កូរ៉េខាងជើងបាញ់សាកល្បងមីស៊ីលក្នុងពេលកូរ៉េខាងត្បូងធ្វើសមយុទ្ធជាមួយអាមេរិក
កាលពីថ្ងៃព្រហស្បតិ៍ កូរ៉េខាងជើងបានធ្វើការបាញ់សាកល្បងមីស៊ីលរយៈចម្ងាយជិត ចំនួន ៤ដើម ដោយបាញ់ចេញពីឆ្នេរប៉ែកខាងកើត ឆ្ពោះទៅទីសមុទ្រ។ នេះបើយោងតាមការអះអាងរបស់ក្រសួងការពារជាតិកូរ៉េខាងត្បូង។ ការសាកល្បងមីស៊ីលនេះទំនងជាត្រូវធ្វើឡើង ដើម្បីជាការតបតទៅនឹងសមយុទ្ធ ដែលកងទ័ពកូរ៉េខាងត្បូងកំពុងធ្វើជាមួយអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
មីស៊ីលទាំង ៤ ដើម ដែលកូរ៉េខាងជើងបាញ់សាកល្បង កាលពីថ្ងៃព្រហស្បតិ៍ គឺជាប្រភេទមីស៊ីលរយៈចម្ងាយជិត ដែលអាចបាញ់បានចម្ងាយប្រមាណជា ២០០គីឡូម៉ែត្រ។ នេះបើយោងតាមការអះអាងរបសឮមន្រ្តីអ្នកនាំពាក្យក្រសួងការពារជាតិកូរ៉េខាងត្បូង ដែលបានបញ្ជាក់ផងដែរថា កងទ័ពកូរ៉េខាងត្បូងរក្សាការប្រុងប្រយ័ត្ន និងត្រៀមខ្លួនជាប់ជានិច្ច ដើម្បីចាំទប់ទល់នឹងទង្វើបង្កហេតុណាមួយពីសំណាក់កូរ៉េខាងជើង។
គេសង្កេតឃើញថា ការបាញ់សាកល្បងមីស៊ីលរយៈចម្ងាយជិតដោយកូរ៉េខាងជើង មិនមែនជារឿងចម្លែកនោះទេ។ កន្លងមក របបដឹកនាំក្រុងព្យុងយ៉ាងតែងតែយកការបាញ់សាកល្បងមីស៊ីលនេះ ដើម្បីជាការឆ្លើយតបទៅនឹងសមយុទ្ធយោធាប្រចាំឆ្នាំ រវាងកូរ៉េខាងត្បូង និងសហរដ្ឋអាមេរិក។ ដូច្នេះ ការបាញ់សាកល្បងមីស៊ីលនៅពេលនេះ ក៏ទំនងជាធ្វើឡើង ដើម្បីឆ្លើយតបនឹងសមយុទ្ធប្រចាំឆ្នាំ ដែលកំពុងប្រព្រឹត្តទៅកូរ៉េខាងត្បូង នៅពេលនេះដែរ។
កាលពីយប់ថ្ងៃចន្ទ ថ្ងៃដែលកូរ៉េខាងត្បូងចាប់ផ្តើមបើកធ្វើសមយុទ្ធជាមួយអាមេរិក ទូកល្បាតរបស់កូរ៉េខាងជើងបានបើកឆ្លងចូលមកក្នុងដែនទឹករបស់កូរ៉េខាងត្បូងជាច្រើនលើក។ ការបាញ់សាកល្បងមីស៊ីល កាលពីថ្ងៃព្រហស្បតិ៍ គឺជាសកម្មភាពមួយបន្ថែមទៀត ដែលអាចនឹងធ្វើឲ្យស្ថានភាពនៅឧបទ្វីបកូរ៉េ កាន់តែតានតឹងខ្លាំងឡើងថែមទៀត ក្នុងពេលដែលសមយុទ្ធប្រចាំឆ្នាំកូរ៉េខាងត្បូង-អាមេរិក ត្រូវបន្តធ្វើរហូតដល់ថ្ងៃទី១៨ ខែមេសា។
ក៏ប៉ុន្តែ សាស្រ្តាចារ្យម្នាក់ នៅសកលវិទ្យាល័យកូរ៉េខាងត្បូង ហើយដែលមានជំនាញលើកិច្ចការកូរ៉េខាងជើង បានប្រាប់ទីភ្នាក់ងារព័ត៌មានបារាំង AFP ថា កូរ៉េខាងជើងទំនងជានឹងបញ្ឈប់ត្រឹមការបាញ់សាកល្បងមីស៊ីលរយៈចម្ងាយជិតនេះ ដោយមិនធ្វើទង្វើណាមួយ ដែលនាំឲ្យភាពតានតឹងកាន់តែរាលដាលធំជាងនេះទៀតទេ ដោយសារតែរបបដឹកនាំក្រុងព្យុងយ៉ាងមិនចង់បាត់បង់ផលប្រយោជន៍ ដែលខ្លួនអាចទាញយកពីភាពធូរស្រាល ក្នុងទំនាក់ទំនងជាមួយកូរ៉េខាងត្បូង ក្រោយពីខ្លួនបានសុខចិត្តធ្វើសម្បទាន អនុញ្ញាតឲ្យមានជំនួប រវាងសាច់ញាតិកូរ៉េ ដែលបែកគ្នាតាំងពីសម័យសង្រ្គាមរួចទៅហើយ។
ទោះជាយ៉ាងណាក៏ដោយ បើគេពិនិត្យមើលទៅលើមេរៀនពីអតីតកាល អ្វីដែលគេអាចដឹងច្បាស់ គឺត្រង់ថា មិនមានអ្នកណាអាចស្មានទុកជាមុនបាននោះទេ អំពីសកម្មភាពរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ