លៃនៅកម្ពុជា ក្នុងឆ្នាំកន្លងមក ក៏មានតិចតួចត្រឹមតែ ៦% ប៉ុណ្ណោះ។
យ៉ាងណាក៏ដោយ លោក អាត់ ធន់ បានអះអាងថា សហជីពកម្មករ មិនយល់ព្រមនឹងជំហររបស់ថៅកែរោងចក្រ ចំពោះការតម្លើងប្រាក់ខែកម្មករត្រឹមតែ ៧២ ដុល្លារនោះទេ។ សហជីព ចង់បានឲ្យកម្មករកាត់ដេរ ទទួលបានប្រាក់ខែ ១២០ ដុល្លារ។
ទីបំផុតទៅ នៅមុនពេលបិទបញ្ចប់កិច្ចប្រជុំ នៅរសៀលនេះ រដ្ឋមន្ត្រីក្រសួងសង្គមកិច្ច លោក អ៊ិត សំហេង ដែលជាប្រធានកិច្ចប្រជុំចរចាត្រីភាគី បានសម្រេចបង្កើតក្រុមការងារចម្រុះមួយ ដែលមានសមាសភាពមកពីខាងសហជីពតំណាងកម្មករ ១០ នាក់ និងខាងថៅកែរោងចក្រកាត់ដេរ ១០ នាក់ ដោយមានការសម្របសម្រួលពីរដ្ឋលេខាធិការក្រសួងសង្គមកិច្ចនិងក្រសួងការងារ ៤ រូប ដើម្បីអង្គុយចរចាគ្នា រកចំណុចរួម លើការតម្លើងប្រាក់ខែកម្មករ។ កិច្ចប្រជុំក្រុមការងារចម្រុះនោះ ចាប់ពីថ្ងៃទី២៧ ខែកុម្ភៈ ឆ្នាំ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ