សមុទ្រចិនខាងត្បូង៖« ឧប្បត្តិហេតុថ្មីរវាងទីក្រុងប៉េកំាង និងទីក្រុងម៉ានីល »
ភាពតានតឹងបានកើតមានជាថ្មីទៀតរវាងប្រទេសចិន និងហ្វីល្លីពីន បន្ទាប់ពីមានការប៉ះទង្គិចគ្នារវាងកងម៉ារីនហ្វីល្លីពីន និងនាវានេសាទចិននៅក្នុងដែនសមុទ្រចិនខាងត្បូងកាលពីថ្ងៃអង្គារ ទី១០ មេសាម្សិលមិញ។ គួរជម្រាបជូនថា ក្រៅពីរវាងចិន និងហ្វីល្លីពីន ជម្លោះនៅក្នុងដែនសមុទ្រចិនខាងត្បូងក៏មានជាប់ពាក់ព័ន្ធនឹងប្រទេសអាស៊ីផ្សេងទៀតនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០១:៥៦
ឧប្បត្តិហេតុជាថ្មីនៅក្នុងសមុទ្រចិនខាងត្បូងបានកើតមានឡើងកាលពីថ្ងៃអង្គារ ទី១០ មេសាម្សិលមិញ នៅម្តុំកោះ Scarborough ដែលចិនហៅថា កោះ Huangyan។ ក្នុងពេលដែលនាវារបស់កងម៉ារីនហ្វីល្លីពីនបានចេញប្រតិបត្តិការព័ទ្ធចាប់នាវានេសាទចិនចំនួន ៨គ្រឿងដែលបានចូលមកនេសាទនៅម្តុំនោះ ក៏ស្រាប់មានអន្តរាគមន៍ភ្លាមៗ ពីនាវាឃ្លំាមើលដែនសមុទ្ររបស់ចិន។ គឺនៅពេលនោះឯង ដែលស្ថានភាពប្រឈមមុខដាក់គ្នាហាក់ដូចជាជាប់គំាងមួយកន្លែង និងបានឡើងតានតឹងមួយកម្រិតនៅថ្ងៃនេះ។
សេចក្តីជូនដំណឹងរបស់រដ្ឋាភិបាលហ្វីល្លីពីនឲ្យដឹងថា ស្ថានការណ៍កំពុងបន្តជាប់គំាងនៅឡើយ រហូតមកដល់ព្រឹកមិញនេះ។ កាលពីយប់ថ្ងៃអង្គារ ទី១០ មេសាម្សិលមិញ ពោលក្រោយពីឧប្បត្តិហេតុភ្លាម លោករដ្ឋមន្រ្តីការបរទេសហ្វីល្លីពីនបានទូរស័ព្ទនិយាយជាមួយលោកអគ្គរដ្ឋទូតចិនប្រចំាទីក្រុងម៉ានីល ដោយបញ្ជាក់ប្រាប់អ្នកការទូតចិនរូបនោះថា តំបន់ដែលនាវានេសាទចិនបានចូលមកនោះ គឺជាដែនទឹករបស់ប្រទេសហ្វីល្លីពីន។ នៅព្រឹកមិញនេះទៀត ក្រសួងការបរទេសហ្វីល្លីពីនក៏បានកោះហៅរូបអគ្គរដ្ឋទូតចិនប្រចំាទីក្រុងម៉ានីលឲ្យចូលជួបដើម្បីរកដំណោះស្រាយតាមផ្លូវទូត។
នៅក្នុងជំនួបនោះ លោកអគ្គរដ្ឋទូតចិនបែរជាបានជម្រុញហ្វីល្លីពីនឲ្យបញ្ឈប់រាល់សកម្មភាពខុសច្បាប់នៅក្នុងតំបន់មានជម្លោះ និងបានបញ្ជាក់ថា កោះ Scarborough ដែលចិនហៅថា កោះ Huangyan និងដែនទឹកនៅជុំវិញ គឺជាកម្មសិទ្ធិរបស់ចិន និងជាតំបន់ប្រពៃណីរបស់ក្រុមអ្នកនេសាទចិន។ ទន្ទឹមគ្នានេះ ទីក្រុងប៉េកំាងក៏បានលើកយកឯកសារប្រវត្តិសាស្រ្តរបស់ខ្លួនជាច្រើនមកសំអាង ដើម្បីបញ្ជាក់ថា កោះ Huangyan គឺជារបស់ចិន។
គួរជម្រាបជូនថា ក្រៅពីជាផ្លូវទឹកយុទ្ធសាស្រ្តរវាងអាស៊ីបូព៌ា មជ្ឈិមបូព៌ា និងទ្វីបអឺរ៉ុប នៅក្រោមបាតសមុទ្រចិនខាងត្បូងក៏សម្បូរទៅដោយប្រេង និងឧស្ម័នដែរ។ ចំណែកនៅក្នុងទឹកវិញ ក៏សម្បូរត្រីដែលក្រុមអ្នកនេសាទចិន វៀតណាម និងហ្វីល្លីពីននំាគ្នាចូលទៅនេសាទ តែត្រូវបានឆ្មំាសមុទ្ររបស់ប្រទេសនីមួយៗចាប់ទៅ ចាប់មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ