អង្គការសង្គមស៊ីវិល១៩ស្នើឲ្យរដ្ឋាភិបាលបង្កើនការអភិរក្សធនធានធម្មជាតិ
ក្រុមអង្គការសង្គមស៊ីវិល១៩ស្ថាប័នក្នុងប្រទេសកម្ពុជា បានដាក់សំណើទៅលោកនាយករដ្ឋមន្ត្រី ដើម្បីឲ្យលោកដោះស្រាយបន្ថែមទៀត ចំពោះបញ្ហាប្រឈមក្នុងកិច្ចការពារ និងអភិរក្សធនធានធម្មជាតិ។ សំណើរបស់អង្គការសង្គមស៊ីវិលនេះធ្វើឡើង មុនពេលដែលក្រុមអង្គការសង្គមស៊ីវិល និងរដ្ឋាភិបាលជួបប្រជុំគ្នានៅថ្ងៃស្អែក ក្នុងវេទិកាថ្នាក់ជាតិស្តីពីការការពារ និងអភិរក្សធនធានធម្មជាតិ។
ចុះផ្សាយនៅថ្ងៃ៖
ស្តាប់ - ០២:០៤
នៅក្នុងលិខិត៥ទំព័រដាក់ជូនលោកនាយករដ្ឋមន្ត្រីនោះ អង្គការសង្គមស៊ីវិលទាំង១៩ បានស្នើចំនួន១៦ចំណុច តាមរយៈលោកសាយ សំអាល់ រដ្ឋមន្ត្រីក្រសួងបរិស្ថាន។ ចំណុចទាំង១៦នោះរួមមាន សុំឲ្យមានការពន្លឿនដំណើរការក្នុងការទទួលស្គាល់សហគមន៍ព្រៃឈើ សហគមន៍ការពារធម្មជាតិផ្សេងទៀត ពន្លឿនការចុះបញ្ជីដីកម្មសិទ្ធិសមូហភាពជនជាតិដើមភាគតិច ស្នើឲ្យប្រកាសអំពីព្រំប្រទល់ដីសម្បទានសេដ្ឋកិច្ច រៀបចំផែនការគ្រប់គ្រងតំបន់ការពារធម្មជាតិ ពង្រឹងប្រសិទ្ធិភាពក្នុងការអនុវត្តច្បាប់ទប់ស្កាត់បទល្មើសនេសាទ បទល្មើសព្រៃឈើជាដើម រួមទាំងការស្នើមួយចំនួនទៀតទាក់ទងនឹងបរិស្ថាន និងកិច្ចការពាររបស់រដ្ឋាភិបាល។
នៅក្នុងចំណុចទាំង១៦នោះ ក្រុមអង្គការសង្គមស៊ីវិលក៏បានសុំឲ្យមានការបង្កើតយន្តការជួបពិភាក្សា និងចែករំលែកព័ត៌មានរវាងសង្គមស៊ីវិល ជាមួយក្រសួងពាក់ព័ន្ធរៀងរាល់មួយត្រីមាសម្តង ជាពិសេសកិច្ចប្រជុំរវាងអង្គការសង្គមស៊ីវិលជាមួយលោកហ៊ុន សែន ដើម្បីរាយការណ៍ និងស្នើសុំអន្តរាគមន៍ដោះស្រាយ។
លោកតឹក វណ្ណារ៉ា តំណាងអង្គការសង្គមស៊ីវិលទាំង១៩ស្ថាប័ននោះ បានថ្លែងប្រាប់វិទ្យុបារាំងអន្តរជាតិថា មូលហេតុដែលជំរុញឲ្យអង្គការសង្គមស៊ីវិលទាំងនេះដាក់សំណើទៅរដ្ឋាភិបាល គឺដោយសារតែក្រសួងបរិស្ថានសម្របសម្រួលឲ្យមានវេទិកាមួយពិភាក្សាពីការការពារ និងអភិរក្សធនធានធម្មជាតិ ដែលបានអញ្ជើញអង្គការជាតិ និងអន្តរជាតិទាំង១៩នេះ និងអ្នកពាក់ព័ន្ធផ្សេងទៀត។ ដូច្នេះទើបអង្គការទាំង១៩មូលមាត់គ្នាស្វែងរកសំណូមពរ ដើម្បីដាក់ឲ្យលោកហ៊ុន សែនដោះស្រាយ។
នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា ឬ NGO Forum សង្ឃឹមថាសំណើទាំង១៦ចំណុចនោះ រាជរាដ្ឋាភិបាលក៏ដូចជាលោកហ៊ុន សែន នឹងឆ្លើយតប ព្រោះសំណូមពរនេះជាតម្រូវការចាំបាច់ក្នុងការការពារ និងអភិរក្សធនធានធម្មជាតិកម្ពុជា។
អ្នកនាំពាក្យក្រសួងបរិស្ថានលោក សៅ សុភាព បានបញ្ជាក់ប្រាប់វិទ្យុបារាំងអន្តរជាតិថា សំណើរបស់អង្គការសង្គមស៊ីវិលនេះ លោកមិនអាចអះអាងបែបណានោះទេ ហើយការសម្រេចយ៉ាងណានោះគឺអាស្រ័យលើការប្រជុំនៅថ្ងៃទី២២ ខែសីហា រវាងលោកនាយករដ្ឋមន្ត្រី និងក្រុមអង្គការសង្គមស៊ីវិលពាក់ព័ន្ធ នោះទើបអាចទទួលបានការឆ្លើយតប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ