កូរ៉េខាងជើងប្រារព្ធខួប៦៥ឆ្នាំនៃការបង្កើតសាធារណរដ្ឋប្រជាមានិតប្រជាធិបតេយ្យកូរ៉េ
រដ្ឋាភិបាលកូរ៉េខាងជើងបានរៀបចំក្បួនដង្ហែយោធាមួយ នៅថ្ងៃចន្ទទី៩ កញ្ញានេះ រំលឹកដល់ខួប៦៥ឆ្នាំនៃការបង្កើតសាធារណរដ្ឋប្រជាមានិតប្រជាធិបតេយ្យកូរ៉េ។ ក្រុងព្យុងយ៉ាងធ្លាប់ធ្វើក្បួនដង្ហែយោធាម្តងរួចហើយ កាលពីថ្ងៃ២៧កក្កដា រំលឹកខួប៦០ឆ្នាំ នៃការបញ្ចប់សង្គ្រាមនៅឧបទ្វីបកូរ៉េឆ្នាំ១៩៥០-១៩៥៣។ ជាជាងគិតទៅដល់បណ្តាប្រទេសសត្រូវ ក្បួនដង្ហែយោធាកូរ៉េខាងជើងលើកនេះ ផ្តោតសំខាន់ទៅលើការលើកតំកើងភាពអស្ចារ្យនៃបណ្តាមេដឹកនាំខ្លួន។ ដោយឡែក នៅពេលថ្មីៗនេះ ភរិយាមេដឹកនាំគីម ជុងអ៊ុន ក៏ទើបតែបានផ្តល់កំណើតកូនស្រីម្នាក់ ឈ្មោះថា Ju-Ae អោយដល់លោកគីមផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
នៅថ្ងៃចន្ទនេះ ក្នុងពិធីរំលឹកខួប៦៥ឆ្នាំនៃការប្រកាសបង្កើតសាធារណរដ្ឋប្រជាមានិតប្រជាធិបតេយ្យកូរ៉េ ទាហានកូរ៉េខាងជើងរាប់ម៉ឺននាក់ បានដើរក្នុងក្បួនដង្ហែ ជាជួរយ៉ាងត្រង់ភ្លឹង ក្នុងទីក្រុងព្យុងយ៉ាង នៅពីមុខប្រជាជនរាប់ពាន់នាក់ ដែលកាន់ផ្កាបញ្ចេញជាពណ៌ទង់ជាតិ។ មានវត្តមាននៅទីនោះ អគ្គមគ្គុទេស៍កូរ៉េខាងជើង គីម ជុងអ៊ុន ដែលត្រូវបានមហាជនអបអរសាទរនិងស្រែកជូនពរអោយមានអាយុយឺនយូរ។
ក្បួនដង្ហែយោធាថ្ងៃនេះ ខុសពីក្បួនដង្ហែលើកមុន។ គេមិនបានឃើញវត្តមានសម្ភារៈយោធាធុនធ្ងន់ បែបយ៉ាងរថក្រោះ រឺក៏មីស៊ីលនោះទេ។ ហើយសន្ទរកថានានាដែលបានថ្លែងចេញមកទៀតសោត ក៏មានលក្ខណៈបែបជាតិនិយម មិនសូវជាបង្ហាញហិង្សាប៉ុន្មាននោះឡើយ។ គួររំលឹកថា នៅពេលនេះ ស្ថានភាពទំនាក់ទំនងកូរ៉េខាងជើង និងកូរ៉េខាងត្បូង បានចូលដល់ដំណាក់កាលធូរស្រាលបន្តិចហើយ។ គួររំលឹកថា ក្រុងព្យុងយ៉ាងធ្លាប់បានធ្វើក្បួនដង្ហែយោធាម្តងមកហើយ កាលពីថ្ងៃ២៧កក្កដា រំលឹកខួប៦០ឆ្នាំ នៃការបញ្ចប់សង្គ្រាមនៅឧបទ្វីបកូរ៉េ ឆ្នាំ១៩៥០-១៩៥៣។
ដោយឡែក ថ្មីៗនេះដែរ ភរិយាលោក គីម ជុងអ៊ុន ទើបតែប្រសូតបានកូនស្រីម្នាក់។ នេះបើយោងតាមអ្នកកីឡាបាល់បោះអាមេរិកដ៏ល្បីម្នាក់ គឺលោក ដឺនីស រ៉ុដម៉ាន់។ លោករ៉ុដម៉ាន់ទើបតែបានទៅកំសាន្តកាយក្បែរសមុទ្រកូរ៉េខាងជើង ជាមួយគ្រួសារគីម ជុងអ៊ុន នាពេលថ្មីៗនេះ។ លោករ៉ុដម៉ាន់ បានប្រាប់ថា លោកគីម គឺជាឳពុកដ៏ល្អមួយរូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ