កងទ័ពកម្ពុជាថៃ ចរចាឈប់បាញ់គ្នាជាលើកទី២
ក្រោយពីមានការព្រមព្រៀងគ្នាលើបទឈប់បាញ់ នៅក្នុងការចរចា នៅវេលាថ្ងៃត្រង់ ម៉ោង៨ និង៣០នាទីយប់ កងទ័ពថៃបានផ្ទុះអាវុធឡើងវិញនៅតំបន់ប្រាសាទតាក្របី រហូតដល់ម៉ោង៦ព្រឹក ថ្ងៃទី២៩មេសានេះ។ ការផ្ទុះអាវុធនេះបានតម្រូវអោយមេបញ្ជាការកងទ័ពទាំងពីរជួបចរចាគ្នាម្តងទៀត ហើយក៏ព្រមព្រៀងឈប់ផ្ទុះអាវុធម្តងទៀតដែរ។ ថៃប្រាប់កម្ពុជាថា ការដែលខ្លួនផ្ទុះអាវុធមុន ពីព្រោះពួកគេហាក់បានឃើញ ទាហានខ្មែររុលចូលទៅរកពួកគេ។ ទាហានកម្ពុជាប្រាប់ថៃ អោយទុកចិត្តកម្ពុជា។
ចុះផ្សាយនៅថ្ងៃ៖
ស្តាប់ - ០១:៥១
ក្នុងរយៈពេល២៤ម៉ោង មេបញ្ជាការខាងកម្ពុជា និងថៃត្រូវជួបគ្នាដល់ទៅពីរដង ហើយឯកភាពគ្នាម្តងទៀត ថាមិនផ្ទុះអាវុធ មិនចល័តទ័ព ហើយថាពីរថ្ងៃម្តង ពួកគេត្រូវទូរស័ព្ទជួបគ្នា។ ក្រោយពីការជួបចរចាគ្នា កាលពីថ្ងៃទី២៨មេសាម្សិលមិញ ថាឈប់បាញ់គ្នា នៅម៉ោង៨និង៣០នាទីយប់ រហូតដល់ម៉ោង៦ព្រឹកថ្ងៃទី២៩មេសានេះ ទាហានថៃបានបើកការវាយប្រហារដោយគ្រាប់កាំភ្លើងត្បាល់ មកលើកងទ័ពកម្ពុជានៅក្នុងសមរភូមិប្រសាទតាក្របី។ ការវាយបករបស់កម្ពុជាទៅលើការវាយប្រហារជាថ្មីរបស់ទាហាថៃ បានធ្វើអោយទាហានឈុតខ្មៅថៃម្នាក់ស្លាប់ និងរបួស៤នាក់ផ្សេងទៀត។
បន្ទាប់មក នៅម៉ោង១១និង២០នាទីថ្ងៃនេះ ការចរចាជាថ្មីមួយត្រូវបានរៀបចំឡើងនៅច្រកអូរស្មាច់ ដោយខាងកម្ពុជាតំណាងដោយលោក នាក់ វង្ស មេបញ្ជាការរងកងពលតូចថ្មើរជើងលេខ៤២ រីឯភាគីថៃមានលោកឌុលយ៉ាដេត មេបញ្ជាការវរៈសេនាធំឈុតខ្មៅឈរជើង ទល់មុខ ទិសព្រះវិហារ។
ប្រភពពីសមរភូមិមុខបានអោយដឹងថា មុននឹងឈានដល់ការព្រមព្រៀង បញ្ឈប់ការបាញ់គ្នាសាជាថ្មីនេះ ភាគីកម្ពុជាបានសួរទៅភាគីថៃថា ហេតុអ្វីបានជាពួកគេផ្ទុះអាវុធ? ភាគីទាហានថៃបានឆ្លើយថា ពួកគេហាក់បានឃើញកងទ័ពខ្មែររុលចូលទៅខាងពួកគេ។ ពេលនោះហើយដែលកម្ពុជា ស្នើអោយថៃទុកចិត្តខ្លួនឯង និងទុកចិត្តមកលើកម្ពុជា។
ទោះយ៉ាងណាក្តី តាំងពីព្រឹកថ្ងៃសុក្រនេះ អ្នកនាំពាក្យក្រសួងការពារជាតិកម្ពុជាបានធ្វើសេចក្តីថ្លែងការណ៍ សំដែងការខកចិត្ត និងសោកស្តាយចំពោះការចល័តទ័ព និងការវាយប្រហារដោយកាំភ្លើងត្បាល់របស់ទាហានថៃកាលពីយប់ថ្ងៃព្រហស្បតិ៍ទី ២៨ រហូតដល់ពេលព្រឹកថ្ងៃសុក្រនេះ។ ក្រសួងការពារជាតិស្នើអោយទាហានថៃ គោរព និងអនុវត្តតាមលទ្ធផលនៃការចរចាថ្នាក់ភូមិភាគ នៅច្រកអូរស្មាច់ កាលពីថ្ងៃទី២៨មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ