ជម្លោះដីធ្លី ឈានដល់ការបិទផ្លូវជាតិស្ទើរពេញមួយថ្ងៃ
ស្ទើរតែពេញមួយថ្ងៃនេះ ប្រជាពលរដ្ឋប្រមាណ៤០០នាក់ បានឈរបិទផ្លូវជាតិលេខ៧៦ អា ដែលភ្ជាប់ចរាចរណ៍ពីខេត្តក្រចេះទៅកាន់ខេត្តមណ្ឌលគិរី។ ប្រជាពលរដ្ឋ បិទផ្លូវតវ៉ានោះ ដើម្បីជំរុញឲ្យអាជ្ញាធររដ្ឋាភិបាលស្វែងរកដំណោះស្រាយក្នុងជម្លោះដីធ្លីរវាងក្រុមហ៊ុននិងប្រជាពលរដ្ឋ ពិសេសក្រុមប្រជាពលរដ្ឋ ទាមទារឲ្យអាជ្ញាធររដ្ឋាភិបាលចាប់ខ្លួនសន្តិសុខក្រុមហ៊ុន ធី ធី វ៉ាយ ដែលបានបាញ់ប្រជាពលរដ្ឋ របួស ៤ នាក់ក្នុងជម្លោះដីធ្លីនៅព្រឹកមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
សកម្មជនសិទ្ធិមនុស្សអង្គការលីកាដូ លោក អំ សំអាត ដែលបានចុះទៅសង្កេតការណ៍ដល់កន្លែងកើតហេតុ បានសម្តែងការសោកស្តាយ ចំពោះទង្វើរបស់ក្រុមសន្តិសុខការពារក្រុមហ៊ុន ធីធីវ៉ាយ ( T.T.Y. ) ដែលទទួលបានដីសម្បទានសេដ្ឋកិច្ច នៅស្រុកស្នួល ខេត្តក្រចេះ ជាប់នឹងព្រំប្រទល់ខេត្តមណ្ឌលគិរី។ សន្តិសុខក្រុមហ៊ុនឯកជនទាំងនោះ បានបាញ់កាំភ្លើងអាកា លើក្រុមប្រជាពលរដ្ឋតវ៉ា កាលពីព្រឹកម៉ោងប្រមាណ ១១ ថ្ងៃទី១៨ ខែមករា ឆ្នាំ២០១២។
សកម្មជនសិទ្ធិមនុស្ស បានជំរុញឲ្យរដ្ឋាភិបាលចាប់ជនដៃដល់មកផ្តន្ទាទោស ខណៈដែលរដ្ឋាភិបាលបានប្រកាសជាញឹកញាប់ថា មិនឲ្យមានកម្លាំងប៉ូលិសទាហាន ទៅការពារក្រុមហ៊ុនឯកជនទេ។
រយៈពេលស្ទើរពេញមួយថ្ងៃនេះ ពលរដ្ឋបានបិទផ្លូវ ៧៦ អា ដើម្បីជំរុញឲ្យអាជ្ញាធរ ចាប់ជនដៃដល់មកផ្តន្ទាទោស។ នៅព្រឹកមិញ ក្រុមប្រជាពលរដ្ឋអ្នកតវ៉ា បានរារាំងមិនឲ្យក្រុមហ៊ុន ឈូសឆាយដីដាំដំឡូងមី ដែលមានជម្លោះយូរឆ្នាំមក នៅស្រុកស្នួល ខេត្តក្រចេះ។ ប៉ុន្តែក្រុមហ៊ុនឯកជន ធីធីវ៉ាយ សំអាងថា ខ្លួនទទួលបានដីសម្បទានសេដ្ឋកិច្ចពីរដ្ឋាភិបាល ក្រុមហ៊ុនបានឈូសឆាយដី ដែលប្រជាពលរដ្ឋដាំដំឡូងមីរាប់សិបហិកតា។
ការផ្តល់ដីសម្បទាឲ្យក្រុមហ៊ុនឯកជនអភិវឌ្ឍភាគច្រើន បានបង្កជម្លោះជាមួយប្រជាពលរដ្ឋ។ ប្រជាពលរដ្ឋដែលអះអាងថា ក្រុមហ៊ុនបានរំលោភលើដីរបស់ពលរដ្ឋ។ ក៏ប៉ុន្តែការតវ៉ារបស់ពលរដ្ឋ ត្រូវបង្ក្រាប និងមានអ្នកខ្លះ ត្រូវបានចាប់ឃុំខ្លួនផងដែរ។
ទាក់ទងនឹងជម្លោះដីធ្លី នៅព្រឹកថ្ងៃទី១៨មករានេះ ក្រុមពលរដ្ឋបុរីកីឡា២០ នាក់ ដែលអាជ្ញាធរចាប់ឃុំឃាំង កាលពីថ្ងៃទី១១មករា ក៏បានឡើងផ្លោះរបង រត់ចេញពីមណ្ឌលព្រៃស្ពឺផងដែរ។ ក្រុមពលរដ្ឋបុរីកីឡា ដែលត្រូវក្រុមហ៊ុនផានអ៊ីមិច និងអាជ្ញាធរ ឈូសឆាយ កម្ទេចផ្ទះ កាលពីថ្ងៃទី៣មករា បានទាមទាររកដំណោះស្រាយពីអាជ្ញាធរ និងស្ថានទូតនានា តែត្រូវអាជ្ញាធរ ចាប់យកទៅឃុំឃាំងនៅមជ្ឈមណ្ឌលសង្គមកិច្ចរាជធានីភ្នំពេញ ឬមណ្ឌលព្រៃស្ពឺ ដែលជាកន្លែងផ្ទុកអ្នកសុំទាន និងអ្នកគ្មានជម្រក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ