សង្គមស៊ីវិលនិងរាជរដ្ឋាភិបាលកំពុងរួមគ្នាប្រឆាំងអំពើពុករលួយ
ស្របពេលដែលអង្គភាពប្រឆាំងអំពើពុករលួយកំពុងបើកយុទ្ធនាការ ទទួលមន្ត្រីជាប់កាតព្វកិច្ចឲ្យចូលខ្លួនទៅប្រកាសទ្រព្យសម្បត្តិអង្គការសង្គមស៊ីវិលពីរដែលធ្វើការពាក់ពន្ធ័នឹងតម្លាភាពបានប្រកាសរួមកម្លាំងគ្នាដើម្បីប្រយុទ្ធប្រឆាំងនឹងអំពើពុករលួយ។ អង្គការតម្លាភាពកម្ពុជានិងសម្ព័ន្ធដើម្បីសុចរិតភាពនិងគណនេយ្យភាពសង្គមបានប្រកាសថានឹងកសាងសម្ព័ន្ធអង្គការមិនមែនរដ្ឋាភិបាលមួយនៅទូទាំងប្រទេសកម្ពុជា។រហូតដល់ចុងសប្តាហ៍នេះមានមន្ត្រីជិត២ម៉ឺននាក់ហើយដែលបានប្រកាសទ្រព្យសម្បត្តិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ការប្រយុទ្ធប្រឆាំងអំពើពុករលួយនៅកម្ពុជា ហាក់ដូចជាកំពុងមានសកម្មភាពគគ្រឹកគគ្រេង ក្នុងរយៈពេលចុងក្រោយនេះទាំងក្នុងរាជរដ្ឋាភិបាល និងសង្គមស៊ីវិល។ ជាក់ស្តែង អង្គការសង្គមស៊ីវិលពីរ បានប្រកាសជាឧឡារឹកអំពីការរួបរួមគ្នា ដើម្បីធ្វើសកម្មភាពប្រឆាំងអំពើពុករលួយ។
នៅក្នុងសេចក្តីថ្លែងការរួមគ្នាមួយដែលចេញផ្សាយនៅចុងសប្តាហ៍នេះ អង្គការតម្លាភាពកម្ពុជា និងសម្ព័ន្ធដើម្បីសុចរិតភាពនិងគណនេយ្យភាពសង្គម បានអះអាងថា ពួកគេបានបង្កើតយុទ្ធសាស្ត្របីឆ្នាំ ដើម្បីអភិវឌ្ឍសមត្ថភាពការងារផ្ទៃក្នុង និងរួមកម្លាំងជាមួយភាគីពាក់ពន្ធ័ផ្សេងៗ ដើម្បីធ្វើសកម្មភាពប្រឆាំងអំពើពុករលួយឲ្យកាន់តែមានប្រសិទ្ធភាព និងនិរន្តរភាព។
ក្នុងឆ្នាំ២០១៣នេះ សង្គមស៊ីវិលនឹងផ្តោតទៅលើការផ្តល់ចំណេះដឹងដល់សមាជិកទាំង៣១ របស់ខ្លួន ទាក់ទងនឹងច្បាប់ប្រឆាំងអំពើពុករលួយ និងច្បាប់ពាក់ព័ន្ធផ្សេងៗទៀត ក៏ដូចជាយុទ្ធសាស្ត្រ និងវិធីសាស្ត្រប្រឆាំងអំពើពុករលួយ។ ក្រៅពីនោះ យុទ្ធនាការតស៊ូមតិថ្មីៗជាច្រើននឹងត្រូវបង្កើតឡើងទាំងនៅថ្នាក់មូលដ្ឋាននិងថ្នាក់ជាតិ។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានអះអាងថាសម្ព័ន្ធដើម្បីសុចរិតភាព និងគណនេយ្យភាពសង្គម គឺជាយន្តការដ៏ល្អប្រសើរសម្រាប់បញ្ជ្រាបគម្រោង នៅទូទាំងប្រទេស។ លោកសង្ឃឹមថា តាមរយៈបណ្តាញដ៏រឹងមាំរបស់ខ្លួន សម្ព័ន្ធនេះអាចផ្ញើសារស្តីពីអំពើពុករលួយបានកាន់តែទូលំទូលាយ និងឆាប់រហ័សជាងមុន ដើម្បីធ្វើឲ្យមានការផ្លាស់ប្តូរជាវិជ្ជមាននៅកម្ពុជា។
ការប្រកាសចងសម្ពន្ធ័គ្នារបស់អង្គការសង្គមស៊ីវិល បានធ្វើឡើងចំពេលដែលអង្គភាពប្រឆាំងអំពើពុករលួយរបស់រាជរដ្ឋាភិបាល កំពុងប្រកាសឲ្យមន្ត្រីជាប់កាតព្វកិច្ចទៅប្រកាសទ្រព្យសម្បត្តិ និងបំណុលរបស់ខ្លួនជាលើកទី២។ ពួកគេមានពេលពេញមួយខែមករានេះ ដើម្បីបំពេញកាតព្វកិច្ចរបស់ខ្លួន។ គិតត្រឹមចុងសប្តាហ៍នេះ មានមន្ត្រីប្រមាណជា ២ម៉ឺននាក់ហើយក្នុងចំណោមជិត៣ម៉ឺននាក់ ដែលបានចូលខ្លួនទៅប្រកាសទ្រព្យសម្បត្តិនិងបំណុល។
កាលពីឆ្នាំ២០១២ កម្ពុជាត្រូវបានអង្គការតម្លាភាពអន្តរជាតិផ្តល់ចំណាត់ថ្នាក់អំពើពុករលួយលេខ១៥៧ ក្នុងចំណោម១៧៦ ប្រទេស។ ទោះបីជាមានភាពប្រសើរជាងឆ្នាំ ២០១១បន្តិចមែន ប៉ុន្តែចំណាត់ថ្នាក់បង្ហាញថា កម្ពុជានៅតែមានអំពើពុករលួយយ៉ាងខ្លាំងនៅឡើយ ដែលត្រូវរួមគ្នាប្រយុទ្ធប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ