បក្សប្រឆាំង និងរដ្ឋាភិបាល ចោទគ្នាពីការមិនគោរពរដ្ឋធម្មនុញ្ញកម្ពុជា
រយៈពេល២១ឆ្នាំមកនេះ រដ្ឋធម្មនុញ្ញរបស់កម្ពុជា ត្រូវបានបក្សប្រឆាំង និងរដ្ឋាភិបាលចោទប្រកាន់គ្នាថាមិនបានគោរពត្រឹមត្រូវទាំងស្រុងនៅឡើយទេ។ មន្ត្រីរបស់រដ្ឋាភិបាលចាត់ទុកថា ច្បាប់កំពូលរបស់កម្ពុជាមួយនេះត្រូវបានគោរពយ៉ាងល្អ ចំណែកឯបក្សប្រឆាំង ចាត់ទុកថារដ្ឋធម្មនុញ្ញកម្ពុជា នៅមានការរំលោភបំពាននៅឡើយ។
ចុះផ្សាយនៅថ្ងៃ៖
ស្តាប់ - ០២:០២
ថ្ងៃទី២៤ ខែកញ្ញា ម្សិលមិញនេះ គឺជាទិវារដ្ឋធម្មនុញ្ញ ហើយទាំងរដ្ឋាភិបាល ទាំងបក្សប្រឆាំង នៅតែចង្អុលដាក់គ្នា លើរឿងគោរពរដ្ឋធម្មនុញ្ញនេះ។ តំណាងរាស្ត្រគណបក្សប្រឆាំង លោក ម៉ៅ មុនីវណ្ណ បានលើកឡើងថា ច្បាប់រដ្ឋធម្មនុញ្ញកម្ពុជា គឺល្អហើយ ប៉ុន្តែរដ្ឋាភិបាល ដែលដឹកនាំដោយគណបក្សប្រជាជនកម្ពុជា មិនបានអនុវត្តទាំងស្រុងនូវស្មារតីរដ្ឋធម្មនុញ្ញនោះទេ។ ពោលគឺបក្សកាន់អំណាចមិនបានអនុវត្តសោះឡើយ ដូចជាច្បាប់អន្តោប្រវេសន៍ជាដើម។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី នៃរដ្ឋាភិបាលដឹកនាំដោយគណបក្សប្រជាជនកម្ពុជាបានគូសបញ្ជាក់ថា រដ្ឋធម្មនុញ្ញកម្ពុជា ត្រូវបានរដ្ឋាភិបាលគោរពបានយ៉ាងល្អ ពោលគឺចាប់តាំងពីការកសាងសន្តិភាពក្នុងប្រទេសកម្ពុជា ដូចជាការគោរពសិទ្ធិមនុស្សជាដើម។ បើទោះបីជា កម្ពុជាមានបញ្ហាវិបត្តិនយោបាយបន្តិបន្តួចក៏ដោយ។ លោកបានសង្កត់ធ្ងន់ថា មានតែក្រុមប្រឹក្សារដ្ឋធម្មនុញ្ញនោះទេ ដែលមានសមត្ថភាពក្នុងការវិនិច្ឆ័យថាអ្នកណារំលោភរដ្ឋធម្មនុញ្ញ ឬមិនរំលោភរដ្ឋធម្មនុញ្ញ។
សូមបញ្ជាក់ជូនថា រដ្ឋធម្មនុញ្ញឆ្នាំ១៩៩៣ គឺជាច្បាប់កំពូល ដែលត្រូវបានបង្កើតឡើងក្រោយប្រទេសកម្ពុជាធ្លាក់ចូលក្នុងសង្គ្រាមស៊ីវិលជាង៣ទស្សវត្សរ៍ និងក្រោយការចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩។ រដ្ឋធម្មនុញ្ញ ដែលមានអាយុ២១ឆ្នាំនេះ បានធ្វើវិសោធនកម្មចំនួន៦លើកហើយ គឺនៅឆ្នាំ១៩៩៤ ឆ្នាំ១៩៩៩ ឆ្នាំ២០០១ ឆ្នាំ២០០៥ ឆ្នាំ២០០៦ និងឆ្នាំ២០០៨ ។
លោកសុខ ទូច អ្នកវិភាគនយោបាយកម្ពុជា បានអះអាងថាការអនុវត្តលើរដ្ឋធម្មនុញ្ញ គឺមានតែ២០ភាគរយទេ ពោលគឺទាំងគណបក្សសង្គ្រោះជាតិ និងគណបក្សប្រជាជនកម្ពុជា មិនបានគោរពរដ្ឋធម្មនុញ្ញទាំងស្រុងនោះទេ។ ប៉ុន្តែគណបក្សទាំងពីរបែរជានាំគ្នាគោរពកិច្ចចរចានយោបាយទៅវិញ។ ប្រសិនបើគណបក្សទាំងពីរពិតជាគោរពរដ្ឋធម្មនុញ្ញមែននោះ វិបត្តិនយោបាយរបស់កម្ពុជា មិនអាចកើតមានឡើងបានទេ។ នេះជាការគូសបញ្ជាក់របស់លោកសុខ ទូច។
លោកបញ្ចាក់ថា ដើម្បីចៀសឲ្យផុតចំពោះការមិនគោរពរដ្ឋធម្មនុញ្ញ របស់គណបក្សនយោបាយក្នុងប្រទេសកម្ពុជា គឺមានតែ ឆន្ទៈរបស់អ្នកយោបាយ និងការសម្រេចរបស់ប្រជាពលរដ្ឋទេ ព្រោះថាបើអ្នកនយោបាយមិនគោរពរដ្ឋធម្មនុញ្ញ នោះប្រជាពលរដ្ឋនឹងមិនបោះឆ្នោតគាំទ្រឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ