កុមារីកម្ពុជាទី១៣ស្លាប់ដោយសារផ្តាសាយបក្សី
ក្រសួងសុខាភិបាល និងអង្គការសុខភាពពិភពលោកប្រចាំកម្ពុជាបានប្រកាសអោយដឹងអំពីករណី ឆ្លងទី១៥នៃមេរោគផ្តាសាយបក្សីH5N1ទៅលើកុមារីម្នាក់នៅក្នុងស្រុក ពារាំង ខេត្តព្រៃវែង។ កុមារីម្នាក់នេះបានស្លាប់ កាលពីថ្ងៃទី១៦មេសាកន្លងទៅ បន្ទាប់ពីបានសម្រាកព្យាបាល នៅក្នុងមន្ទីរពេទ្យគន្ធបុប្ជាក្នុងរាជធានីភ្នំពេញ។ រដ្ឋមន្ត្រីក្រសួង សុខាភិបាលលោកម៉ម ប៊ុនហេងបានថ្លែងថា មេរោគផ្តាសាយបក្សីH5N1នៅតែគំរាមកំហែងដល់សុខភាពរបស់ពលរដ្ឋកម្ពុជា។
ចុះផ្សាយនៅថ្ងៃ៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
កុមារីអាយុ៥ឆ្នាំម្នាក់បានស្លាប់ដោយសារមេរោគផ្តាសាយបក្សីH5N1 កាលពីថ្ងៃទី១៦មេសាកន្លងទៅនេះ។ កុមារីរូបនេះមកពីភូមិត្នោត ស្រុកពារាំង ខេត្តព្រៃវែង។
សេចក្តីប្រកាសព័ត៌មានរួមរបស់ក្រសួងសុខាភិបាល និងអង្គការសុខភាពពិភពលោកដែលបានបញ្ជាក់អំពីករណីស្លាប់របស់កុមារីនេះបានរៀបរាប់ថា កុមារីរូបនេះបានធ្លាក់ខ្លួនឈឺ កាលពីថ្ងៃទី១១មេសា ហើយត្រូវបានព្យាបាលដោយមន្ទីរពេទ្យឯកជន នៅភូមិ។ ដោយសារតែស្ថានភាពជំងឺកាន់តែធ្ងន់ធ្ងរ កុមារីរូបនេះត្រូវបានបញ្ជូនមកដល់មន្ទីរពេទ្យគន្ធបុប្ជា ក្នុងរាជធានីភ្នំពេញ។ ការវិភាគលើវត្ថុសំណាកបានបង្ហាញថា កុមារីបានឆ្លងមេរោគផ្តាសាយបក្សី។
កុមារីនេះគឺជាមនុស្សទី១៣ហើយ នៅកម្ពុជាដែលបានស្លាប់ដោយសារមេរោគគ្រុនផ្តាសាយបក្សី ក្នុងចំណោមមនុស្ស១៥នាក់ដែលបានឆ្លងមេរោគនេះ ចាប់តាំងពីកម្ពុជារកឃើញមានករណីឆ្លងមេរោគនេះទៅមនុស្សនៅឆ្នាំ២០០៤។
តាមរយៈសេចក្តីប្រកាសព័ត៌មានរួមរបស់ក្រសួងសុខាភិបាល និងអង្គការសុខភាពពិភពលោក លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងថា មេរោគផ្តាសាយបក្សីនៅតែគំរាមកំហែងដល់សុខភាពពលរដ្ឋកម្ពុជា។ បើប្រៀបធៀបជាមួយឆ្នាំកន្លងទៅ ឆ្នាំនេះគេរកឃើញមានករណីឆ្លងមេរោគផ្តាសាយបក្សីច្រើនជាង ពិសេសចំពោះកុមារ។ លោករដ្ឋមន្ត្រីបានអំពាវនាវដល់ឪពុកម្តាយទាំងអស់ អោយព្យាយាមថែរក្សាកុមារអោយឆ្ងាយពីបក្សី និងត្រូវលាងដៃកូនៗរបស់ពួកគេជាមួយសាប៊ូអោយបានញឹកញាប់។
ពិភពលោកបានរកឃើញមេរោគផ្តាសាយបក្សី H5N1 នៅឆ្នាំ២០០៣។ រហូតដល់ពេលនេះ មានមនុស្ស៥៤៩នាក់ ដែលត្រូវបានរកឃើញថា បានឆ្លងមេរោគផ្តាសាយបក្សី ក្នុងចំណោមនោះមាន៣២០នាក់បានស្លាប់ដោយសារមេរោគនេះ។ មេរោគដែលបានវិវឌ្ឍពីការឆ្លងពីបក្សី ទៅបក្សី មកជាការឆ្លងពីបក្សីមកមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ